Nguza Viking: Mwanamuziki maarufu Tanzania Babu Seya na wanawe waachiwa huru kwa msamaha wa rais

Babu Seya Haki miliki ya picha Ikulu, Tanzania

Rais John Magufuli wa Tanzania leo amemuachia huru mwanamziki maarufu nchini Tanzania Nguza Viking, maarufu kama Babu Seya aliyehukumiwa kifungo cha maisha jela.

Msamaha huu unatajwa kuwa historia na hasa kuwasamehe wafungwa wa maisha na wale wa kunyongwa ambapo kwa wakunyongwa waliachiwa huru ni 61 na wengine walioachiwa huru kutokana na makosa mbali mbali ni 1,821 huku wengine 8157 wamepunguziwa adhabu zao.

Nguza Viking, maarufu kama Babu Seya na watoto wake watatu walihukumiwa kifungo cha maisha jela kwa makosa ya kuwabaka na kulawiti watoto.

Image caption Msamaha wa Rais Magufuli kwa Babu Seya na familia yake umezua hisia tofauti nchini Tanzania

Mwaka 2010, rufaa yao ilisikilizwa katika Mahakama ya Rufaa, na kuwaachia huru Nguza Mashine na Francis Nguza baada ya kuwaona hawana hatia katika makosa yote waliyoshitakiwa.

Baada ya rufaa hiyo, Babu Seya na mwanaye Papii Kocha walipatikana na hatia na hivyo kuendelea kutumikia adhabu ya kifungo cha maisha jela.

Tarehe 30 Oktoba mwaka 2010, Mahakama ya Rufaa iliyoketi chini ya jopo la majaji watu, likiongozwa na Nathalia Kimaro, akisaidiana na Mbarouk Mbarouk na Salum Masati walisikiliza hoja za pande zote kuhusu ombi la kufanyika mapitio ya uamuzi wa awali wa mahakama hiyo.

Mahakama ya Rufaa baada ya kufanya mapitio ikiwa imeketi chini ya majaji watatu, iliendelea kuwaona warufani hao wawili kuwa na hatia na hivyo kuendelea kutumikia adhabu yao.

Upande wa utetezi ukiongozwa na wakili wao Mabere Marando uliomba kupitiwa upya kwa uamuzi huo, ukidai kuwepo kasoro katika ushahidi uliowatia hatiani, ikiwemo kukosekana kwa mashahidi muhimu katika kesi hiyo.

Majaji walisema kuwa kuna uthibitisho kuwa warufani hao wawili waliwabaka watoto wa shule ya msingi mwaka 2003.

Kesi hiyo iliwashtua mashabiki wa mwanamuziki Viking nchini Tanzania, na kanda nzima ya Afrika Mashariki.

Mwanamuziki huyo mwenye kuimba nyimbo za rhumba, ambaye ni mzaliwa wa DRC, ameishi Tanzania kwa miaka mingi na kuwa na mashabiki wengi.

Nguza Viking na mtoto wake, Johnson Nguza maarufu kama Papii Kocha ambaye pia ni mwanamuziki, walifika mahakamani hapo kusikiliza hatma yao.

Walionekana kuwa watulivu wakati majaji walipotupilia mbali ombi lao kutaka hukumu yao kubatilishwa.

Walihukumiwa kwa kuwabaka wasichana 10 wa shule ya msingi waliokuwa kati ya umri wa miaka sita na nane wote waliokuwa katika shule ya msingi ya Mashujaa wilayani Kinondoni mjini Dar es Salaam.

Wakili wa muimbaji huyo, wakati huo, alisema kuwa mwanamuziki huyo hana matumaini tena ya kupewa rufaa kwani hilo lilikuwa ndilo ombi lake la mwisho.