BASATA: Diamond na Rayvanny waomba radhi kwa kutumbuiza kibao kilichopigwa marufuku Tanzania

Diamond Platnumz na Rayvanny Haki miliki ya picha DiamondPlatnumz

Wasanii nyota wa muziki nchini Tanzania Diamond Platnumz na Rayvanny wameomba msamaha kwa kupiga kibao chao kilichofungiwa katika tamasha lao hivi karibuni.

Waasanii hao wa Bongo Flava walipiga kibao chao kiitwacho Mwanza katika tamasha lao liitwalo Wasafi Festival. Kibao hicho kilipigwa marufuku na Braza la Sanaa Tanzania (Basata) Novemba 12 mwaka huu.

Kufuatia kukaidi agizo la Basata, nyota hao wawili walifungiwa kwa muda usiofahamika kufanya onesho lolote ndani na nje ya Tanzania.

Asubuhi ya leo wasanii hao wametoa video katika mtandao wa kijamii wa Instagram ya kuomba radhi kwa 'makosa yao'.

"Kwa unyenyekevu mkubwa tunaomba radhi kwa Jamuhuri yetu tukufu ya Muungano wa Tanzania, Wizara ya Habari Sanaa na Michezo, Basata na kila aliyekwazika kwa kuperform (kupiga) wimbo wa Mwanza katika show (onesho) yetu ya Mwanza. Japo tunajitahidi kuwa vijana wa mfano bora katika taifa letu lakini unavyojua binadamu siku zote hauwezi kupatia. Ni kweli tulikosea kwa kuperform mwimbo ambao umefungiwa. Tunaahidi kutorudia tena kosa lilotokea. Lakini pia kwa kutumia kazi za sanaa kuwasihi wasanii wenzetu na mashabiki kuwa mabalozi bora wa tamaduni za Tanzania," amesema diamond katika video hiyo.

Katika maelezo iliyoamabatana na video hiyo, Diamond ameandika: "Ila Utelezapo, ni vyema kulijua Kosa na Kulirekebisha ili kesho na Kesho kutwa lisijirudie....Inshaallah Mwenyez Mungu Atusimamie na kutuongezea Juhudi na Maarifa katika Kazi zetu ili kwa Pamoja tuzidi kuukuza Muziki wetu na Kuendelea Kuiwakilisha vyema na kulipa sifa Nzuri na Heshima Nchi yetu..."

Wakati wakiufungia wimbo huo, Basata walisema kibao hicho "kimebeba maudhui machafu," ambayo ni "ukiukwaji mkubwa wa maadili ya Kitanzania" na kwamba umetumia "maneno yanayohamasisha ngono".

Baraza pia liliwataka "kuuondoa wimbo huo mara moja kwenye mitandao ya kijamii kabla ya kufika saa kumi kamili" siku hiyo, lakini mpaka saa tatu nanusu ya leo asubuhi bado upo You Tube.

Na Jumanne walisema wanafungia wasanii hao kwa kuonesha dharau kwa mamlaka: "Baraza limefikia maamuzi ya kuwafungia rasmi kutokana na wasanii hawa kuendelea kuonyesha dharau na utovu wa nidhamu kwa mamlaka zinazosimamia masuala ya sanaa nchini na uvunjifu wa maadili uliokithiri unaofanywa na waandaaji wa Tamasha la Wasafi 2018, chini ya uongozi wake Diamond Platnumz," ilisema taarifa ya Basata.

Kibali cha tamasha lao pia kimesitishwa "kutokana na ukiukwaji wa sheria, kanuni na taratibu katika uendeshaji wa tamasha hilo hapa nchini."

Basata wanaweza kumzuia Diamond kutoka nje ya Tanzania?

Bi Agnes Kimwaga ambaye ni afisa habari mkuu wa Basata, amemwambia mwandishi wa BBC Maximiliana Mtenga kwamba baraza hilo lina mamlaka ya kumzuia msanii kutoka nje ya Tanzania.

"Kwa mujibu wa kanuni za Basata ya 2018, baraza linawajibika kumpa kibali msanii yeyote anapotoka nje ya nchi kwenda kufanya shughuli za sanaa. Kwa hivyo sisi ndio tutakaokutambulisha, na kibali hicho kitakuruhusu kuweza kutoka uwanja wa ndege kwenda kufanya shughuli yoyote ya sanaa nje ya nchi.

"Ikiwa tumekufungia kwa mujibu wa sheria, nani atakupatia kibali cha kukutambulisha kutoka nje ya mipaka ya nchi kwenda kufanya shughuli za sanaa.

"Kwa mujibu wa sheria tunaweza kumzuia kwenda kufanya nje ya nchi kwa sababu tutakataa kutoa vibali vya kumruhusu kutoka."

Matamasha Kenya

Haki miliki ya picha DiamondPlatnumz

Diamond Platnumz na kikosi chake cha Wasafi wameandaa matamasha chungu nzima msimu huu wa Krismasi, ambapo walitarajiwa kuandaa tamasha mjini Embu katika eneo la Mlima Kenya nchini Kenya tarehe 24 Desemba

Mkesha wa Mwaka Mpya amepangiwa kuwa bustani ya Uhuru, Nairobi na tayari bendi maarufu ya Morgan Heritage kutoka Jamaika wamethibitisha kutumbuiza kwenye tamasha hilo. Diamond na bendi hiyo wameimba kibao kiitwacho Halleluja.

Mada zinazohusiana