Dad badan oo Kashmir lagu laayay iyo bandaw lagu soo rogay

Haweenay reer Kashmir ah oo ilmaynaysa iyada oo ku sugan aaska qof looga shakiyay malayshiyo Lahaanshaha sawirka Reuters
Image caption Haweenay reer Kashmir ah oo ilmaynaysa iyada oo ku sugan aaska qof looga shakiyay malayshiyo

Ugu yaraan 20 ruux ayaa dhimatay 70 kalana dhaawac ayaa soo gaaray ka dib markii uu dagaal adag dhexmaray malayshiyo iyo xoogagga dawladda Hindiya ee ku sugan qaybta ay Hindiya maamusho ee Kashmir, weerarkaasina wuxuu dhacay Axaddii.

Afar ruux oo shacab ah ayaa dhimatay ka dib markii ay booliisku rasaas ku fureen dad mudaaharaadaya oo dhagaxaan tuuraya, sida ay ku warrantay wakaaladda wararka ee AFP.

Saraakiisha ku sugan gobolka Kashmir een xasiloonayn ayaa sheegay in ay tahay dilkii ugu badnaa ee maalin gudaheed dhaca sannadihii dambe.

Kashmir waxaa saameeyay muran dhul oo u dhaxeeya Hindiya iyo Pakistan muddo tobannaan sano ahna dagaallo ayaa ka dhaca.

Shacabka marka laga soo tago waxaa kale oo geeriyooday ugu yaraan 3 askarta Hindiya ka tirsan iyo 13 ruux oo looga shakisan yahay in ay malayshiyada ka tirsanaayeen.

Qaar badan oo ka mid ah shacabka Kashmir ku nool waxay taageersan yihiin jabhadaha gooni ugoosadka raba, kuwaas oo doonaya in ay madaxbannaani helaan ama Pakistan ku darsadaan.

Mowduucyada la xiriira