Clinton na Sanders wajibizana vikali New York

Clinton Sanders Haki miliki ya picha Getty
Image caption Clinton amekuwa seneta New York naye Sanders ni mzaliwa wa jimbo hilo

Wagombea urais waliosalia katika chama cha Democratic, Hillary Clinton na Bernie Sanders, wamejibizana vikali katika mdahalo uliofanyika katika jiji la New York.

Kila mmoja ametilia shaka uwezo wa mpinzani wake kufanya uamuzi wa busara kuhusu masuala kama vile kudhibiti benki Wall Street, kudhibiti umiliki wa silaha na ujira wa chini.

Jimbo la New York litafanya mchujo wake Jumanne.

Bw Sanders amemkosoa Bi Clinton kwa kuunga mkono vita vya Iraq na kutetea mikataba ya biashara huru.

Lakini naye Bi Clinton amemtuhumu Bw Sanders na kusema hawezi kutekeleza hata sera zake mwenyewe, mfano kuvunja udhibiti wa benki kuu za Wall Street.

Haki miliki ya picha AFP
Image caption Sanders ameshinda majimbo saba kati ya manane yaliyofanya mchujo karibuni

Wote wawili wana uhusiano mkubwa na jimbo hilo la New York.

Bw Sanders alizaliwa huko naye Bi Clinton amekuwa seneta wa jimbo hilo kwa miaka minane.

Mdahalo huo wa runingani umefanyika eneo la Brooklyn.

Bw Sanders ameshinda majimbo saba kati ya manane yaliyofanya mchujo karibuni jambo lililomuwezesha kupunguza uongozi wa Bi Clinton katika mchujo wa chama hicho.

Haki miliki ya picha EPA
Image caption Clinton anajivunia uongozi mkubwa

Bi Clinton hata hivyo bado anajivunia uongozi mkubwa.

Uchaguzi mkuu nchini Marekani utafanyika mwezi Novemba.