Chelsea yairarua Aston Villa 8-0

Imebadilishwa: 23 Disemba, 2012 - Saa 19:04 GMT
Chelsea wakishangilia mojawapo ya magoli yao 8-0

Chelsea imeiangushia kipigo kizito Aston Villa kwa kuicharaza magoli 8-0 katika mechi ya ligi kuu ya England, iliyochezwa katika uwanja wa Stamford Bridge, Jumapili.

Fernando Torres, ndiye aliyeanza kufungua karamu ya magoli kwa vijana wa Rafael Benitez, pale alipopachika bao katika dakika ya tatu ya mchezo.

David Luiz kiungo mahiri aliongeza goli la pili katika dakika ya 29 huku Branislav Ivanovic akishindilia goli la tatu kabla ya kipindi cha kwanza kumalizika.

Frank Lampard alifungua kipindi cha pili kwa bao lake la dakika ya 58 huku Ramires akifunga magoli mawili, na mengine yakifungwa na Oscar, Eden na Hazard wakifunga kila mmoja goli moja moja.

Ushindi huo umezidi kuiimarisha Chelsea katika nafasi ya tatu ya ligi kuu ya England ikiwa na pointi 32 katika mechi 17 ilizocheza.

Kocha wa Aston Villa

Kocha wa Aston Villa akifuatilia mechi yao.

Katika mchezo mwingine uliochezwa Jumapili, vinara wa ligi hiyo Manchester United walitoka sare ya bao 1-1 na Swansea.

Patrice Evra aliifungia timu yake bao la kuongoza katika dakika ya 16 kwa njia ya kichwa kufuatia kona iliyochongwa na Robin van Persie.

Hata hivyo Michu aliisawazishia Swansea katika dakika ya 29.

Mpaka sasa Manchester United inaongoza ligi kuu ya England ikiwa na pointi 43 katika michezo 18, ikifuatiwa na Manchester City yenye pointi 39 na Arsenal imejikita katika nafasi ya nne ikiwa na pointi 30.

Taarifa zinazohusiana

BBC © 2014 Ilani: BBC haihusiki na yaliyoandikwa na tovuti za nje ya BBC.

Ukurasa huu unaonekana vyema kwa kivinjari cha kisasa kikiwa na laha mtindo (CSS).Wakati unaweza kuona yaliyomo katika ukurasa huu kwa kivinjari ulichonacho, hautaweza kufaidi kuona kila kitu vizuri. Tafadhali zingatia uwezekano wa kuboresha progaramu ya kivinjari au kuwezesha laha mtindo (CSS) endapo unaweza kufanya hivyo.