Tanzania yataja kikosi kuikabili Rwanda

Haki miliki ya picha bbc
Image caption Kocha wa timu ya soka ya Tanzania Mdachi Mart Nooij

Kocha wa timu ya taifa ya soka Tanzania, Mdachi Mart Nooij ametangaza kikosi cha wachezaji 26 kitakachoivaa Rwanda katika mechi ya kirafiki itakayochezwa Mwanza, ukanda wa ziwa Victoria. Kaskazini Magharibi mwa Tanzania hapo January 22.

Mechi hiyo itakuwa ni sehemu ya maandalizi kwa timu zote kwa ajili ya kujiandaa na michuano ya kufuzu kucheza fainali za Afrika (CHAN) kwa wachezaji wa ndani (un-professionals) itakayoanza mwezi wa 5 mwaka huu.

Rwanda itakuwa mwenyeji wa fainali za CHAN zitakazofanyika mwakani.

Walioteuliwa ni wachezaji waliochini ya miaka 22 wakiwa ni sehemu ya matayarisho ya kucheza timu ya taifa miaka ijayo.

Wachezaji hao na timu zao katika mabano ni makipa Aishi Manula (Azam), Benedict Tinoco (Kagera Sugar), Peter Manyika (Simba) wakati mabeki ni Miraji Adam, Andrew Vincent (Mtibwa Sugar), Gadiel Mbaga (Azam), Emmanuel Semwanda (African Lyon) Joram Mgeveke ( Mwadui), Salim Mbonde (Mtibwa Sugar) na Edward Charles (Young Africans).

Viungo ni Salum Telela ( Yanga) , Adam Salamba (Bulyankulu FC) wakati Hassan Banda, Mohammed Hussein, Said Makapu na Said Ndemla wakiwa ni wachezaji wa Simba Sports Club.

Viungo wengine ni Hussein Malombe (Geita Gold SC), Shiza Ramadhani (Mtibwa Sugar), Omar Nyenje (Ndanda FC), Hassan Dilunga (Yanga) na Alfredy Masumbakenda ( Bulyankulu SC).

Washambuliaji ni Aboubakar Mohammed (White Bird), Kelvin Friday (Azam FC), Simon Msuva (Yanga), Atupele Mwaisemba na Rashid Mandawa (Kagera Sugar).

Timu hiyo itakuwa na kambi mbili, moja itakuwa Dar es Salaam na baadhi ya wachezaji watafanya mazoezi Mwanza. Kambi hizo zitaanza Jumapili.