Simba wawili waonekana barabarani Nairobi

Simba Haki miliki ya picha AP
Image caption Simba hao wameonekana na maafisa wa polisi karibu na msitu

Simba wawili wameonekana katika barabara moja ya mji mkuu wa Kenya, Nairobi wiki moja tu baada ya simba wengine kutoroka kutoka mbuga ya taifa ya Nairobi.

Simba hao walionekana na polisi wa trafiki, waliokuwa wakipiga doria katika barabara ya Southern Bypass, mwendo wa saa nne asubuhi, shirika la huduma kwa wanyamapori (KWS) limesema kupitia taarifa.

Wanyama hao walionekana wakitembea karibu na ua unaozunguka msitu wa barabara ya Ngong, karibu na kituo cha idara ya misitu ya Kenya (KFS).

Polisi hao waliwapasha habari maafisa wa KWS ambao wameanza operesheni ya kuwatafuta wanyama hao.

Siku kumi zilizopita, simba sita waliotoroka kutoka mbuga ya taifa ya Nairobi walionekana katika eneo lenye watu wengi la Langata.

Haki miliki ya picha AFP
Image caption Operesheni kubwa ilifanywa kuwasaka simba hao

Baadaye, simba jike na shibli wake walipatikana na wakarejeshwa kwenye mbuga hiyo.

Simba hao wengine inaaminika walirejea wenyewe kwenye mbuga.