Laftagareen oo Kismaayo gaaray

BBCCopyright: BBC

Waxaa lagu soo warramayaa in ugu yaraan 6 qof ay abaar darteed ugu dhinteen gobolka Mudug ee dowlad goboleedka Galmudug ee Soomaaliya.

Abaartani ayaa sidoo kale galaafatey duunyadaba halkaasi kunooleyd.

Shacabka ayaa u qaxay deegaanada qaar oo ay ka da’een roobab yar, inkastoo la sheegay inaysan ku filnayn biyaha iyo baadka.

Guddoomiyaha gobolka Mudug ee dowlad goboleedka Galmudug, Cabduraxmaan Cali Diiriye (Isxal), ayaa ku nuux nuux sadey abaarta sanadkani dhacdey iney tahay mid waxyeello weyn u geysatey dad iyo duunyaba.

FacebookCopyright: Facebook

Guddoomiyaha Guddiga Doorashada ee Heer Federal ee dalka Soomaaliya, Maxamed Xasan Cirro, ayaa maanta sheegay in daahitaanka doorashooyinka ay yihiin kuwo awooddooda ka baxsan.

Wuxuu intaa ku darey in haddii doorkooda la siiyo odayaasha wax xulaya, iyo guddiyada u xil saaran doorashada natiijo wanaagsan la gaaari karo.

Cirro wuxuu kaloo ka hadlay hufnaanta doorashada, isagoo ku nuux nuux sadey iney muhiim tahay in nidaamka doorashada loo dajiyey la raaco.

Doorashada dadban ee Soomaaliya, ayaa waayadii ugu danbeeyey waxaa lasoo gudboonaadey jiitan, iyadoo xiliyo tiro badan oo hore ay marar kala duwan dib uga dhacdey waqtiyo loo asteeyey iney bilaabato doorashada.

FacebookCopyright: Facebook

Guddiga Xalinta Khilaafaadka Doorashooyinka Dadban, ayaa go'aan ka gaarey kursiga tirsigiisu yahay HOP 067, kadib cabasho loo soo gudbiyey.

Guddiga ayaa sheegay iney u caddaatey in dacwadda uu soo gudbiyey murashax Axmad Cabdikariin Cali, ay tahay arrin ku saabsan hab qeybsiga beeshaasi, oo ay tahay arrin ka baxsan awoodda Guddiga xalinta khilaafaadka.

Waxey dhanka kale sheegeen iney u caddaatey in dacwadda uu soo gudbiyay nabadoon Cali Xassan Cali aanu aheyn, saxiixihii rasmiga ahaa ee soo xulay ergadii soo dooratay kursigaHOP 067 sanadka 2016-kii.

Sidoo kale, nabadoon Cali Xasan, ayaanan kamid ahayn odayaasha dhaqanka ee ka diiwaan gashan wasaaradda arrimaha gudaha ee maamul Goboleedka Galmudug ee dalka Soomaaliya.

Sidaa daraadeed, Guddiga Xalinta Khilaafaadka, ayaa soo saarey qodobkan:

In hanaanka loo maamuley doorashadii kursiga summaddiisu tahay HOP067, uu yahay mid waafaqsan habraacii loo dajiyey doorashooyinka dadban, sidaasi darteedna uu yahay mid sax ah, oo aan dib looggu noqon doonin.

NationCopyright: Nation

Kenya ayaa diiwaan gelisay kiisaskii ugu horreeyey ee Korona fayraska cusub ee Omicron oo laga helay qof safar ahaa, sida uu sheegay wasiirka caafimaadku.

Mutahi Kagwe ma uusan shaacin tirada kiisaska ee la ogaaday ilaa iyo hadda.

Warkan ayaa imaanaya saacado uun ka dib markii uu sheegay in aysan dalka Kenya ka jirin kiisas la xiriira noocaan cusub, inkastoo kiisaska Korona fayrasku ay sare u soo kacayaan.

Dadka shacabka ah ayaa sidoo kale ku warramaya in kiisaska hargabka ee dalka ka jira ay sare u keceen.

Dadka laga helayo cudurka Covid-19 ee dalka Kenaya ayaa laba jibbaarmay, waxaana Talaadadii oo kaliya la diiwaan geliyey 331 kiis oo cusub, waana tiradii ugu badnayd ee waayadaan la diiwaan geliyo.

Wadarta guud ee kiisaska Covid-19 ayaa joogta 256,815 oo ay ku jiraan 5,349 oo dhisho ah.

Dowladda ayaa ku baaqaysa in dadku ay tallaalka qaataan.

Maxkamad ku taal Kenya ayaa Talaadadii hakisay amarkii dowladda ee ahaa in dadka aan la tallaalin laga mamnuuco inay helaan adeegyada laga bilaabo 21ka December.

BBCCopyright: BBC

Simon Odo, oo loo qayaan "Boqorkii Shaydaanka", ayaa geeriyooday asagoo da’diisu ahayd 74, sida uu xaqiijiyey wiilkiisa Uchenna Odo.

Mr Odo ayaa sheegay in aabbihiis uu geeriyooday arooryadii hore ee Talaadadii , ka dib markii uu muddo yar xanuunsanaa.

“Wuu geeriyooday” ayuu Arbacadii BBC Igbo ugu sheegay Khadka teleefoonka. “waxaan doonaynaa in aan aasno” ayuu intaa raaciyey.

Simon Odo ayaa ka soo jeeday tuulada Aji ee ku taal gobolka Enugu ee Nigeria, halkaas oo uu ka ahaa wadaad sare oo caan ah.

Mar uu waraysi siiyey BBC Igbo sannadkii 2020, waxa uu sheegay in 57 haween ah uu guursaday isla markaana ay carruurtiisu tiro beel noqdeen.

Waxa uu sheegay in uu shaydaannimada ka dhaxlay waalidkii iyo awoowayaashii balse waxa uu ku adkeystay in uusan caawin qof kasta oo raadiya sidii uu u dhibaateyn lahaa dadka kale ee la nool.

Mr Odo ayaa BBC-da u sheegay in uu xirfaddiisa ku dhammeeyay dhir-beerista magaalada Ijebu Ode ee gobolka Ogun, halkaas oo uu u aaday si uu dawo ugu raadiyo xanuun la yaab leh oo muddo dheer hayey.

BBCCopyright: BBC

Madaxweynaha maamul goboleed Koonfur Galbeed, Cabdicasiis Laftagareen, ayaa markii ugu horraysay intii uu madaxweynaha ahaa booqasho ku tagay magaalada Kismaayo. Waxaana halkaa ku soo dhaweeyey dhiggiisa Jubaland Axmed Maxamed Islaam.

Safarka Laftagareen ayaa imaanaya ayadoo ay socoto doorashada aqalka hoose ee baarlamaanka Soomaaliya oo Jubbaland ay shaacisay qaar ka mid ah kuraasta aqalka hoose.

Labada madaxweyne ayaa la filayaa in ay ka wada hadlaan arrimaha doorashada, ayadoo Maraykanku uu madaxda maamul goboleedyada ugu baaqay in ay dar dar geliyaan doorashada oo ay waqtigeeda ku dhacdo.

Madaxweynaha Jubbaland ayaa asna dhankiisa aan tagin Baydhabo intii uu madaxweynaha noqday Cabdicasiis Laftagareen.

Getty ImagesCopyright: Getty Images

Maxkamad ku taal Koonfur Afrika ayaa xukuntay in xabsiga dib loogu celiyo madaxweynihii hore ee Koonfur Afrika Jacob Zuma, ayadoo sheegtay in siidayn sharafeedkiisa caafimaad ay tahay “sharci darro”

Muddada uu xabsiga ka maqan yahay waa in aan lagu tirin 15-ka bilood ee lagu xukumay, ayay go’aamisay maxkamaddan oo ku taal Pretoria.

Mr Zuma ayaa la sii daayey 5-kii September xaalad caafimaad oo aan la shaacin awgeed.

Zuma ayaa xabisga loogu xukumay sababo la xiriira in markii uu madaxweynaha ahaa uu ka jaabi waayey baaritaan la xiriiray musumaasuq.

79-jirkan ayaa bishii July isu dhiibay booliiska ka dib markii ay dadweynuhu is-hortaageen, balse xarigiisa oo uusan jirin madaxweyne uga horreeyey ayaa dhaliyey rabshado bililiqo watay.

BBCCopyright: BBC

Safaaradda Soomaaliya ee Muqdisho ayaa siyaasiyiinta Soomaalida ugu baaqday in ay dar dar geliyaan doorashada dalka.

Safaaradda oo si gaar ah ula hadashay madaxda maamul goboleedyada ayaa sheegtay in loo baahan in laga baaqsado dib u dhac kale oo doorashada ku yimaada, dhanka kalena ku baaqday in la dadajiyo doorasho caddaalad ku dhisan, hufan, loo wada dhan yahay isla markaana waqtigeeda ku dhacda.

Baaqaan ayaa ku soo aadaya ayadoo liiskii ugu horeeyay ee musharaxiinta kuraasta aqalka hoose uu shalay soo saaray maamulka Jubbaland.

Kuraasta oo lambaradood oo kali ah la soo saaray oo aysan magacyo la socon ayaa waxaa ay ka kooban yihiin 14 kursi.

Talabadan maamulka Jubland ayaa ku soo beegmaysa xilli ay dorraad guddiga doorashada ee heer federaal ugu baaqeen maamulada Hirshabele, Jubaland iyo Puntland in ay bilaabaan doorashada aqalka hoose.

BBCCopyright: BBC

Suudaan ayaa ciidamo badan soo dhoobtay xadka ay ku muransan yihiin iyaga iyo Itoobiya, iyadoo ku dhawaaqday in ay si buuxda ula wareegtay gacan ku haynta deegaannada lagu muransan yahay, iyadoo ay jirto xiisad ka dhaxaysa Khartoum iyo Addis ababa.

Ciidanka ayaa farriin u diray dadka shacabka ah, iyaga oo u sheegay in ay isdajiyaan oo guryahooda ay nabad ku joogaan.

Sudan ayaa 1-dii Diseembar sheegtay in ciidamadeedu ay gacanta ku dhigeen saldhig ay ku sugnaayeen ciidamada Itoobiya oo ku yaal degmada al-Fashaga ka dib markii ay rasaas iswaydaarsadeen labada ciidan.

Arrintaan ayaa timid ka dib markii la sheegay in 21 ka tirsan ciidamada Sudan lagu dilay 30 kalena lagu dhaawacay ka dib dagaal 27-kii November iyaga iyo ciidamada Itoobiya ku dhexmaray deegaanka Birkat Nourain ee ka tirsan degmada al-Fashaga.

Dagaalkan soo cusboonaaday ayaa sababay in hoggaamiyaha militariga Sudan, Gen Abdel-Fattah al-Burhan, uu wacad ku maro in dalkiisu uusan “hal taako” oo dhul ah uga tanaasulayn Itoobiya.

AyaanleCopyright: Ayaanle

Magaalada Hargeysa ayaa lagu kala iibsaday sawir gacmeed ka hadlaya nolosha carruurta darbi jiifka ah ee aan hoyga haysan.

Waa markii ugu horraysay ee sawir gacmeed lacag kun dólar ku dhow lagu kala iibsado magaalada Hargaysa.

Ayaanle Axmed Cabdi oo ku magac dheer Ayaanle LK waa ninka sawir gacmeedka sameeyey, wuxuuna sheegay in lacagta ka soo xaroota lagu caawin doono carruurta darbi jiifka ah.

"Habeen dhawayd ayaan dhaxan dareemay oo xammili kari waayey, markaa waxaan ka fekaray ciyaal yaryar iyo dadyaw ila mid ah oo meel ay ku hoydaan aanay jirin, bal inaan dadkaa sawir ka sameeyo. Sawirkaasna aan gadi karno, lacagta ka soo baxdana aan ku taageeri doonno dadyawgaas iyo waxay kaga gaashaantaan dhaxanta."

Sawirkan ayaa lagu baahiyey baraha bulshada, waxaan gadatay shirkad gaar ah oo lagu magacaabo Soomar Online oo siisatay lacag gaadhaysa 7 milyan oo shillinka Somaliland ah taas oo u dhiganta 800 oo dollar.

Getty ImagesCopyright: Getty Images

Dawladda Ingiriiska ayaa sheegtay in dhammaan 11-ka waddan laga saarayo liiska cas ee UK laga bilaabo 4-ta subaxnimo Arbacada.

Dalalka liiska ku jiray ee haatan xayiraadda laga qaaday waxaa ka mid ah Angola, Botswana, Eswatini, Lesotho, Malawi, Mozambique, Namibia, Nigeria, South Africa, Zambia iyo Zimbabwe.

Liiska cas ayaa dib loo soo celiyay dabayaaqadii November si looga hortago korona fayraska cusub ee Omicron.

Laakiin Xoghayaha Caafimaadka UK Sajid Javid ayaa sheegay in fayrasku uu haatan si guud u faafay sidaas darteedna aysan sii jri karin sabab xayiraadaha loo sii wado.

Asalaamu Caleykum.

Kulanti wacan kusoo dhawaada tebinta tooska ah oo aan idiin kuugu soo gudbinno wararkii ugu dambeeyay soomaalida iyo caalamka.