Qalalaasaha Afghanistan: Sida uu Mareykanka u daawanayay Taalibaan oo ku guuleysaneysa dagaalka

Veterans honour Dylan Elchin
Qoraalka sawirka,

Rug caddaayada oo xusaya Dylan Elchin iyo shaqadii uu soo qabtay

Madaxweynaha Mareykanka, Joe Biden ayaa qirtay in guusha degdegga ah ee ay Taalibaan gaartay ay "aad u dhibsan doonaan" dad badan oo Mareykan ah oo xiriir la leh Afghanistan.

Wariyeyaal ka tirsan BBC-da ayaa waqti la qaatay rug caddaayada militariga oo kasoo qayb qaatay - qaarkoodna ku dhinteen - dagaalka, iyo waliba dad kasoo jeeda Afghanistan oo hadda Mareykanka ku magacaaba gurigooda.

Iyadoo uu roob socday ayay tobannaan qof taagnaayeen bannaanka xafiiska boostada ee magaalada Hookstown, Pennsylvania, xilli ay xusayeen Dylan Elchin, oo ahaa nin ka tirsanaa militariga Mareykanka kana soo jeeday magaaladaas oo ku dhintay miino kula qaraxday waddo ku taalla Afghanistan.

Xafiiskaas boostada ayaa macagii hore laga baddalay waxaana loogu magac daray askariga la xusayay.

"Aad bay u qurux badan tahay in la arko Dylan oo la sharfayo," ayuu yidhi askariga la xusayay awowgiis, Ron Bogolea.

"Wax walba waxa uu u huray waddankeenna, anigana waxaan aaminsanahay in ay waajib nagu tahay inaan badinno sharfidda militarigeenna - aana ku sharafno waxa ay u sameynayaan Mareykanka iyo caalamka oo dhan," ayuu yiri.

Inkastoo howsha la xiriirta xuska Elchin oo 25 jir ahaa ay billaabatay islamarkii uu geeriyooday sanadkii 2018-kii, haddana xafladda magaciisa lagu sharfay waxay kusoo aadday xilli uu Mareykanka kasoo baxay Afghanistan, haddana ay xukunka la wareegeen kooxda Taalibaan. Arrintaas ma aysan hilmaamsaneyn dadka khudbadaha ka jeedinayay munaasabadda ka dhacday Hookstown.

Xigashada Sawirka, Elchin family

Qoraalka sawirka,

Munaasabad xus ah ayaa Dylan Elchin loogu sameeyay magaaladiisa

"Waxyaabihii dhacay maalmihii lasoo dhaafay waxay muujinayaan in mar walba aannaan guuleysaneynin, waxaa hubaal ah in aannaan ahayd dad mar walba dhammeystiran, laakiin qalbiyadeenna ayaa wanaagsan," ayuu yidhi Conor Lamb, oo ka tirsan xildhibaannada Aqalka Wakiillada Mareykanka, xilli uu halkaas ka jeedinayay khudbad.

Balse Christian Easley oo ka tirsan waaxda shaqaaleysiinta ciidamada cirka, sidoo kalena Elchin ka caawiyay tababarka, ayaa BBC-da u sheegay in isaga aysan fikirkiisa waxba ka baddalin arrimaha ka socda dalka Afghanistan.

"Dylan waxa uu ku khasbanaa inuu qaato amarrada la siinayay ee ku aaddanaa inuu howlgalkiisa fuliyo. Waxa uu sameeyay wax walba oo laga dalbaday iyo wax kasii badan," ayuu yiri Mr Easley.

"Iyadoo aan la eegeynin waxa dhacay isbuucii lasoo dhaafay, anigu waxaan ogaa in Dylan uu wax kasta u sameeyay si sax ah."

Hase yeeshee dadka qaar tani waxay gelineysaa xasuus weyn.

Kabtan Jeremy Caskey, oo taariikh kusoo bandhigay munaasabadda, ayaa isaga laftiisa waxa uu ka mid yahay dadkii kasoo shaqeeyay Afghanistan. Walaalkiis Joseph Caskey, oo ka tirsanaa mariinista, ayaa howlgal lagu dilay 2010-kii.

Markii ay wariyeyaasha BBC-da way diideen sida uu u arko arrimaha isbuucan iska baddalay Afghanistan, waxa uu dib ugu laabtay xasuustiisa.

"Waxay ahayd xaalad aad u adag. Mar walba waxaad dooneysaa inaad ogaatid in waxa aad sameyneysid ay leeyihiin ujeeddo iyo micno, balse ujeeddada iyo micnaha kuma imaadaan oo kaliya guul. Waxaan aaminsanahay in mararka qaar ay ku imaadaan in wax la huro iyo in khibrad la helo," ayuu yiri Kabtan Caskey.

"Ma waxaan ku fiican nahay inaan iska dhaafno? Waddanku ma wuxuu ku fiican yahay inuu waxaas joojiyo? Iyagu ma waxay ku fiican yihiin inay sidooda ahaadaan? Way adag tahay in taas laga jawaabo."

Qoraalka sawirka,

Rug caddaayada militariga Mareykanka ayaa ka fal celinayay arrimihii hadda dhacay iyo dagaalkii labaatanka sano ka socday Afghanistan

Meel dhowr meyl oo kaliya u jirta Aqalka Cad, Fawzia Etemadi iyo ina-adeerkeed Hamid Naweed, ayaa daawanayay khudbaddii madaxweyne Biden.

"Waan aaminsaneyn Biden, balse xoogaa yar waan niyad jabnay - adduunka wuu niyad jabay," ayay tiri Fawzia. Waxay rajo ka qabtay in Mr Biden uu ku taagnaan doono ballantii uu ku qaaday inuu waddanka nabad ka dhigi doono.

"Dadka reer Afghanistan waxay dhibaato ku jireen 40-kii sano ee lasoo dhaafay. America ayaa adduunka aabe u ah, oo dimuqraaddiyadda aabe u ah. Ma jirto cid sharrixi karta sababta ay arrintan u dhaceyso."

Si la mid ah sida kumannaan dadka reer Afghanistan ah ay ugu nool yihiin waqooyiga gobolka Virginia, Fawzia iyo Hamid labadooduba waxay qaxooti ahaan uga soo tageen Afghanistan 1980-meeyadii, ugu dambeyntiina waxay dageen meel dhowr meyl u jirta caasimadda qaranka. Xaafaddaas waxay hoy u tahay mid ka mid ah bulshooyinka ugu badan ee qurba joogta reer Afghanistan ee ku nool Mareykanka.

Fawzia iyo Hamid waxay muujiyeen inay aad uga niyad jabeen waxyaabihii Afghanistan ka dhacay isbuucii lasoo dhaafay, wayna aamini waayeen.

"Hurdo way naga soo dhici weysay, waxaan ka walwalsaneyn dadka aan jecel nahay ee naga jiray waddankii hooyo," ayuu yiri Hamid, oo horay macallin uga ahaan jiray Jaamacadda Kabul.

Waxaa sidoo kale aad ugu adkeyd inay arkaan dad badan oo isku dayaya inay waddanka kasoo cararaan, "iyagoo u ordaya si ay rajo u helaan".