Afisa mkuu wa polisi afungwa jela Uchina

Li
Image caption Li aliwahi kuhudumu kama msemaji wa chama tawala nchini Uchina

Naibu mkuu wa polisi wa zamani nchini Uchina amefungwa jela miaka 15 kwa makosa ya ufisadi, vyombo vya habari nchini humo vimeripoti.

Li Dongsheng alikuwa na uhusiano na Zhou Yongkang, aliyefungwa jela maisha mwezi Juni mwaka jana kwa makosa ya ufisadi.

Habari za kuhukumiwa kwake zimeripotiwa katika mitandao ya kijamii ya runinga ya taifa nchini humo CCTV.

Afisa huyo anadaiwa kupokea hongo ya takriban yuan 22m ($3.3m; £2.3m).

Alituhumiwa pia kutumia vibaya mamlaka akiwa serikalini kati ya 1996 na 2013, kwa mujibu wa ripoti za vyombo vya habari wakati huo.

Li alifutwa kazi rasmi Februari mwaka jana baada ya uchunguzi dhidi yake kuanzishwa, pamoja na washirika wengine wa zamani wa Zhou Yongkang.

Zhou alihudumu kama mkuu wa usalama wa Uchina kabla ya kustaafu 2012.