Qaraxyada ka dhacay magaalada Kampala

Makhaayadda
Image caption Makhaayadda qraxu ka dhacay

Masuuliyiinta waddanka Uganda ayaa xiray tiro dad ah oo lala xiriirinayo weeraradii bam ee axaddii lagu qaaday magaalada Kampala, oo ay ku dhinteen in ka badan 70 qof.

BBCSomali Facebook

Xiritaanka dadkan ayaa yimi kadib markii laga helay magaalada, suun kuwa la isku qarxiyo ah oo aan qarxin.

Xarakada Shabaab ayaa sheegatay inay qaaday weerarada qaraxyada ee ka dhacay magaalada Kampala ee waddanka Uganda, oo ay ku dhinteen in ka badan toddobaatan qof, ilaa sideetan kalena ay ku dhaawacmeen.

Cod duuban oo ay ka soo saareen magaalada Muqdisho, ayaa Afhayeenka Shabaab uu sheegay in kooxdoodu weerar ku qaadeyso cadawgooda meel walba oo uu joogo.

Afhayeenka Shabaab, Shiikh Cali Maxamuud Raage, ayaa waxa ku tilmaamay qaraxyada ka dhacay Kampala inay yihiin bilow, isagoo ugu hanjabay dalalka Uganda iyo Burundi in haddii ay ciidamadooda kala bixi waayaan Soomaaliya ay la kulmi doonaan dhibaato kale.