Waziri Mkuu Ethiopia asema "amenukuliwa vibaya" juu ya wafungwa wa kisiasa

Ethiopian Prime Minister Hailemariam Desalegn looks on as he attends the opening ceremony for The Africa EU Summit in Abidjan on November 29, 2017 Haki miliki ya picha AFP
Image caption Hailemariam Desalegn alisema kuwa kituo kipya cha kuwazuilia wafungwa kitafungwa

Serikali ya Ethiopia imekanusha taarifa za kuwa wafungwa wote wa kisiasa ambao wamekuwa wakizuiliwa korokoroni nchini humo wataachiliwa huru.

Msaidizi wa Waziri Mkuu amesema kuwa tafsiri isiyo sahihi ilipelekea yeye kunukuliwa visivyo kwa kusema kuwa analenga kutoa fursa ya kuwepo kwa mashauriano ya kisiasa.

Waziri Mkuu huyo pia alisema kuwa kituo kipya cha kuwazuilia wafungwa kitafungwa.

Awali shirika la kutetea haki za binadamu, Amnesty International lilipokea habari hizo kwa kusema ni ishara ya "hatua ambayo huenda ikaachilia sura mpya kwa haki za kibinadamu Ethiopia."

Japo pia lilionya kuwa tendo la kufungwa kwa kituo cha kuwazuilia wafungwa cha Maekelawi haliwezi 'kufuta vitendo vya ukatili' vilivyotokea katika jengo hilo.

Ethiopia kwa muda mrefu imetuhumiwa na makundi ya kutetea haki za kibinadamu kwa kuwakamata wapinzani wake kwa wingi na kuwazuilia katika juhudi za kuzima upinzani dhidi ya serikali.

Hata hivyo, hii ndiyo mara ya kwanza kwa serikali kukiri kwamba inawazuilia wafungwa wa kisiasa.

Mwandishi wa BBC Emmanuel Igunza anasema awali serikali imekuwa ikiwaita "wahalifu".

Haijulikani wafungwa hao ni wangapi na wataachiliwa huru lini.

Shirika la kutetea haki za kibinadamu la Human Rights Watch (HRW) limekuwa likiituhumu serikali kwa kutumia sheria za kukabiliana na ugaidi kuwafunga wapinzani wake.

Wafungwa hawa ni akina nani?

Wanaozuiliwa katika magereza na vituo mbalimbali kote nchini humo ni pamoja na wanaharakati wa upinzani kutoka majimbo ya Amhara na Oromia.

Majimbo hayo yalishuhudia maandamano ya kupinga serikali 2015 na 2016.

Kuna piawatu kutoka jimbo la watu wa mataifa ya kusini, na wanahabari ambao wamekuwa wakiikosoa serikali.

Ni vigumu kueleza hasa ni wafungwa wangapi wa kisiasa wanazuiliwa nchini humo, lakini mwandishi wetu anakadiria kwamba kuna takriban watu 1,000 wanaozuiliwa kwa makosa mbalimbali chini ya sheria za kupambana na ugaidi.

Haki miliki ya picha AFP
Image caption Maelfu wamezuiliwa tangu maandamano ya kuipinga serikali yalipoanza kfanyika

Kuna wengine 5,000 ambao kesi zao bado zinasikizwa, wengi ambao walikamatwa wakati wa hali ya hatari Oktoba 2016.

Wataachiliwa kweli?

Serikali haijaeleza wataachiliwa lini au ni nani hasa wataachiliwa.

Kuna waliofungwa kwa sababu za kisiasa lakini kunao waliofungwa wakihusishwa na ugaidi.

Watu 19 waliohusishwa na kundi la Ginbot 7 linalochukuliwa na serikali kuwa kundi la kigaidi walifungwa jela wiki hii.

Nini hatima ya kituo kikuu cha kuwazuilia wafungwa?

Bw Hailemariam amesema kituo kikuu cha kuwazuilia wafungwa cha Maekelawi mjini Addis Ababa ambacho HRW tangu 2013 walidai kimekuwa kikitumia mateso kupata habari kutoka kwa washukiwa kitafungwa.

Serikali imesema kitageuzwa na kuwa makumbusho ya kisasa.

Kituo kipya cha kuwazuilia washukiwa kitafunguliwa na Bw Hailemariam amesema kitatimiza viwango vya kimataifa.

Maelezo zaidi kuhusu taarifa hii