Britain oo wado qorshe Trump looga qancinayo heshiiska Iiraan

IRAN HUB Lahaanshaha sawirka EPA/AFP

Safiirka Britain u fadhiya Mareykanka, Sir Kim Darroch ayaa sheegaya in uu socdo qorshe la filayo in lagu yareeyo walaaca madaxweyne Trump uu ka qabo heshiiskii niyuukleerka ee quwadaha caalamka ay la galeen dalka Iiraan.

Madaxweyne Trump ayaa aad u dhaliilayay heshiiskaasi, waxaana suurtagal ah in dabayaaqada usbuucan uu shaaciyo in heshiiskaasi uu ka baxay.

Sir Kim Darroch waxa uu sheegay in waddamada Britain, Faransiiska iyo Jarmalka, ayaa muddo usbuucyo ah ay wadeen qorshe labaad oo lagu xallinayo arrintan.

Balse sidoo kale waxa uu caddeeyay in waddamadani saddexda ah ay daneynayaan in heshiiskaasi uu sidiisa sii ahaado, xitaa haddii Mareykanka uu dhankiisa ka baxo.

Heshiiskaasi ayaa dhigaya in Iiraan ay hakiso hawlaheeda niyuukleerka, iyada oo taa badalkeeda laga khafiifinayo xayiraadaha dhaqaale ee saaran.

Iiraan ayaa kal hore ku hanjabtay in cawaaqib xumo ay ka dhalan doonto haddii Mareykanka uu heshiiskaasi ka baxo.