Trump iyo Putin oo ku heshiiyay sidii loola dagaalami lahaa kooxda IS

Vladimir Putin iyo Donald Trump Lahaanshaha sawirka EPA
Image caption Vladimir Putin iyo Donald Trump

Madaxwaynaha Ruushka Vladimir Putin iyo dhigiisa Mareykanka Donald Trump ayaa isku afgartay qoraal ku saabsan sidii looga adkaan lahaa kooxda la baxday dowladda Islamka.

Warkan waxaa shaaciyay aqalka Kremlin-ka Ruushka looga arrimiyo.

Madaxweynaha wadanka Ruushka iyo dhigiisa Mareykanka Donald Trump ayaa si kooban u kulmay xilli ay ka wada qeyb galayeen shirka iskaasiga dhaqaalaha ee wadamada Aasiya oo ka dhacaya wadanka Vietnam.

Labada dhinac ayaa ansixiyay bayaan ay soo diyaariyeen khubaro labada dhinac ka socotay kaasi oo ku saabsan colaada wadanka Suuriya.

Af-hayeen u hadlay aqalka Kremlin-ka ee dalka Ruushka ayaa arrintaasi u xaqiijiyay wakaalada waraarka ee Interfax .

Interfax ayaa sidoo kale ku soo warrantay in labada madaxweyne ay si kooban u wada hadleen xili ay ku sii jedeen goob lagu sawirayay madaxda ka soo qeyb gashay shirkaasi.

Waxaa kullankaasi ka sii horeeyay kullan kale oo ay yesheen xoghaya arrimaha dibadda ee Mareykanka Rex Tellerson iyo dhigiisa Ruushka, Sergey Lavrov sida ay wakaalada u sheegeen ergo ka socotay Ruushka.

Madaxwayne Putin iyo dhigiisa Mareykanka Trump ayaa markii ugu horeysay yeeshay kulan fool ka fool ah bishii July markaasi oo ay ka wada qaybgaleen kulankii wadamada G20 ee ka dhacay Jarmalka.