Itoobiya oo siidaynaysa 2,000 oo maxaabiis ah

Khariirad

In ka badan 2,000 oo maxaabiis ah ayaa xabsiga laga siidaynayaa gobolka Oramiya ee dalka Itoobiya.

Qaar badan oo ka mid ah maxaabiistan ayaa la xiray ka dib markii ay dhigeen dibadbax ay uga soo horjeedeen dowladda.

Arrintan ayaa ku soo beegmaysa toddobaad ka dib markii xabsiga heer fedaraal laga siidaayay maxaabiis uu ka mid ahaa hogaamiyaha mucaaradka ee Merera Gudina.

Maxaabiista maanta cafiska loo fidyay ayaa dhammaantood waxa lala xiriirinayay rabshadihii iyo dibadbaxyadii ka dhacay gobolka Oramiya.

Teshome Girma, oo ah madaxa cadaalada gobolka Oramiya ayaa arrintan u xaqiijiyay warbaahinta.

Maxaabiista xabsiga laga siidaayay ee maanta la shaaciyay ayaa tiradooda waxaa lagu sheegay 2,345.

Dhammaan maxaabiistani ayaa waxaa cafis u fidiyay madaxwaynaha gobolka , waxaana la siidayn doonaa ka dib marka ay qaataan tababar dhaqancelin ah.

  1. Maxaabiis Itoobiya ay soo daysay oo Muqdisho gaaray
  2. Maamulka Oramayi oo ka hadlay isku dhacyadii dhexmaray Soomaalida iyo Oramada
  3. Qalbi Dhagax muxuu u gilgiley quluubta Soomaalida?

In ka badan 1,500 oo ka mid ah dadka liiska ku jira ayaa horey dambiyo lagu helay islamarkana la xukumay.

Maxaabiista kale ayaa wali waxa ay sugayeen in maxkamad la soo taago.

Liiska maxaabiista la siidaayay wali lama shaacin , balse madaxa cadaaladda ee gobolka Oramiya ayaa sheegay in maxaabista la siidaynayo aysan ku jirin kuwa dil gaystay amaba dhibaato kale gaystay xilligii dibadbaxa.

Waxa uu intaa ku daray in sidoo kale maxaabiista la cafinayo aysan ku jirin kuwa burbur u gaystay hantida dowladda amaba kaabayaasha daqaalaha.

Go'aankan cafinta maxaabiista Oramaiya ayaa lala xiriirinayaa tillaabadii xisbiga haya talada dalkaasi ay ku dhawaaqeen ee ahayd in maxabiis la siidaynayo sida uu xaqiijiyay madaxa cadaalada.

Gobolka Oramiya ayaa ahaa gobol ay ka dhaceen dibadbaxyadii ugu xumaa sanooyiinkii ugu dambeeyay .

Tobonaan kun oo qof ayaa la xiray ka dib dibad baxyadaasi.

Mowduucyada la xiriira