Theresa May oo xildhibaanno hortagi doonta si su'aal looga waydiiyo weerarkii Suuriya

Theresa May Lahaanshaha sawirka Getty Images

Theresa May ayaa wajihi doonta xildhibaannada si ay uga jawaabto su'aalo ku saabsan duqaymihii dhanka cirka ahaa ee ay amartay in lagu qaado dawladda Suuriya.

Xisbiyada mucaaradka ah ayaa sheegay in ay ahayd in xildhibaannada lala tashado ka hor inta aysan UK ku biirin duqaynta Maraykanka iyo Faransiisku ay ku bartilmaameedsanayeen saddexda goobood ee Suuriya ku yaalla, arrintaas oo jawaab u ah weerarkii kiimikada looga shakiyay ee ka dhacay magaalada Duuma.

Xisbiga Shaqaalaha ayaa ku baaqay in la badalo shuruucda ka qaybqaadashada arrimaha noocaas oo kale ah ee mustaqbalka iman doona.

Xoghayaha arrimaha dibadda Boris Johnson ayaa xildhibaannada u ballanqaaday in wakhti ku filan la siin doono si ay aragtidooda u dhiibtaan.

Goobo u dhaw magaalooyinka Dimishiq iyo Xoms ayaa la duqeeyay Sabtidii, arrintaas oo jawaab u ahayd weerarkii kiimikada lagu sheegay ee ka dhacay Duuma toddobadii Abriil.

Suuriya iyo Ruushka oo dhanka milatariga ka taageeraba way diideen in kiimiko la adeegsaday, si caro leh ayayna uga jawaabeen.

Sharciyan Ra'iisulwasaaraha UK uma baahna in ay xildhibaannada la tashato marka ay fal milatari qaadayso, inkastoo sidaa la samaynayay tan iyo qabsashadii Ciraaq ee 2003-dii.

Waxaa la filayaa in ay afhayeenka baarlamaanka waydiisato ogolaansho, si loo qabto kulan degdeg ah oo baarlamaanku uu uga doodo xaaladda Suuriya.

Mowduucyada la xiriira