MH 370 සෝදිසි මෙහෙයුම් නව දිශාවකට

Image copyright AP

අතුරුදහන් වූ MH370 ගුවන් යානය පිලිබඳ සෝදිසි මෙහෙයුම ඉන්දීය සාගරයේ වෙනත් කලාපයකට යොමු කළ බව ඔස්ට්‍රේලියාව පවසයි.

එවැනි පියවරක් ගනු ලැබ තිබෙන්නේ ගුවන් යානය කලින් නිගමනය කර තිබුණ ප්‍රමාණයට වඩා අධි වේගයකින් පියාසර කර ඇති බව අදාළ පරීක්ෂකයන් විසින් නිගමනය කරනු ලැබීමෙන් පසුව.

එවැනි තත්වයක් යටතේ යානයේ ඉන්ධන අවසන් වන්නට ඇති බවයි, පරීක්ෂකයන්ගේ අදහස වන්නේ.

ඔස්ට්‍රේලියානු සාගර ආරක්ෂක අධිකාරිය(AMSA) දැන් පවසන්නේ, කලින් සෝදිසි කළ සාගර කලාපයෙන් කිලෝ මීටර් 1,100 ක් නිරිත දිග දෙසට යොමු වෙන බවයි.

මගීන් 239ක් රැගෙන මැලේසියාවේ ක්වාලාලම්පුර් සිට චීනයේ බේජිං අගනුවර කරා පියාසර කරමින් තිබියදී MH370 ගුවන් යානය අතුරුදහන් වුනේ මාර්තු 08 වැනිදා.

සිකුරාදා උදෑසන වන තෙක් ඔස්ට්‍රේලියාවේ ‘පර්ත්’ නගරයෙන් කිලෝ මීටර 2500 ක් නිරිත දිග දෙසටයි යානය සෙවීමේ මෙහෙයුම යොමුව තිබුණේ.

ඉන්ධන අවසන් වුණිද?

අලුතින් ලද හෝඩුවාවන් අනුව අලුත් දිශාවකට යොමු වූ බවයි ඔස්ට්‍රේලියානු සාගර ආරක්ෂක අධිකාරියේ (AMSA) හදිසි ප්‍රතිචාර අංශයේ සාමාන්‍යාධිකාරී ජෝන් යන්ග් පවසන්නේ.

‘’රේඩාර් සබඳතා බිඳවැටීමට කලින් දකුණු චීන මුහුද සහ මලක්කා සමුද්‍ර සන්ධිය අතර රේඩාර් දත්ත දිගින් දිගටම විශ්ලේෂණය කිරීම’’ නිවේදනයට පාදක වූ බව ඔස්ට්‍රේලියානු සාගර ආරක්ෂණ අධිකාරිය පවසයි.

‘’කලින් නිගමනය කර තිබුණ වේගයට වඩා වැඩි වේගයකින් යානය පියාසර කල බවක් පෙනෙනවා. මේ නිසා ඉන්ධන දහනය වැඩි වීමෙන් යානය දකුණු ඉන්දීය සාගරයට ගමන් කළ හැකි දුර අඩු වීමේ ඉඩක් පවතිනවා’’ඔස්ට්‍රේලියානු සාගර ආරක්ෂණ අධිකාරියේ ජෝන් යන් පවසයි.

හමුදා ගුවන් යානා නවයක් සිකුරාදා සෝදිසි කාර්යයන්හි නිරත වන අතර පණිවුඩ හුවමාරුව පිණිස සිවිල් ගුවන් යානයක සහය ලැබෙන බවත් ඔස්ට්‍රේලියානු සාගර ආරක්ෂණ අධිකාරියේ නිවේදනයෙහි දැක්වෙයි.

මේ පුවතට සම්බන්ධ තවත් විස්තර