Ndege ya Malaysia haijapatikana

Haki miliki ya picha Getty
Image caption Meli inayotafuta ndege ya Malaysia

Maafisa nchini Malysia wanaendelea kuitafuta ndege iliyotoweka wakati ikitokea Kuala Lumpur kuelekea Beijing siku Jumamosi iliyopita.

Siku tatu baada ya ndege hiyo kutoweka, chini ya saa moja kabla ya kufika mwisho wa safari yake, juhudi za kimataifa zinazohusisha meli na ndege za kutafuta mabaki ya ndege hiyo bado hazijafanikiwa.

Makundi ya uokozi kutoka mataifa tisa kwa sasa yataangazo maeneo ya Malacca na Bahari ya Kusini ya Uchina.

Maafisa wa serikali ya Malaysia wamesema kuwa watu wawili waliosafiri kwa ndege hiyo wakitumia paspoti iliyoibwa wametambuliwa.

Siku ya Jumatatu, ndege moja ya Vietnam imeripoti kuwa imeona kitu kinachofanana na mlango wa ndege kwenye ufuo wa bahari ya Kusini mwa Uchina kwenye mwambao wa taifa hilo.

Hata hivyo hakuna thibitisho kuwa mlango huo ni wa ndege iliyopotea ya Malaysia, iliyokuwa na abiria mia mbili na thelathini na tisa.

Uchunguzi kuhusiana na kilichosababisha kupotea kwa ndege hiyo mapema siku ya Jumamosi, inawalenga abiria wawili wanaodaiwa kuwemo ndani ya ndege hiyo, waliotumia paspoti iliyoibiwa.

Image caption Shughuli ya kutafuta ndege ya Malaysia

Stakabadhi hizo mbili za kusafiria kutoka Italia na nyingine Australia inaaminika kuibwa nchini Thailand.

Idara ya polisi ya Kimataifa, Interpol, inasema kuwa ni mapema mno kuhusisha pasi zilizoibwa na kutoweka kwa ndege hiyo.

Wakuu wa Malysia wanasema jumla ya meli 30 na ndege 44 kutoka mataifa tisa tofauti duniani, yamejiunga katika shughuli za kuitafuta ndege hiyo.

Kamanda William Marks wa kikosi cha saba cha jeshi la wanamaji la Marekani, ametuma ndege aina ya USS Pinckney kusaidia katika usakaji huo.

Ameonya kuwa shughuli hiyo ya kutafuta ndege hiyo inakumbwa na changamoto nyingi.