Tazara yapata injini na mabehewa mapya

Image caption Reli ya Tazara

Mamlaka ya reli ya Tanzania na Zambia TAZARA imepokea injini nne mpya za umeme zinazotumia mafuta ya dizeli pamoja na mabehewa 18 ya abiria yote kwa thamani ya dola milioni 22.4.

Kulingana na gazeti la The Citizen nchini Tanzania vifaa hivyo vipya vilinunuliwa kupitia mkopo wa ushirikiano wa kiuchumi uliotiwa sahihi na mataifa matatu ya Uchina ,Tanzania na Zambia mnamo tarehe 26 mwezi Machi mwaka 2012 mjini Lusaka.

Kulingana na taarifa iliotolewa na TAZARA ,vifaa hivyo vipya vinalenga kuleta kuimarisha pakubwa oparesheni za TAZARA,ambayo imekuwa ikizorota kutokana na vifaa vilivyozeeka kutokana na ukosefu wa urekebishaji na fedha.

Ujio wa injini hizo nne utaongeza uwepo wa treni kila siku kwa asilimia 33 kutoka asilimia 12 na 16.

Image caption Tazara

Zikiwa zimezeeka kwa kati ya miaka 25 hadi 30,treni nyingi zinazofanya kazi zimepita wakati wake na zimekuwa zikikumbwa na hitilafu mara kwa mara,hali ambayo imesababishwa na kushindwa kwa mamlaka kuzirekebisha kutokana na changamoto za kifedha.

Akishuhudia kupakuliwa kwa shehena ya vifaa hivyo katika bandari ya Dar es Salaam,mkurugenzi wa TAZARA, Ronald Phiri alisema,''Tunaishukuru serikali ya Uchina kwa ushirikiano wao mwema na TAZARA,ambayo ilisaidia katika ujenzi wake miaka 40 iliopita''.