Ban Ki-moon kukutana na Nkurunziza

Ban Haki miliki ya picha Reuters
Image caption Baadaye Bw Ban anatarajiwa kuzuru maeneo ya mashariki mwa DR Congo

Katibu Mkuu wa Umoja wa Mataifa Ban Ki Moon amepangiwa kukutana na Rais wa Burundi Pierre Nkurunziza katika juhudi za kutatua mzozo wa kisiasa nchini humo.

Bw Ban, aliyewasili nchini Burundi Jumatatu, atakutana na Bw Nkurunziza leo ikulu ya rais na baadaye wawili hao wanatarajiwa kutoa taarifa ya pamoja.

Baada ya kuwasili Jumatatu, Bw Ban alikutana na wawakilishi wakuu wa vyama vya siasa na kujadili amani na usalama.

Mamia ya watu wameuawa na maelfu kutoroka makwao tangu kuanza kwa machafuko nchini humo mwezi Aprili mwaka jana baada ya Rais Nkurunziza kutangaza angewania urais kwa muhula wa tatu.

Image caption Bw Ban akilakiwa nchini Burundi

Rais wa Afrika Kusini Jacob Zuma, na viongozi wengine wanne wa nchi za Afrika wanatarajiwa kufika Burundi mnamo Alhamisi kinachoonekana kuwa juhudi za viongozi wa bara Afrika kuongeza shinikizo kwa Bw Nkurunziza kufanikisha mazungumzo ya kutafuta amani.

Watakaosaidiana na Rais Zuma ni pamoja na Rais wa Gabon Ali Bongo na Waziri Mkuu wa Ethiopia Hailemariam Desalegn.

Bw Zuma amesema Rais wa Uganda Yoweri Museveni amekuwa akiongoza mazungumzo ya amani kwa niaba ya kanda lakini viongozi hao watawakilisha Umoja wa Afrika.