චීනයේ අලිබාබා ආයතනයේ ජැක් මා ගැන කරුණු පහක්

Alibaba co founder Jack Ma Image copyright Getty Images

ඊ-වාණිජ වෙළෙඳපොළෙහි දැවැන්තයෙකු වන අලිබාබා සමාගමේ විධායක සභාපති වන ජැක් මා මෙම වසරේ දී සිය තනතුරෙන් ඉවත් වීමට සැලසුම් කරන බව ප්‍රකාශ කර තිබේ.

චීනයේ වඩාත් ප්‍රසිද්ධ සහ ධනවත්ම ව්‍යාපාරිකයන්ගෙන් කෙනෙකු වන ජැක් මා, ඔහුගෙන් හිස්වන තනතුර දැනට ප්‍රධාන විධායක නිලධාරියා ලෙස කටයුතු කරන ඩැනියෙල් ශැන්ග්ට පිරිනමනු ඇත.

අලිබාබා ලෝකයේ වටිනාම සමාගම්වලින් එකකි. පසුගිය වසර තුළ සමාගමේ කොටස්වල වටිනාකම දෙගුණයකට ආසන්න විය.

ජැක් මා ගැන ඔබ දැනගත යුතු කරුණු පහක් පහත දැක්වේ:

1. ඔහු ඉංග්‍රීසි ගුරුවරයෙක්

චීනයේ Hangzhou නගරයේ අඩු ආදායම්ලාභී පවුලක උපත ලද ජැක් මා, ස්වෝත්සාහයෙන් දියුණු වී ඊ-වාණිජ වෙළෙඳපොළෙහි දැවැන්තයෙකු බවට පත්වීමට පෙර, ඉංග්‍රීසි ගුරුවරයෙකු ලෙස සේවය කර තිබේ.

පාසලේ දී බොහෝ දුෂ්කරතාවලට මුහුණ දුන් ඔහු KFC ආයතනය ඇතුළු විවිධ රැකියා තිහකින් ප්‍රතික්ෂේප වී ඇත.

ජැක් මා සිය ප්‍රථම පරිගණකය මිලදීගෙන ඇත්තේ වයස 33දීය. ඔහු ප්‍රථමයෙන් "beer" ලෙස ගූගල් සෙවීම් කළ විට චීන බීර එම සෙවුම්වල නොමැති බව දැක පුදුමයට පත් වී තිබේ.

පරිගණක දැනුමක් නොවූ ජැක් මා, මින් වසර විස්සකට පෙර සිය කුඩා නිවසේ සිට අලිබාබා සමාගම ආරම්භ කරන ලදී. ඔහුගේ ඉල්ලීම පරිදි අන්තර්ජාල වෙළෙඳාමට මුදල් යොදවා ඇත්තේ මිතුරන් පිරිසකි.

Image copyright Getty Images
Image caption වර්තමාන වටිනාකම ඩොලර් බිලියන 420ක් වන අලිබාබා සමාගමේ කොටස්වලින් 9%ක් පමණ ජැක් මාට හිමිය

2. ඔහු ඉතා ධනවත්

ජැක් මා චීනයේ තෙවෙනි ධනවත්ම පුද්ගලයා වේ. 2017 වසරේ ලෝකයේ ධනවත් පුද්ගලයන් ගැන ෆෝබ්ස් (Forbes) සඟරාව නිකුත් කළ වාර්තාවකට අනුව ජැක් මා ගේ වත්කම ඩොලර් බිලියන 36.6කි.

වර්තමාන වටිනාකම ඩොලර් බිලියන 420ක් වන අලිබාබා සමාගමේ කොටස්වලින් 9%ක් පමණ ජැක් මා ට හිමිය. මෙතෙක් ලෝකයේ සමාගමක් නිකුත් කළ වැඩිම මහජන කොටස් ප්‍රමාණය වාර්තා කරමින් 2014 දී අලිබාබා සමාගම ඩොලර් බිලියන 25ක ආදායමක් ලැබීය.

චීන ආර්ථිකය තුළ නව වෙළෙඳපොළක් නිර්මාණය කරමින් ඉතා තීරණාත්මක පුද්ගලයෙකු බවට පත්වීමට ජැක් මා සමත් වී තිබේ.

Image copyright Getty Images
Image caption ඔහුට දැන් අවශ්‍ය වී ඇත්තේ නැවතත් තමන් "ආදරය කරන" අධ්‍යාපන ක්ෂේත්‍රයට පිවිසීමය

මේ තොරතුරුද දැනගන්න:

3. ඔහු බොහෝ දේ ලබා දෙනවා

අලිබාබා සමාගම තුළ සිය අනුක්‍රමය පිළිබඳ වසර දහයකට පෙර ඔහු සිතන්නට පටන් ගෙන ඇත. කෙසේවෙතත්, පියවරක් පසුපසට ගනිමින් 2013 වර්ෂයේ දී ඔහු සමාගමේ සභාපති තනතුර භාර ගැනීම සඳහා ප්‍රධාන විධායක තනතුරෙන් ඉවත් වී තිබේ.

'ජැක් මා පදනම' ඔස්සේ මහජන සේවය සඳහා වැඩි කාලයක් යෙදවීම ඔහුගේ මෙම තීරණයට හේතුව බව හෙතෙම පැවසීය. වසර තුනකට පසු, අධ්‍යාපනය වෙනුවෙන් ගොඩ නැගූ පදනමකින් චීනයේ දුෂ්කර පළාත්වල අධ්‍යාපන කටයුතු සඳහා වසර දහයක සැලැස්මකට අනුව ඩොලර් මිලියන 30ක් ප්‍රදානය කිරීමට පොරොන්දු වී තිබේ.

අලිබාබා සමාගම් හවුලේ ආරම්භක කොටස්කරුවෙකු ලෙස දිගටම රැඳී සිටීමට අපේක්ෂා කරන අතර, ඔහුට දැන් අවශ්‍ය වී ඇත්තේ නැවතත් තමන් "ආදරය කරන" අධ්‍යාපන ක්ෂේත්‍රයට පිවිසීමටය.

"මට බිල් ගේට්ස් ගෙන් බොහෝ දේ ඉගෙන ගන්න තිබෙනවා" යැයි බ්ලූම්බර්ග් (Bloomberg) පුවත් සේවය සමග පැවැත්වූ සම්මුඛ සාකච්ඡාවක දී ජැක් මා පැවසීය. බිල් ගේට්ස් ද මයික්‍රොසොෆ්ට් ආයතනයේ ප්‍රධාන විධායක නිලධාරි තනතුරෙන් ඉවත් වීමට පෙර මහජන සේවය සඳහා පදනමක් පිහිටුවීමට කටයුතු කර තිබේ.

Image copyright Getty Images
Image caption සිය වෙබ් අඩවිය හරහා චීනයට භාණ්ඩ විකිණීමට සැලැස්වීම තුළින් එක්සත් ජනපදයේ ව්‍යාපාරවලට සහය දක්වා නව රැකියා අවස්ථා මිලියන ගණනක් නිර්මාණය කිරීමට ජැක් මා පොරොන්දු වී තිබේ

4. ඇමරිකානු ජනාධිපති ඩොනල්ඩ් ට්‍රම්ප්, ජැක් මාට ඇති කැමැත්ත

පසුගිය වසරේ ජනවාරි මස නිව්යෝක් නගරයේ දී එක්සත් ජනපද ජනාධිපති ඩොනල්ඩ් ට්‍රම්ප් සමග "විශිෂ්ට හමුවක්" පැවති බව ජැක් මා පැවසුවේය.

"චීනය සහ ඇමරිකාව අතර සම්බන්ධතා ශක්තිමත් කළ යුතු අතර, මීට වඩා හොඳින්, ඉතා සුහදව සිදු විය යුතුයි" යනුවෙන් එහිදී දෙදෙනාම එකඟ වූ බව ජැක් මා පැවසීය.

ජනාධිපති ට්‍රම්ප් ජැක් මා ගැන සඳහන් කරමින් ප්‍රකාශ කළේ "ඔහු ඉතා විශිෂ්ට ව්‍යාපාරිකයෙක්. ලෝකයේ හොඳම ව්‍යාපාරිකයන්ගෙන් කෙනෙක්. ඔහු ඇමරිකාව සහ චීනය, රටවල් දෙකටම ආදරෙයි" යනුවෙනි.

සිය වෙබ් අඩවිය හරහා චීනයට භාණ්ඩ විකිණීමට සැලැස්වීම තුළින් එක්සත් ජනපදයේ ව්‍යාපාරවලට සහය දක්වා නව රැකියා අවස්ථා මිලියන ගණනක් නිර්මාණය කිරීමට ජැක් මා පොරොන්දු වී තිබේ.

ජැක් මා විශ්‍රාම ගැනීමට තීරණය කර තිබෙද්දී චීන නිෂ්පාදකයන් සහ ඇමරිකානු ව්‍යාපාරිකයන් චීන-ඇමරිකානු වෙළෙඳ යුද්ධයට මැදිව බොහෝ අභියෝගවලට මුහුණ දෙමින් සිටිනු දක්නට ලැබේ.

Image copyright AFP

5. මිනිසුන්ගේ ආකර්ෂණය දිනාගැනීමටඔහු කැමතියි

අලිබාබා සමාගමේ සම ආරම්භක වන මෙම ආකර්ෂණීය, සුවිශේෂී පුද්ගලයා පොදු උත්සවලදී ඉතා සතුටින් කාලය ගත කරනු දක්නට ලැබේ.

2017 වසරේදී සමාගමේ සංවත්සරය සමරමින් "ත්‍රාසජනක" උත්සවයක් සංවිධානය කර මයිකල් ජැක්සන් අනුකරණය කරමින් රංගනයක් ඉදිරිපත් කළේය.

පසුගිය වසරේ ඔහු Gong Shou Dao නම් කුංග් ෆූ කෙටි චිත්‍රපටියේ රඟපෑවේය.

ඔහු තිස් වසරකට අධික කාලයක් 'tai chi' නම් සටන් කලාව පුහුණු වෙන අතර, ආත්මාරක්ෂක සටන් ක්‍රම පිළිබඳ දැඩි උනන්දුවක් දක්වයි.

තවත් තොරතුරු: