Abdelaziz Bouteflika: Chama tawala Algeria chaunga mkono kutimuliwa kwa rais huyo

Rais Bouteflika haonekana mara kwa mara hadharani Haki miliki ya picha AFP

Chama tawala nchini Algeria FLN kimeunga mkono kuondolewa adarakani kwa rais Abdelaziz Bouteflika, ambaye ametajwa kuwa mgonjwa na hivyobasi kutoweza kuongoza.

Uamuzi huo wa FLN unajiri siku moja baada ya mkuu wa jeshi nchini humo Luteni Ahmed Gaed Salah kusema kuwa uamuzi wa kikatiba unafaa kufanywa kumuondoa afisini rais huyo.

Bouteflika ambaye yuko chini ya shinikizo kali baadaye alikubali kujiuzulu baada ya marekebisho ya kikatiba kupitishwa.

Mazungumzo yameanzishwa kujadili hatma ya siku za baadaye ya Algeria ambayo yataongozwa na mwanadiplomasia wa muda mrefu wa Umoja wa mataifa Lakhdar Brahimi.

Maandamano yalianza mwezi mmoja uliopita wakati rais huyo mwenye umri wa miaka 82 aliposema kuwa anapanga kuwania urais kwa muhula mwengine .

Lakini watu waliendelea kuandamana hata baada ya kusema kuwa hatowania tena muhula mwengine na badala yake wakataka kufanyika kwa mabadiliko ya haraka.

Luteni jenerali Gaed Salah awali alinukuliwa akisema kuwa jeshi na raia wanafikiria kuhusu hatma ya taifa hilo akitoa ishara kwamba jeshi linaunga mkono maandamano hayo.

Ni nini haswa alichosema mkuu huyo wa jeshi?

Katika hotuba yake iliopeperushwa hewani na kituo cha umma, kiongozi huyo wa jeshi na naibu wa wizara ya ulinzi alisema kuwa ''katiba ndio njia pekee ya kuleta uthabiti wa kisiasa'' .

Alitoa wito wa kutumika kwa kifungu 102 ambacho kinaliruhusu baraza la kikatiba nchini Algeria kutangaza wadhfa wa urais kuwa uko wazi iwapo kiongozi huyo hawezi kuongoza.

''Suluhu hii itavutia uungwaji mkono na lazima iungwe mkono na kila mtu'' , aliaesma Luteni jenarali Gaed Salah ambaye alipongezwa na maafisa waliokuwa wakitazama hotuba yake.

Tangazo hilo la jeshi la Algeria ni muhimu sana.

Hatahivyo, hali ya afya ya rais Bouteflika, na mgogoro wa kikatiba kuhusu utawala wake hadi uchaguzi mwengine utakapofanyika mbali na wito wa waandamanaji ambao wanasalia katika barabara za Algeria, hatua hiyo haitarajiwa kufanikiwa.

Bado kutakuwa na maswali kuhusu uamuzi huo wa mkuu wa jeshi.

Katika miaka ya hivi karibuni, ni wandani wa kisiasa na wale wa kijeshi wa rais huyo ambao wamekuwa wakizungumza kwa niaba yake huku uwepo wake ukipingua kutokana na hali yake ya kiafya.

Luteni jenerali Ahmad Gaed Salah anaonekana kuwa mtiifu sana kwa rais Bouteflika na nguzo muhimu ya utawala wa rais huyo nchini Algeria ambapo wikendi iliopita gazeti moja la kibinafsi lilitaka atimuliwe madarakani pamoja na rais huyo.

Baraza la kikatiba la taifa ilo litalazimika kuunga mkono wito wake wa hivi karibuni na baadaye itasalia kwa bunge kuamua kuhusu hatma ya rais huyo.

Maelezo zaidi kuhusu taarifa hii