Laacibka kooxda Leicester City iyo xulka Aljeeriya, Riyad Mahrez, ayaa ku guulaystay laacibka Afrika ee CAF

Mahrez ayaa sidoo kale ku guulaystay abaalmarinta BBC ee laacibka Afrika ugu wanaagsan Lahaanshaha sawirka Getty Images
Image caption Mahrez ayaa sidoo kale ku guulaystay abaalmarinta BBC ee laacibka Afrika ugu wanaagsan

Weeraryahanka kooxda kubadda cagta ee Leicester City iyo xulka Aljeeriya, Riyad Mahrez, ayaa ku guulaystay abaalmarinta Xiriirka Kubadda Cagta Afrika CAF ee ciyaaryahanka ugu wanaagsan qaaradda.

25-jirkan, ayaa xagaagii tegay ka caawiyay kooxda Leicester inay ku guulaysato Horyaalka Ingiriiska, horayna waxa uu ugu guulaystay laacibka Horyaalka Ingiriiska, sidoo kalana waxa uu qaaday billada BBCda ee ciyaaryahanka ugu wanaagsan Afrika.

Weeraryahanka kooxda Borussia Dortmund iyo xulka Gabon, Pierre-Emerick Aubameyang, ayaa soo galay kaalinta labaad, halka kaalinta saddexaad uu soo galay laacibka kooxda Liverpool iyo xulka Senegal, Sadio Mane.

Riyad Mahrez oo loo caleemo saaray cayaaryahanka Afrika ee BBC 2016

Weeraryahanka kooxda Arsenal iyo xulka Nigeria, Alex Iwobi, ayaa ku guulaystay abaalmarinta ciyaaryahanka da'da yar ee Afrika.

Ninka ay isku dalka ka soo jeedaan ee u safta kooxda Manchester City, Kelechi Iheanacho, ayaa isna u tartamayay billadaasi.

Lahaanshaha sawirka Getty Images
Image caption Denis Onyango oo reer Yugaandho ah ayaa noqday ciyaaryahanka ugu wanaagsan Afrika ee naadi Afrika ka dhisan u dheella

Denis Onyango oo 31 jir ah una dheella naadiga Mamelodi Sundown oo ka dhisan dalka Koonfur Afrika ayaa ku guulaystay abaalmarinta ciyaaryahanka ugu wanaagsan Afrika ee ka dheela Afrika gudaheeda.

Dhanka gabdhahana Asisat Oshoala oo 22 jir ah una dhalatay dalka Nigeria ayaa ku guulaysatay abaalmarinta gabadha ugu ciyaar wanaagsan Afrika ee sanadka.

Xiriirka Kubadda Cagta Afrika ee magaciiisa loo soo gaaabiyo CAF ayaa sidoo kale shaaaciyay tobanka ciyaaryahan ee ugu wanaagsan Afrika waxayna kala yihiin

1. Denis Onyango ( Uganda)

2. Serge Aurier ( Ivory Coast)

3. Joyce Lomalisa ( DR Congo)

4. Eric Bailly ( Ivory Coast)

5. Aymen Abdennour (Tunisia)

6. Keegan Dolly (South Africa)

7. Khama Billiat (Zimbabwe)

8. Rainford Kalaba (Zambia)

9. Pierre-Emerick Aubameyang ( Gabon)

10. Riyad Mahrez ( Algeria)

11. Sadio Mane (Senegal)