Trump oo cunoqabatayntii "ugu cuslayd" ku soo rogay Kuuriyada Woqooyi

Madaxweyne Trump Lahaanshaha sawirka Reuters
Image caption Madaxweyne Trump

Maraykanka ayaa shaaciyey arin uu Madaxweyne Trump ku tilmaamay in ay tahay cunoqabatayntii ugu cuslayd ee weligeed lagu soo rogo Kuuriyada Woqooyi, taas oo qayb ka ah tallaabadii ugu dambaysay ee lagu joojinayo barnaamijkeeda nukliyeerka.

Cunoqabatayntaasi waxay beegsanaysaa shirkadaha shisheeye iyo maraakiibta ay Washington sheegtay in ay xidhiidh ganacsi la leeyihiin Pyongyang.

Cunaqabatayntan waxa la shaaciyey saacado uun ka dib markii Madaxweyne Trump inantiisa Ivanka ay tagtay Kuuriyada Koonfureed, halkaas oo ay kaga baaqday in cadaadis wayn la saaro Kuuriyada Woqooyi.

Waxa ay halkaa kaga la qayb galaysaa saraakiil ka socda Kuuriyada Woqooyi xafladda xidhitaanka ciyaaraha olombigga ee xiliga qaboobaha oo dalkaa ka socday.

Ka qayb galka saraakiisha ka socda Kuuriyada Woqooyi ee xafladaasi waxay daba socotaa xidhiidhka labada dal oo soo yara fiicnaanaya, kaas oo ay sabab u noqotay ka qayb galka Pyongyang ee ciyaarahaa olombiggu.

Mowduucyada la xiriira