Wiil kaalin muhiim ah u buuxiyay xulka qaranka Soomaaliya

Bidix Axmed Cali Maxamed Kabtanka xulka qaranka iyo Siciid Cabdi Haybe Lahaanshaha sawirka SACIID
Image caption Bidix Axmed Cali Maxamed Kabtanka xulka qaranka iyo Siciid Cabdi Haybe oo dhinaca midigga xiga

Xulka qaranka Soomaaliya ayaa guul naadir ah ka gaaray isreebreebka loogu soo baxayo Koobka Adduunka. Waxay Soomaaliya 1-0 kaga badisay xulka Zimbabwe ka dib markii ay Jabuuti ku kulmeen.

Arrintan ayaa horseeday in la iswaydiiyo waxa xulka qaranka Soomaaliya iska badalay.

Dadaallada xulka qaranka ka muuqda waxaa ka mid ah in lagu xoojiyay dhallinyaro xirfad leh oo qurbaha ku nool, sida uu BBC-da u sheegay Siciid Cabdi Haybe oo xiriirka kubbadda cagta u qaabilsan soo arruurinta dhallinyarada Soomaaliyeed ee qurbaha ku nool.

Waa kuma Siciid Cabdi Haybe

"Waxaan ahaa qof mar walbe jecel ciyaaraha, kana qayb qaata ciyaaraha kubbada cagta, markaas ayaan jeclaystay in aan ka sameeyo waxbarasho heer jaamaceed ah si aan shaqsi ahaan horumar u gaaro, dhallinyarada Soomaaliyeedna u caawiyo". Ayuu yiri Siciid oo waraysi siiyay laanta Afka Soomaaliga ee BBC.

Siciid oo Britain ku noolaa ayaa sheegay in uu ku dhaqaaqay rabitaankiisa waxbarasho.

"Jaamacad ayaan billaabay waxaana bartay maamulka ciyaaraha iyo tababarka ciyaaraha, intaas ka dibna waxaan go'aansaday in aan matalo ciyaartoyda" ayuu yiri Siciid.

Go'aankaas ayaa u horseeday in uu aruuriyo oo dabo galo macluumaadka dhallinyarada Soomaalida ah ee qurbaha ka ciyaara.

Intii uu macluumaadkaas arruurinayay ayayna u soo baxday in dhallinyarada Soomaaliyeed ee xirfadda leh ay u baahan yihiin qaran ay u dheelaan si dunida looga barto, qaranka Soomaaliyeedna uu u baahan yahay dhallinyarada xirfadda leh ee dunida kaga baahsan.

"Maalin aniga oo Holand jooga oo ciyaar fiirsanaya ayaan Oday Soomaali ah ku iri , dhallinyaradan qaran ayay u baahan yihiin, nasiib wanaag wuxuu igu yiri gudoomiyaha xiriirka kubbada cagta ayaan aqaannaa ee ma iskiin baraa, anigana haa ayaan ku iri,"

"Sidii ayuu isu kaana baray, ka dib gudoomiyaha ayaan kulannay waxaana u sheegay in aan ku shaqaysto matalaadda ciyaartoyda (agent) markii aan la wadaagay macluumaadka aan hayana wuu isoo dhaweeyay." Ayuu intaas ku daray.

Saamaynta ciyaartoyda qurbajoogta

Xulka Soomaaliya ayaa Jabuuti kaga badiyay dalka Zimbabwe, arrinta xiisaha badan ayaana ah in 11-kii ciyaartooy ee lagu billaabay ay 10 ka mid ah ka yimaaddeen qurbaha.

"Gool hayaha marka laga reebo tobanka kalaba qurbaha ayaa laga soo aruuriyay" ayuu yiri Siciid.

Lahaanshaha sawirka XKC SOOMAALIYA
Image caption Xulka qaranka Soomaaliya

Dalalka ay ka kala yimaadeen ciyaartoyda qurbajoogta ah

Fahad Ismaciil (Britain)

Abel Gigli Maxamed (Talyaaniga)

Cumar Maxamed (Maraykan)

Cabdi Maxamed (Maraykan)

Yoonis Faarax (Norway)

Axmed Cali (Qadar)

Mohamud Ali (Britain)

Maxamed Abuukar (Britain)

Cabdicasiis Yuusuf (Canada)

Axmed Siciid (Finland)

Cabdulsamed Cabdullaahi (Holland)

Xuseen Maxamed (Finland)

Dhallinyaradaas qurba joogta ah ayaa lagu soo xulay dal jacayl iyo xirfad sida uu BBC-da u sheegay Siciid Cabdi Haybe.

"Dhallinyaradan xirfaddoodu waa heer sare kooxo heerar kala duwan ka ciyaara ayayna ka tirsan yihiin, marka dhallinyaradu dhammaantood waxay diyaar u ahaayeen in ay calankooda iyo dalkooda matalaan". Ayuu intaas ku sii daray.

Algeria oo ku guulaysatay koobka qaramada qaaradda Afrika waxay ku faa'iiday dhallinyaradii dibadaha ka ciyaaraysay ayuu yiri Siciid oo xoojinaya faa'iidada qurbajoogta.

"Xulkii Algeria ee 23ka ka koobnaa hal mid oo kali ah ayaa ka dheelayay gudaha dalkooda." Ayuu intaas ku sii daray.

Siciid ayaase aad u ammaanay dhallinyarada gudaha Soomaaliya ka timid wuxuuna sheegay in uu rajaynayo in uu suuq u raadiyo oo ay iyaguna dibadda ka ciyaari doonaan.

Doorka dalka Jabuuti

Qaar ka mid ah waalidka dhalay ciyaartoyda qurba joogta ah ayaa u cabsaday ammaanka carruurtooda markii ay maqleen in xulka qaranku uu ku qancay xirfadooda.

Balse markii ay u caddaatay in aan Muqdisho lagu qabanayn ee ay Jabuuti ku ciyaarayaan ayay aad u farxeen ayuu yiri, Siciid.

"Jabuuti si wanaagsan ayaa naloogu soo dhaweeyay, marti in aan nahayna ma aanan dareemin ee ciyaartoy dalkoodii ku dheelaya oo kale ayaan ahayn" ayuu intaas ku sii daray.

Mowduucyada la xiriira