ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

‘මාර්කේස් කියවීම’ පෙරට

බ්‍රහස්පතින්දා දිවියෙන් සමුගත් ජගත් කීර්තිධර ලේඛක ගාබ්‍රියෙල් ගාර්ෂියා මාර්කේස්ට උපහාර පිණිස ඔහු ජන්ම ලාභය ලද කොලොම්බියාව දින තුනක ශෝක කාලයක් ප්‍රකාශයට පත් කොට ඇත.

‘මාර්කේස්’ යන ආදරනීය නමින් ලොව හඳුනන කොලොම්බියානු ජාතික නොබෙල් සම්මානලාභියා ඊයේ අවසන් හුස්ම හෙළන ලද්දේ ‘මෙක්සිකෝ සිටි’ නගරයේ ඔහුගේ නිවහනේදී.

කොලොම්බියානු ආණ්ඩුව වෙනුවෙන් දින තුනක ශෝක කාලයක් ප්‍රකාශයට පත් කරමින් ජනාධිපති ජුවාම් මැනුවෙල් සැන්ටෝස්, මාර්කේස් ගේ සුප්‍රකට නව ප්‍රබන්ධය වන ‘හුදෙකලාවේ සියවසරක්’ කෘතිය අනුව යමින් කියා සිටියේ, ‘මාර්කේෂ් නොමැති සමස්ත කොලොම්බියාවම සියවසරක හුදෙකලා භාවයකට සහ සංවේගයකට’ පත්ව ඇති බවයි.

ගාබ්‍රියෙල් ගාර්ෂියා මාර්කේස් විසින් ලෝකයට දායාද කරන ලද විශිෂ්ටතම නිර්මාණය ලෙස බොහෝ පාඨකයන් සලකන්නේ ‘හුදෙකලාවේ සිය වසරක්’(One Hundred Years of Solitude) කෘතියයි.

හුදෙකලාවේ සිය වසරක්

1927 වසරේ මාර්තු මස හය වෙනි දින කොලොම්බියාවේ දී උපත ලද මාර්කේස් විසිවැනි සියවසේ විශ්ව සම්භාවනාවට පත් මහා සාහිත්‍යධරයන් කීප දෙනා අතරට එක් වෙන බවයි, බීබීසී සංදේශය සමඟ විශේෂ සමරු වැඩසටහනකට එක් වෙමින් ලේඛක ගාමිණී වියන්ගොඩ සඳහන් කළේ.

මාර්කේස් ගේ කෙටිකතාවක් ‘ඇය පැමිණි හෝරාව’ යනුවෙන් පරිවර්තනය කොට 1990 දී සිය ‘රාග රිද්ම’ කෙටිකතා සංග්‍රහයේ පළ කොට ඔහු සිංහල පාඨකයන්ට හඳුන්වා දෙමින්, ඉන් අනතුරුව මහා ලේඛකයාගේ නවකතා දෙකක් ‘කොලරා කාලේ ආලේ’ සහ ‘කරුමක්කාර කතාවක්’ යනුවෙන් සිංහලට නැගූ ගාමිණී වියන්ගොඩ කියා සිටින්නේ,’ මාර්කේස් කියවීම’ඉදිරි පරම්පරාවන්ගේද උරුමයක් බවට පත් ව ඇති බවයි.

අද සිංහල කියවන්නන් අතර, මාර්කේස් ලබා සිටින ජනප්‍රියත්වය ගැන සඳහන් කරමින් ගාමිණී වියන්ගොඩ පවසන්නේ,“මාර්කේෂ් ඉන්දියාව තුළ ලබන ප්‍රසිද්ධියට වඩා වැඩි ප්‍රසිද්ධියක් ශ්‍රී ලංකාව තුළ ලබන” බවයි.

මායා යථාර්ථවාදය

Image copyright AFP

“මාර්කේස්ගේ නිර්මාණ රීතිය ‘ඉන්ද්‍රජාලික’ එසේත් නැත්නම් ‘මායා යතාර්ථවාදී’වූවක් හැටියට සාහිත්‍ය ලෝකය තුළ සාකච්ඡාවට පාත්‍ර වෙනවා. එහෙත් ඔහු නිර්මාණය කළේ යථාර්ථය. මාර්කේස් වුනත් කිව්වේ ඔහු ඉන්ද්‍රජාලික යථාර්ථවාදියකු නොවන බවයි.”ගාමිණී වියන්ගොඩ පවසයි.

“මම හොයා ගත් දෙයක් නැහැ. කියවන්නන් මගේ මැවීම් ගැන වර්ණනා කරනවා. මම, මා ‘අන්ත’ යථාර්ථවාදියෙක් කියලයි හිතන්නේ. මම නිර්මාණය කරපු හැම දෙයක්ම යථාර්ථය ඇතුළෙයි තියෙන්නේ.” මාර්කේස් විසින්ම ප්‍රකාශ කරනු ලැබ ඇත.

කොලොම්බියානු ගත්කතුවර, ඔස්කාර් ග්වෝර්දියෝලා රිවෙරා විසින් මාර්කේස් වෙනුවෙන් සමරු සටහනක් තබමින් ඔහු විග්‍රහ කරනු ලැබ තිබුණේ, “ගාබ්‍රියෙල් ගාර්ෂියා මාර්කේස් ; ඔහු අපේ හෝමර්”යනුවෙනි.

‘අපේ හෝමර්’

ලොව පුරා සාහිත්‍යලෝලීන් අතර ‘මාර්කේස්’යනුවෙන්ද ඇමෙරිකානු කලාපය පුරා ‘ගබෝ’යනුවෙන් ද සාදරයෙන් සලකනු ලැබුණ ගාබ්‍රියෙල් ගාර්ෂියා මාර්කේස්, නවකතා කෙටිකතා පමණක් නොව ඔපෙරා නිර්මාණ වලින්ද සහෘද ලෝකයට සංග්‍රහ කළ දැවැන්තයකු හැටියටයි සම්භාවනාවට පාත්‍ර වන්නේ.

“මගේ ගුරුවරයා මිය ගියා.මම අඬන්නේ නැහැ. ඒ වෙනුවට මම කරන්නේ ඔහුගේ කෘතීන් නැවත නැවතත් පරිශීලනය කිරීමයි” මතක සටහනක් තබමින් ප්‍රකට කතුවරියක වන ඉසබෙල් අයියන්දේ කියා සිටින්නීය.