දූෂණයට ලක් වූ ඉන්දීය තරුණියන්ගේ කටුක අත්දැකීම්

දූෂණයට ලක් වූ ඉන්දීය කාන්තාවන් සහ දැරියන්ගේ ජීවන අත්දැකීම් පිළිබඳ ඡායාරූප ශිල්පිනී ස්මිතා ෂර්මා වාර්තාකරණයේ යෙදී සිටින්නේ වසර ගණනාවක සිටයි.

ලිංගික ගොදුරු බවට පත්ව ජීවත් වීමට වරම් ලද පිරිස් සොයා ඔවුන්ගේ කටුක අත්දැකීම් ලොවට හඬ ගා පවසනු වස් ඇය ඉන්දියාව පුරා ඇවිද යන්නීය.

ඒ සඳහා ඇයට සෞඛ්‍ය සේවකයන්ගේ සහ රජයේ නොවන ආයතනවල සහාය ලැබෙති.

ඇගේ කැමරා කාචයේ සටහන් වූ බොහොමයක් දෙනා දැරියන්.

ලිපිය තුළ ඔවුන්ගේ නම් ගම් වෙනස් කොට ඇත්තේ අනන්‍යතාවය හෙළි නොකර සිටීමේ අරමුණින්.

2012 වසරේදී දිල්ලි සිසුවියක් බස් රථයක් තුළදී සමූහ දූෂණයට ලක් කොට ඝාතනය කිරීමත් සමග ස්ත්‍රී දූෂකයන්ට එරෙහිව පවතින නීති තර කොට ඔවුන්ට එරෙහිව දැඩි දඬුවම් ක්‍රියාත්මක කරන ලෙස ඉන්දීය ආණ්ඩුවට දැඩි පීඩනයක් එල්ල විය.

කෙසේ වෙතත් කාන්තාවන්ට සහ දැරියන් වෙත එල්ල වන ලිංගික ප්‍රචණ්ඩත්වය හා සම්බන්ධ සිදුවීම් ඉන්දියාවෙන් තවදුරටත් වාර්තා වේ.

2014 වසරේදී ඉන්දියාවෙන් වාර්තා වී ඇති ස්ත්‍රී දූෂණ සංඛ්‍යාව 35,000 කට අධිකයි.

මිනාලි වයස 13

Image copyright Smita Sharma

උතුරු ඉන්දියාවේ උත්තර් ප්‍රදේශ් ප්‍රාන්තයට අයත් මිනාලිගේ ගමට අසල්වැසි ගමක විසූ පුද්ගලයකු විසින් ඇය පැහැර ගනු ලැබිණි.

මුදල් බලය හිමි යාදව් වාර්ගික ජන කොට්ඨාශයට අයත් ඉහත කී පුද්ගලයා විසින් ඇය දූෂණයට ලක් කොට තිබුණේ මහාරාෂ්ට්‍රා ප්‍රාන්තයේ දුම්රියපොළක් අසලදීයි.

ගණිකා වෘත්තිය සඳහා විකිණීමට පෙර ජාවාරම්කරුගේ ග්‍රහණයෙන් මිදුණු ඇය දුම්රියපළ පොලිස් ඒකකයේ සහාය පතන්නීය.

ඇය වෙනුවෙන් පියවර ගනු වෙනුවට දින 12 ක් පොලිස් රැඳවුම් භාරයේ තබා ගනු ලබන මිනාලිට සිය පැමිණිල්ල ඉවත් කර ගන්නා මෙන් බලපෑම් එල්ල විය.

රිතිකා වයස 15

Image copyright Smita SharmaRedux

ශරීර කෘත්‍ය සඳහා වන ළැහැබක් වෙත ගිය රිතිකා නොනවත්වා නැවත නැවතත් දූෂණයට ලක් කොට ඇත්තේ ගම්වැසියෙක් විසින්.

ඒ 2011 වසරේදීයි.

රුධිරය වහනය වෙමින් සිටි රිතිකා ඇයගේ මව විසින් සොයා ගනු ලැබ ඇති අතර වහා පොලිස් ස්ථානය කරා ඇය රැගෙන ගොස් තිබේ.

නමුත් පැමිණිල්ල ලියා ගැනීම පොලිසිය ප්‍රතික්ෂේප කොට ඇත.

මානසික ආතතියෙන් පීඩා විඳින ඇය එතැන් පටන් මේ දක්වා වචනයකදු කතා කොට නොමැත.

ඉන්දියාවේ පිටිසර බද පෙදෙස්වල පිහිටි නිවෙස්වලින් 60% ප්‍රමාණයකට වැසිකිළි පහසුකම් නොමැති අතර ඒ හේතුවෙන් ලිංගික ප්‍රචණ්ඩත්වයට කාන්තාවන් ගොදුරු වීමේ ඉඩකඩක් ඇත.

විද්‍යා වයස 17

Image copyright Smita Sharma Redux

කුලයෙන් උසස් යැයි සැලකෙන බ්‍රහ්ම කුලයට අයත් පුද්ගලයකු විසින් විද්‍යා පැහැර ගනු ලැබුවේ පාසල නිම වී නිවස කරා පිය නගිමින් සිටින අතරතුරදීයි.

උත්තර් ප්‍රදේශ් ප්‍රාන්තයේ අසල පිහිටි පොකුණක් අසල දී ඇය දූෂණයට ලක් විය.

විද්‍යාගේ පවුලේ මැදිහත් වීමෙන් ඇය වෛද්‍ය පරීක්ෂණයකට යොමු කෙරුණු අතර සිදුවීම සම්බන්ධයෙන් පොලිසිය වෙත පැමිණිලි කිරීමටත් පියවර ගෙන තිබේ.

අපරාධකරු මේ දක්වා පොලිසිය මග හරිමින් සිටියි.

විද්‍යාගේ පාසල් ගමනට තිත තැබෙන්නේ ඇයට මුහුණ දීමට සිදු වූ කටුක අත්දැකීමෙන් ලද මානසික පීඩාව හේතුවෙන්.

කරිෂ්මා වයස 17

Image copyright Smita Sharma

2008 වසරේදී කරිෂ්මා දූෂණයට ලක් කෙරුණේ නිවසේ හිමිකරුගේ පුතු විසින්.

ඇය නිහඬව සිය වේදනාව සඟවා ගනු ලැබුවේ ලැජ්ජාව සහ බිය හේතුවෙන්.

නමුත් කරිෂ්මාගේ මව ඇය නිවසෙන් නෙරපා දමනු ලබන්නේ ඇය ගැබ් ගැනීමත් සමගයි.

තමා දූෂණයට ලක් කළ පුද්ගලයා හා විවාහ වන ලෙස ප්‍රදේශයේ දේශපාලන කණ්ඩායමක් ඇයට බලපෑම් එල්ල කරන්නේ ඉන් අනතුරුවයි.

දූෂකයා හා විවාහ වීම ප්‍රතික්ෂේප කළ ඇය බටහිර බෙංගාලයේ උපන් නගරය අතහැර සිය පුතු සමග කල්කටාව වෙත පැමිණ කොණ්ඩා සැකසුම් ශිල්පිනියක ලෙස රැකියාව අරඹයි.

නේහා වයස 20

Image copyright Samita Sharma

සිය ජනවර්ගයට අයත් පුද්ගලයකු අතින් වසර අටකට ඉහතදී දූෂණයට ලක් වන නේහාට ඔහු හා විවාහ වන ලෙස පවුලේ සාමාජිකයන් හා අසල්වැසියන් බල කොට තිබේ.

දූෂණයට ලක් වීමේ ප්‍රතිපලයක් ලෙස ඇය පුතකු බිහි කරන්නීය.

නමුත් ඇය සිය බිරිඳ වශයෙන් පිළිගැනීම ප්‍රහාරකයා විසින් ප්‍රතික්ෂේප කරනු ලබයි.

ඔහු අධිකරණය වෙත පමුණුවනු ලබන්නේ සිදුවීමෙන් වසරකට පසු ඇය ඒ පිළිබඳ පොලිසියට පැමිණිලි කිරීමෙන් අනතුරුවයි.

ස්වයං රැකියාවක නිරත ඇය දිනකට පැය දාසයක් සේවයේ යෙදෙන්නීය.

ඇයගේ සතියක අදායම ඉන්දීය රුපියල් හාරසියයක්.

වර්ෂා වයස 15

Image copyright Smita Sharma

ඉහත දැක්වෙන ඡායාරූපය කැමරා කාචයේ සටහන් වූයේ පොලිස් කාන්තාවක් විසින් වර්ෂා රාජ්මහල් නගරයේ දිස්ත්‍රික් අධිකරණය වෙත රැගෙන යමින් සිටින අතරතුරදීයි.

එහිදී ඇය සිය වේදනාබර කටුක අත්දැකීම විස්තර කිරීමට නියමිතයි.

වර්ෂා දූෂණයට ලක් කරනු ලැබූ පුද්ගලයා ඇයට නිහඬව සිටින ලෙස තර්ජනය කොට තිබේ.

ඇයගේ නිහඬතාව ප්‍රයෝජනයට ගත් අපරාධකරු ඇය නැවතත් දූෂණයට ලක් කරයි.

වර්ෂා තම වේදනාව පවුලේ සාමාජිකයන් හා පැවසීමෙන් අනතුරුව ඒ සම්බන්ධයෙන් පොලිසියට පැමිණිලි කරයි.

(BBC News වෙබ් අඩවියේ පළ වූ වාර්තාවක් ඇසුරෙන්)

මේ පුවතට සම්බන්ධ තවත් විස්තර