Sudan Kusini kucheza mechi ya kwanza Kombe la Dunia

Sudan Kusini
Image caption Sudan Kusini ilicharaza Equatorial Guinea 1-0 mwezi uliopita

Sudan Kusini inajiandaa kucheza mechi yake ya kwanza kabisa ya kufuzu kwa Kombe la Dunia itakapokutana na Mauritania Jumatano.

Taifa hilo changa zaidi duniani lilijiunga na shirikisho la soka duniani 2012, mwaka mmoja baada ya uhuru kutoka kwa Sudan.

Hata hivyo, nchi hiyo itaenda kwa mechi hiyo ya kwanza ya awamu ya mwanzo ya kufuzu kwa Kombe la Dunia ikiwa na imani zaidi baada ya kushinda mechi yake ya kwanza kabisa ya ushindani kimataifa.

Timu ya taifa hilo ililaza Equatorial Guinea 1-0 Septemba 5 kwenye mechi ya kufuzu kwa Kombe la Taifa Bingwa Afrika.

"Tuko tayari, tayari kabisa. Tunajua tunahitaji kufanya nini na tunaweza tukawashangaza wapinzani wetu,” nahodha wa Sudan Kusini Richard Justin Lado aliambia tovuti ya Fifa.

"Kocha wetu Sung-Jea Lee ametufundisha mfumo wa uchezaji ambao unatilia maanani nidhamu katika kujilinda na kucheza mashambulizi ya kujibu. Ninaamini tunaweza kuumiza wapinzani wetu. Tunahitaji kushinda, kwa sababu nyingi, na tutashinda.”

Wapinzani wao Mauritania wameorodheshwa nafasi 55 juu ya Sudan Kusini kwa viwango vya ubora wa soka duniani.

Hii ina maana kwamba watajaribu sana kuwazima mechi ya kwanza na kumaliza kazi watakapokuwa wenyeji wa mechi ya marudiano Jumanne Oktoba 13.

Jumatano pia, Malawi watasafiri Tanzania kwa mechi yao ya mkondo wa kwanza.

Taifa Stars watataka sana kuendeleza uchezaji wao mzuri ambao wamekuwa nao tangu nyota wao wa zamani Charles Boniface Mkwasa amrithi Mholanzi Mart Nooij kama kocha wa timu ya taifa.

Mauritius watakaribisha Kenya kwao nyumbani siku hiyo, nao Ushelisheli wawe wenyeji wa Burundi mechi hizo nyingine za hiyo siku.