Machimbo ya dhahabu yaporomoka Colombia

Image caption Timbo la Dhahabu laporomoka Colombia

Maafisa nchini Colombia bado wanajaribu kuwanusuru takriban watu thelathini waliofukiwa wakiwa hai na mamia ya tani za tope pamoja na mawe baada ya mgodi haramu wa dhahabu kuporomoka usiku wa Jumatano.

Miili mitatu imepatikana lakini maafisa wanasema kuwa udongo uliolowa chepechepe katika eneo hilo umefanya juhudi za uokoaji kuwa ngumu .

Waokoaji wanajaribu kufukua udongo ili kuwanusuru watu waliofukiwa.

Takriban mashine saba za kufukua udongo zimekuwa zikihusika katika shughuli ya uokoaji katika mgodi huo ulioko kusini magharibi mwa sehemu ya Cauca.

Kando kando mwa mgodi huo wapo mamia ya jamaa na marafiki wa wachimba migodi waliofukiwa ambao wanafuatilia kwa karibu shughuli za uokoaji.

Lakini mmoja wa wafanyakazi wa kikosi cha zimamoto amesema kuwa hamna matumaini makubwa ya kuwapata waliofukiwa wakiwa hai.

Huku matumaini yakizidi kufifia, Rais wa Colombia, Juan Manuel Santos ameulaumu uchimbaji migodi haramu kwa kusababisha vifo hivyo .

Amesema serikali yake inapigana vita dhidi ya uovu huo.

Lakini mwandishi wa BBC ameongezea kuwa kuna migodi kadhaa katika maeneo yaliyojificha nchini humo.

Ijumaa wiki iliyopita, wachimba migodi wengine wanne walipoteza maisha yao huku sitini na watano wengine wakiathirika na gesi ya sumu katika sehemu ya Antioquia.