113 wafa maji wakijaribu kwenda Ulaya

Image caption Wahamiaji wakiokolewa kutoka baharini

Maafisa katika kisiwa kikubwa cha Sicily katika bahari ya Meditarenia wanasema kuwa wamepata maiti 113 baada ya mashua iliyokuwa imewabeba takriban wahamiaji 500 wa kiafrika kushika moto na kuzama katika kisiwa cha Lampedusa.

Boti hiyo ilikuwa safarini kuelekea Ulaya lakini ikazama katika kisiwa cha Lampedusa katika pwani ya Utaliana

Takriban miili 113 imepatikana baharini na mingine zaidi kupatikana ndani ya boti iliyozama.

Inaarifiwa abiria walijirusha baharini wakati moto ulipozuka ndani ya boti

Zaidi ya wahamiaji 150 wameokolewa.

Wengi wa wahamiaji hao walikuwa raia wa Eritrea na Somalia,kwa mujibu wa Umoja wa Mataifa.

Shughuli kubwa ya uokozi ingali inaendelea kuwatafuta manusura kwani inahofiwa mamia zaidi huenda wamefariki kutokana na ajali hiyo.

Meya wa mji huo anasema kuwa walionusurika wako hatika hali ya mshutuko na walimwambia kuwa moto mdogo uliwashwa baada ya meli kukwama na lengo lilikuwa kuitisha msaada.

Lakini alisema kuwa moto ulisambaa kupita kiasi na ikawa vigumu kuudhibiti.

Kisiwa cha Lampedusa kiko kati ya Tunisia na Sicily na kimekuwa kiingilio kikuu cha wahamiaji kuingia barani Ulaya.