Rwanda imewasihi wananchi wake kusitisha ziara na biashara nchini Uganda

Uganda Rwanda Haki miliki ya picha Uganda Media Centre

Serikali ya Rwanda imewahisi wananchi wake kusitisha ziara zao nchini Uganda baada ya kuishtumu nchi hiyo kuwanyanyasa raia wake wanaoishi ama kutembelea nchi humo.

Uganda imeishutumu Rwanda kufunga mipaka baina ya nchi mbili, lakini Rwanda imekanusha kufunga mipaka hiyo.

Alhamisi iliyopita mamlaka ya mapato ya Rwanda iliamrisha maroli ya mizigo kutotumia tena mpaka wa Gatuna kwa madai ya shughuli za ujenzi wa kituo kimoja cha mpakani 'one stop border' baina yake na Uganda.

Kwa mjibu wa mamlaka ya mapato ya Rwanda malori yaliombwa kutumia mpaka wa pili wa Kagitumba kaskazini mwa Rwanda.

Hata hivyo watumiaji wa mipaka hiyo miwili hupendelea njia ya mpaka wa Gatuna kuwa rahisi na fupi kuliko ya mpaka wa Kagitumba.

Nchi mbili zinaendelea kurushiana lawama.

Rwanda inaishutumu Uganda kunyanyasa wanyarwanda wanaoishi ama kufanyia biashara nchini Uganda na pia kuunga mkono makundi ya waasi hususani kundi la Rwanda National Congres linaloongozwa na mkuu wa zamani wa majeshi Jenerali Kayumba Nyamwasa aliyeko uhamishoni nchini Afrika kusini.

Haki miliki ya picha Uganda Media Centre

Kwa upande mwingine, Uganda inashutumu Rwanda kwa vitendo vya kijasusi kwenye ardhi yake huku ikiwashuku baadhi ya raia wa Rwanda kuhusika na vitendo hivyo.

Haki miliki ya picha Uganda Media Centre

Mkwamo wa shughuli katika mpaka wa Rwanda Uganda.

Eneo hilo lina umuhimu mkubwa kibiashara kieneo.

Ni eneo ambalo huruhusu kupita kwa bidhaa kutoka mji mkuu wa Uganda Kampala, au Mombasa pwani ya Kenya.

Wakaazi hapo wanasema ni kama 'ghala kwa biashara kutoka maeneo hayo'.

Akizungumza na BBC, Diwani Abel Bizimana katika eneo la Kisoro anaeleza kwamba, 'Hali haijabadilika. Tunaathirika kama viongozi wa kieneo, kama jumuiya ya wafanyabiashara na wateja pia tunaowahudumia.'

Abel ameeleza kuwa maisha yamebadilika pakubwa.

Kutokana na matatizo ya kibiashara na udhibiti wa watu kutoka na kuingia katika eneo hilo, watu ambao kawaida huja kupokea bidhaa kutoka mjini na wilaya ya Kisoro sasa inaarifiwa hawaji tena, wakiwemo hata waendesha boda boda ambao pia wamesitisha shughuli zao.

Siku mbili kuu za soko katika eneo hilo, Jumatatu na Alhamisi, ambazo hushuhudiwa shughuli nyingi za kibiashara, 'sasa limekuwa kama jangwa', anaeleza diwani Abel.

Usafiri wa mabasi umepungua pakubwa, bidhaa zinaharibika.

Wafanyabiashara wanaobeba mihogo au samaki wanapata hasara katika mpaka kwasababu mali zinaharibika.

'Nilipofika mpakani, nilihisi harufu kali ya samaki waliooza katika eneo hilo' ameongeza Abel.

Wafanyabiashara walalamikia hali ya biashara

Ndizi kutoka Uganda ambazo zilikuwa zinauzwa nchini Rwanda, zimekuwa adimu kupatikana .

Mchuuzi wa ndizi kutoka Kigali anaeleza kuwa sasa ndizi za Uganda haziruhusiwi kuingia tena nchini Rwanda baada ya mipaka kufungwa kupokea chakula.

Huku mfanyabiashara mwingine anasema,

'Mimi nauza unga wa mahindi, mafuta, sabuni, acha tu nisema kwamba bidhaa zangu ninazouza nyingi ni kutoka Uganda. Ukweli ni kwamba bei yake imeshapanda. Mfano paketi moja ya mafuta haya ya kupikia kuna ongezeko la franga elfu tatu kwa bei ya kulangua. Maziwa ya Highland pia ni kutoka Uganda tulikuwa tunanunua kwa elfu kumi na moja paketi moja sasa ni elfu kumi na tatu.

Sabuni nyingi tulizokuwa tunatumia ni kutoka Uganda, pia bei yake ilipanda. Sasa tumeanza kujaribu kutumia za Rwanda.''

Hii yote imetokana na misuguano kati ya nchi mbili

Wiki iliyopita, msemaji wa serikali ya Uganda Ofwono Opondo ameiomba Rwanda kuruhusu wafanya biashara kuingiza bidhaa ili kuepuka hasara na uhasama zaidi.

Kwa upande wake Waziri wa maswala ya kigeni wa Rwanda, Richard Sezibera amenukuliwa akidai kuwa serikali ya Uganda inawadhulumu raia wa Rwanda wanaoishi Uganda.

Maelezo zaidi kuhusu taarifa hii