Tirinta codadka doorashada Sierra Leone oo bilaabatay

Wareegga labaad ee doorashada Sierra Leone Lahaanshaha sawirka Getty Images
Image caption Wareegga labaad ee doorashada Sierra Leone

Waddanka Sierra Leone waxaa ka bilowday tirinta codadka wareegga labaad ee doorashada sida dhaw loogu loolamayay ee madaxtinimada.

Doorashadan ayaa la qabanqaabiyay kaddib markii wareegii koobaad ay musharaxiinta 16-ka ah ay ku guuldarreysteen in midkoodna uu aqlabiyad helo.

Goobaha codbixinta ayaa si nabad ah ku soo xirmay markii laga reebo dhacdooyin goonni goonni ah oo ka dhacay magaalada caasimadda ah ee Freetown.

Meel ka mid ah goobahaasi ayaa waxaa loo daadgureeyay ciidammo badan oo boolis ah si ay u kala kaxeeyaan taageerayaasha labada musharax, kuwaas oo isku haystay eedo ah saraakiil aanan ogolaansho haysan oo booqanayay goob dadka ay codkooda ka dhiibanayeen oo ku taal deegaanka Brookfields.

Deegaanka Lumley ee dhinaca shishe ee galbeed ee magaalada, ayaa waxaa laga maqlayay rasaas culus oo ay boolisku ridayeen kaddib markii la sheegay in goobta ay marayeen laba baabuur oo hub sidday.

Baangado ayaa waxaa laga dhex helay mid ka mid ah gawaaridaasi.

Afar qof oo laga shakisan yahay - oo dhammaantood ah taageerayaasha mucaaradka - ayaa xabsiga loo taxaabay.

Markii ay boolisku ku qaadayeen gawaaridooda ayaa waxa ay ku qaylinayeen waxaa naloo baacsanayaa waxa aannu rumeysannahay.

Waxaa aad u hoosaysay tirada dadka u soo baxay doorashada, oo goobaha qaar si tartiib tartiib ah ayey dadku u imanayeen.

Musharaxa mucaaradka Julius Maada Bio ayaa hoos u dhaca tirada waxa uu u aaneeyay inay ka dambeyso ciidammada badan ee la dhigay magaalooyinka.

Hasayeeshee madaxweynaha uu xilkiisa sii dhammaanayo Ernest Bai Koroma ayaa sheegay in tani ay caadi tahay markii la eego wareegga labaad ee doorashooyinka.

Natiijada doorashada ayaa lagu ogaan doonaa muddo todobaad ah, oo qofkii guulaystana waxaa lagu dhaarin doonaa 24 saacadood gudahood markii lagu dhawaaqo natiijada.

Waa markii ugu horreysay taariikhda Sierra Leone oo doorasho isxigta oo si dimuqraadiyad ah ku dhacday awoodda lagula kala wareego.

Mowduucyada la xiriira