Vita Club yaalikwa michuano ya CECAFA

Vita Club ya Jamhuri ya Kidemokrasi ya Congo imealikwa kushiriki katika michuano ya klabu ya shirikisho la CECAFA, mashindano ambayo yataanza tarehe 14 mwezi Julai hadi 28 mwaka huu wa 2012.

Image caption Katibu mkuu wa CECAFA Nicholas Musonye amesema klabu ya Vita Club imealikwa katika michuano ya mwezi Julai Dar es Salaam

Jumla ya timu 11 zitashiriki katika mashindano hayo ya wiki mbili, na ambayo yataonekana moja kwa moja kupitia televisheni katika mataifa 48 ya Afrika.

Mataifa mengine ambayo yatashiriki katika mashindano hayo ni Yanga, ambao ndio mabingwa watetezi, Simba na Azam, kutoka Tanzania, Tusker ya Kenya, APR ya Rwanda, Atletico ya Burundi, Ports ya Djibouti, Mafunzo ya Zanzibar, Wau Salam ya Sudan Kusini na Vita Club ya Jamhuri ya Kidemokrasi ya Congo.

Katika droo iliyofanyika mjini Dar es Salaam, mabingwa Yanga wamepangwa kufungua mashindnao hayo kwa kucheza na Atletico ya Burundi, tarehe 14 Julai.

Kulingana na katibu mkuu wa CECAFA, Nicholas Musonye, CECAFA ina nia ya kuifanya michuano hiyo kuwa kati ya mashindano maarufu zaidi ya soka barani Afrika.

"Ikiwa kuna wadhamini wa kutosha mwaka ujao, huenda tukawa na timu 16, kufuatia vilabu zaidi vya Afrika kuvutiwa na mashindano haya", alielezea Musonye kupitia taarifa ya CECAFA.

Mdhamini mkuu wa CECAFA, Rais Paul Kagame, tayari ameahidi zawadi ya dola za Marekani elfu 60,000, ambazo zitagawanywa na timu tatu bora katika michuano hiyo.

Vita Club ni kati ya vilabu kongwe na maarufu vya soka katika Jamhuri ya Kidemokrasi ya Congo, na ni kati ya vilabu vinne ambayo viliomba kushirikishwa katika michuano hiyo.