MCT, asasi nyingine zashinda kesi dhidi ya sheria ya huduma za habari ya mwaka 2016 dhidi ya serikali

Habari Haki miliki ya picha jamii forums
Image caption Mawakili watetezi wamesema hili ni jambo la kujivunia

Mahakama ya Afrika Mashariki (EACJ) imesema baadhi ya vipengele katika Sheria ya Huduma za Habari ya mwaka 2016 inakiuka uhuru wa kujieleza pia vinapingana na Mkataba ulioanzisha Jumuiya ya Afrika Mashariki (EAC) ambao Tanzania imeuridhia.

Mahakama ya Afrika Mashariki (EACJ) imetoa hukumu leo dhidi ya sheria hiyo iliyopitishwa na Bunge Novemba 2, 2016 na kusainiwa na Rais John Magufuli.

Kesi hiyo namba 2 ya mwaka 2017 ilifunguliwa na Baraza la Habari Tanzania (MCT), Kituo cha Msaada wa Sheria na Haki za Binadamu (LHRC) na Mtandao wa Watetezi wa Haki za Binadamu Tanzania (THRDC) wakilalamikia ukandamizaji wa uhuru wa habari.

Vipengele vilivyolalamikiwa vipo 18, walalamikaji wakiiomba mahakama hiyo itamke kwamba vipengele hivyo vinakiuka mkataba wa Jumuiya ya Afrika Mashariki na kuilazimisha serikali kuvifuta kabisa.

Hukumu hiyo imesomwa leo Alhamisi Machi 28, mbele ya Jopo la majaji watatu Jaji Charles Nyachae, Monica Mugenyi na Jaji Justice Ngie.

Mwaka mmoja wa habari za uongo barani Afrika

Huwezi kusikiliza tena
Wanahabari wengi wa Afghanstan wamepoteza maisha yao mwaka huu

Akisoma hukumu hiyo Jaji Nyachae amesema vifungu vilivyo kwenye sheria hiyo ni vibovu na vinavyokiuka mkataba wa uanzishwaji wa Jumuiya ya Afrika Mashariki, hivyo ameitaka Serikali ya Tanzania kurekebisha vifungu vya Sheria ya Uhuru wa Habari kutokana na kukiuka Mkataba wa Jumuiya ya Afrika Mashariki.

"Sheria hii inapaswa kufanyiwa marekebisho ili iendane na mkataba wa uanzishwaji wa Jumuiya," amesema Jaji Nyachae.

Wadai halo walikua wakitetewa na mawakili, Fulgence Massawe, Jebra Kambole, Mpale Mpoki , Donald Deya na Jenerali Ulimwengu.

Mahakama ya EACJ imekubaliana na walalamikaji kuwa vifungu katika sheria ya Huduma ya Habari vya (3)(a), 13, 1920, 21,34 pamoja na vifungu vingine vinakiuka utawala bora, demokrasia na utawala unaozingatia sheria na inapingana na mkataba ulioanzisha EAC.

Mara baada ya hukumu hiyo, Wakili kiongozi wa walalamikaji, Fulgence Massawe amesema ushindi huo ni wa kihistoria na unathibitisha hoja za wadau mbalimbali walizokua wakisema sheria hiyo siyo nzuri kwa maslahi mapana ya nchi.