Maamuuska Amiir Philip: Qoyska Boqortooyada oo ka warramay nolosha amiirka

Qoraalka Muuqaalka,

Prince Philip: Officer, husband, father

Carruurta Amiirka Edinburgh ayaa ka sheekeeyay nolosha aabbahood, iyo "waxyaabihii cajiibka" ahaa iyo waxa lagu xusuusto.

Amiirka Wales ayaa BBC u sheegay "tamarta uu u hayay caawinta hooyadey aad ayay cajiib u ahayd, iyo inuu sidaas sameynayay muddo dheer".

"Mar walba garabkeeda ayuu taagnaa wuxuuna ahaa tiir nolosha Boqoradda ka mid ah," ayuu yiri Amiirka Wessex.

Amiiradda ayaa ayadana ammaantay howlihii uu ka hayay Boqortooyada.

Amiirka York ayaa isagana ku tilmaamay Amiir Philip aabbe waqti la qaadan jiray qoyskiisa.

"Sida qoysaska kale waqtigan, waalididintaadu shaqo ayay aadeen maalintii balse fiidkii - si la mid ah qoysaska kale - waan isku imaan jirnay, fadhiga ayaan fadhiisan jirnay koox ahaan sheekooyin ayuuna noo akhrin jiray," ayuu yiri Amiir Andrew.

Qoyska Boqortooyada ayaa ka hadlayay wareysi lala yeeshay oo lagu xusayay geerida Amiirka Edinburgh, kaas oo qeyb ka ah barnaamijka gaarka ah ee BBC-da ee lagu wareysanayo "dadka sida fiican u yaqaannay".

Amiir Charles ayaa barnaamijka u sheegay: "Waxaan u maleynayaa inuu jeclaan lahaa in lagu xusuusto sida shakhsi leh xorriyaddiisa gaarka u ah."

Xigashada Sawirka, BBC Studios Events

Qoraalka sawirka,

Amiirad Anne

Mar uu ka sheekeynayay sidii adkeyd ee aabbihiis uu ku soo barbaaray kaddib markii ay qoyskiisu dibadjoog noqdeen, wuxuu yiri: "Ma noqon karto mid fudud noloshuna waxay ahayd hubanti la'aan qof walbana dad kale ayuu caawinaad ka sugayay - waxaana qiyaasayaa inuu ku qasbanaa inuu cagihiisa isu taago."

Barbaarintan hubanti la'aanta ku dhisneyd ayaa gayeysiisay "awoodda aan caadiga ahayn" ee ah inuu noqdo qof dhanka wanaagsan wax ka eega horena u socda, ayay tiri Amiirad Anne.

Ka soo wareegidda Ciidamada Badda Boqortooyada una wareego boqortooyada waxay ahayd "loollan adag", ayay tiri Amiirad Anne. "Ciidamada Badda Boqortooyada wuxuu u qaabilsanaa maraakiibta, wuxuu sameynayay dhammaan go'aannada. Noloshiisii xigtay, go'aanno yar ayuu gaarayay."

Balse Amiir Andrew, oo ciidamada badda la shaqeynayay xilligii Dagaalkii Falklands, ayaa sheegay inuusan weligiis aabbihiis kala sheekeysan haddii uu la sii shaqeyn lahaa ciidamada badda iyo in kale. "Wuxuu doorkiisa u arkayay taageeridda Boqoradda," ayuu amiirku yiri.

Amiirad Anne ayaa ka hadashay sidii uu ugu qanacsanaa caawinta Boqoradda "mar walba wuxuu u muuqday mid jooga" muhiim ayayna ahayd sababtoo ah waxay Boqorad noqotay ayadoo aad u yar.

"Waxay u baahnaayeen inay labo jibbaaraan shaqooyinkooda xilligaas si ay ugu suurto gasho inay xilkaas qabato," ayay tiri.

Xigashada Sawirka, BBC Studios Events

Qoraalka sawirka,

Amiir Edward

Hooyadiis, Amiirad Alice-ta Battenberg, waxaa lagu aasay Jerusalem, iyadoo sidoo kale lagu maamuusay qabuuraha Yad Vashem Holocaust Memorial, sababo la xiriira inay dad Yuhuud ah ku heysay gurigeeda oo ku yaallay Athens intii uu socday Dagaalkii Labaad ee Adduunka.

"Aabbahay wuxuu hooyadiis ku yiri, balse u kaadi, sideen weligeen u booqan doonnaa qabrigaaga?" Amiirka Wales ayaa hadalkaas dib u xusuustay. "waxay ku jawaabtay, ha doqomoobin, waxaa jira bas ka soo baxaya Athens."

Amiir Charles ayaa sheegay in Amiirka Edinburgh uu aad uga taxadari jiray erayadiisa.