Dil laga been abuuray wariya caan ah oo lagu badbaadiyay dad badan

.
Qoraalka sawirka,

Wariyahan ayaa markii dambe kasoo muuqday shir jaraa'd oo uu ku qabtay Kiev

Arkady Babchenko oo ah wariye u dhashay dalka Ruushka ayaa indhaha caalamka qabsaday dhamaadkii bishii May, kadib markii isaga iyo laamaha ammaanka ee dalka Ukraine ay ka been shegeen dhimashadiisa.

Arkady ayaa wuxuu ka shekeeyay wixii xiligaasi dhacay, isagoo tilmaamay in nin katirsanaa mad-habta qibdiyiinta oo lagu magacaabo Oleksiy Tsymbaliuk uu qeyb ka ahaa qorshaha ay malegeen ciidammada ammaanka ee Ukraine, kaasi oo ay shegeen in looga hortagayay dilal qorsheysnaa.

Qoraalka sawirka,

Ninka loo igmaday dilka

Ciidammada Ukraine ayaa sheegay in ay arrintan ay u sameyeen, si loo fashiliyo doorka Ruushka uu ku leeyahay dilalaka qorsheysan ee ka dhanka ah siyaasiyiinta mucaaradka ee kasoo horjeeda.

Dhammaadkii bishii May ayay aheyd markii warka ku saabsan in wariye Arkady Babchenko oo ahaa nin aad u dhaliila siyaasadda madaxweyne Putin la sheegay in la dilay, waxaana laga warhelay isagoo ku dhexjira barkad lagu qubeysto oo ku taala guri uu ka degenaa magaalada Kiev ee dalka Ukraine.

Xiliga la sameynayay dilka been abuurka ah waxaa warbaahinta caalamka qabsaday sun la siiyay nin u dhashay dalka Ruushka iyo gabar uu dhalay oo lagu sumeeyay magaalada Salisbury ee dalka Ingiriiska, taasi oo keentay in dadku ay u fasirtaan in arrintan uu Ruushka ku lug leeyahay.

Saacado uun ka dib, dhimashada laga been abuuray ee wariyaha ayaa waxaa ku kadsoomay golaha ammaanka ee Qaramada Midoobay oo ka hadlay, waxaase la yaab noqotay markii ra'iisulwasaraaha Ukraine uu dalka Ruushka ku edeeyay dilka weriyaha, taasi oo markii dambe wajigabax ku noqotay xukuumadda dalkaasi, kadib markii wariye Arkady uu ka soo muuqday shir jaraa'd isagoo badqaba.

Haddaba baaritaan ay BBC-du ku samaysay arrintan ayaa lagu ogaaday waxyaba badan oo ku saabsan qaabka ay wax u dhaceen.

Haddii uusan aheyn Oleksiy Tsymbaliuk, waxay u muuqan laheyd in la dili lahaa wariye Arkady Babchenko oo lagaba yaabo in loo adeegsan lahaa dad kale oo khaarajiya.

Horrantii sannadkan ayaa Oleksiy Tsymbaliuk waxaa la soo xiriiray ninka sawirkiisu uu hoos ka muuqda oo ay horay isu yaqaaneen, kaasi oo ka tirsanaa shirkad sameysa hubka oo lagu magacaabo Borys Herman.

Qoraalka sawirka,

Ninka maleegayay dilka

Wuxuu sheegay in ninkan uu ka dalbday inuu dilo dhowr qof oo uu sheegay inay yihiin dad cadaw ah, waxaana intaa loo raaciyay in dhaqaalihii lagu fulin lahaa dilalka ay diyaar yihiin.

Oleksiy Tsymbaliuk oo fahansan xaaladda ayaa isagoo muusoonaya wuxuu aqbalay dalabkii, waxaana markii dambe uu maclumaadka ku saaban arrintan uu la wadaagay laamaha ammaanka ee dalka Ukraine.

Hasayeshee ciidammada Ukraine ayaa iyagoon cidna la wadaagin arrinkan waxay go'aansadeen inay sameyaan qaab lagu been abuuri karo dilka mid kamid ah dadka la bartilmaameedsanayay, si loo soo qabto kuwa raba inay dilka geystaan iyo qorshahooda.

Booliska dalkaasi ayaa markii dambe waxay xiriir dhaw la sameyeen ninka loo soo igmaday inuu wax dilo, si loo ogaado waxay damacsanyihiin.

Markii uu soo baxay warka sheegaya in wariyihii la dilay ayaa ninka loo igmaday inuu dilka fuliyo waxaa uu farriin qoraaleed u diray ninkii maleegayay dilka, isagoo na u sheegay inuu fuliyay dilka, waxaana qorshuhu ahaa inay kulmaan isaga iyo Oleksiy, si looga wada hadlo waxa hagaagay iyo qorshaha xiga ee lagu khaarajinayo dhowrka qof ee kale.

Meel katirsan magaalada Kiev ayay ku ballameen, hasayeshee Oleksiy Tsymbaliuk ayaa ku wargeliyay ciidammada SBU-da ee Ukraine waxa dhexmaray isaga iyo ninka ay ballameen.

Booliska Ukraine ayaa markii dambe gacanta kusoo dhigay ninka hoos idiin muuqda ee doonayay in la dilo dhowrka qof, waxaana sidaasi lagu badbaadiyay dhowr qof oo qorshuhu ahaa in la dilo, iyadoo la adeegsnaayo dad kale.

Qoraalka sawirka,

Ninka maleegaya dilka ee la qabtay