Ndege ya Air India yagonga ukuta katika uwanja wa ndege wa Trichy

Sehemu ya ndege iliyoharibika Haki miliki ya picha Air India
Image caption Ndege ilitua salama katika mji wa Mumbai

Ndege ya abiria iliyokuwa ikisafiri kutoka mji wa Trichy kusini mwa India kuelekea Dubai ilivunjika sehemu ya bawa lake baada ya kugonga ukuta katika uwanja wa ndege kabla ya kupaa.

Ndege hiyo iliyokua na abiria 130 na wahudumu sita ilielekezwa mjini Mumbai ambako ilitua salama.

Shirika la ndege la India limesema marubani wawili wa ndege hiyo ambao wote wana tajiriba ya kupaa kwa zaidi ya saa 6,500 wamesimamishwa kazi hadi uchunguzi utakapokamilika.

Katika taarifa kutoka shirika hilo zinasema kuwa ndege hiyo ya Boeing 737 ilipaa kutoka uwanja wa ndege wa Trichy kusini mwa India mapema Ijumaa asubuhi wakati maafisa walipogundua huenda imegonga ukuta katika uwanja wa ndege.

Haki miliki ya picha Air India
Image caption Sehemu ya ukuta uliyoporomoka katika uwanja wa ndege wa Trichy

Tukio hilo limewasilishwa kwa shirika la kudhibiti usafiri wa angani huku shirika la Air India likisema liko tayari kushirikiana kwa uchunguzi

Pia limetokea wiki kadhaa baada ya zaidi ya abiria 30 waliyokuwa wameabiri ndege nyingine ya India walilazimika kupewa matibabu baada ya rubani kusahau kubonyeza kifaa kinachodhibiti kiwango cha presha ndani ya ndege.

Mwaka 2015 ndege nyingine ya shirika la Air India iliyokuwa safarini kutoka Mumbai kwenda London ililazimika kukatiza safari na kurejea uwanja wa ndege baada ya panya kuonekana ndani ya ndege hiyo.

Ndege hiyo nambari AI 131 ilikuwa imefika Iran pale panya alipoonekana na mmoja wa watu waliokuwa ndani ya ndege hiyo, ripoti zinasema.

Haki miliki ya picha Getty Images
Image caption Shirika la Air India

Abiria waliendelea na safari yao kwa kutumia ndege nyingine.

Air India ambayo ni moja ya shirika la ndege la muda mrefu halijapata faida tangu mwaka 2007.

Mwezi Juni mwaka 2017, baraza la mawaziri nchini India ilidhinisha mpango wa kubinafsisha shirika hilo lakini halikupata wanunuzi baada ya serikali kutoa ofa ya kuuza sehemu kidogo ya usimamizi wake.

Mnunuzi yeyote atalazimika kuchukua karibu dola bilioni 5 ya deni ambayo ni nusu ya deni lote linalodaiwa shirika hilo.

Maelezo zaidi kuhusu taarifa hii