ඉන්දීය කළු සල්ලි තොරතුරු අධිකරණයට

Image copyright AP

විදේශීය බැංකු වල අනවසරයෙන් මුදල් සැඟවූ බවට චෝදනා ලබන හයසීයකට අධික පුද්ගල නම් ලැයිස්තුවක් ඉන්දීය ආණ්ඩුව විසින් ශ්‍රේෂ්ඨාධිකරණයට ඉදිරිපත් කරනු ලැබ ඇත.

පුද්ගලයන් හයසිය විසි හත් දෙනකුගේ නම් සීල් තබන ලද කවරයක බහා අධිකරණයට භාර දී ඇති බවයි වාර්තා වන්නේ.

එම නම් ලැයිස්තුව විශේෂ පරීක්ෂණ මණ්ඩලයකට (SIT) යොමු කරන බව ඉන්දීය ශ්‍රේෂ්ඨාධිකරණය ප්‍රකාශ කර ඇත.

ඉන්දීය ධන කුවේරයන් බදු වලින් බේරීමේ උපායක් වශයෙන් රුපියල් කෝටි පනස් දහසක් පමණ විදේශීය බැංකුවල තැන්පත් කර ඇතැයි ඇස්තමේන්තු කෙරෙයි.

මහජන කෝපය

එකී ලැයිස්තුවට ඇතුළත් පුද්ගලයන්ගේ අනන්‍යතාවය සම්බන්ධයෙන් ඉන්දියානු සමාජය තුළ දැඩි කලකිරීමක් කෝපයක් පළ වෙමින් ඇතත්, අධිකරණය කියා සිටින්නේ, එම නම් ලැයිස්තුව ප්‍රසිද්ධ නොකරන බවයි.

එවැනි මූල්‍ය තොරතුරු ප්‍රසිද්ධ කරනු ලැබීම ජාත්‍යන්තර බදු ගිවිසුම් උල්ලංඝනය කිරීමක් වනු ඇතැයි ඉන්දීය ආණ්ඩුව පවසයි.

වත්මන් ඉන්දීය ආණ්ඩුව බලයට පත්වීමට පෙර සිය මැතිවරණ ප්‍රචාරක ව්‍යාපාරය සමයේ ප්‍රතිඥාවක් දෙමින් කියා සිටියේ, අහිමි වෙමින් ඇති බදු අය කර ගැනීමේ පියවරක් වශයෙන් ඊනියා කළු සල්ලි ඇති තැන් සොයා ලුහු බඳින බවයි.

කළු සල්ලි සෙවීමේ බලකායක්

එවැනි මුදල් ආයෝජනය කර තිබෙන්නේ මොරීසස්, ස්විස් සහ බ්‍රිටිෂ් වර්ජින් අයිලන්ඩ්ස් වැනි රටවල බැංකුවල බවයි පැවසෙන්නේ.

2011 වසරේ දී ප්‍රංශ බලධාරීහු ස්විස් බැංකුවල මුදල් තැන්පත් කර ඇති හත්සීයක් පමණ ඉන්දියානුවන් පිළිබඳ ව ඉන්දියාවට තොරතුරු සපයා තිබුණි.

බැංකු සේවකයකු විසින් තොරතුරු හෙළිදරව් කරනු ලැබීමෙන් අනතුරුවයි එම දැනුම් දීම සිදු කෙරුණේ.

අගමැති නරේන්ද්‍ර මෝඩි බලයට පත්වීමෙන් අනතුරුව පසුගිය ජුනි මාසයේ දී ‘කළු සල්ලි’සෙවීමේ විශේෂ කාර්ය සාධක බලකායක් ආරම්භ කරනු ලැබ ඇත.

මේ පුවතට සම්බන්ධ තවත් විස්තර