Ranieri: Leicester sio Man City au United

Ranieri Haki miliki ya picha Reuters
Image caption Ranieri amesema hawataki kupoteza mwelekeo

Claudio Ranieri amesema iwapo klabu mbili za Manchester ndizo zingekuwa katika nafasi ambayo Leicester City kwa sasa wamo, basi watu wengi wangeamini mbio za ligi “zimeisha”.

Leicester wamo kileleni mwa Ligi ya Premia zikiwa zimesalia mechi nne msimu huu.

Ranieri amesema Leicester, ikizingatiwa kwamba walinusurika kushushwa daraja miezi 12 iliyopita, wamefanya makubwa sana msimu huu.

Hata hivyo amesema ni lazima washinde taji la ligi ndipo waweze kukumbukwa kwa “miaka 30 au 40 ijayo”.

"Hatujashinda chochote bado,” amesema Mwitaliano huyo mwenye umri wa miaka 64.

“Soka huwa na maajabu yake. Kama haungekuwa hapa Leicester lakini uko kwingine tuseme City au United, ukiwa na alama saba au zaidi mbele, ungesema ‘mambo yameisha’.

"Kwa sasa hauwezi kufikiria hivi. Kisa? Sisi ni Leicester. Lazima tupambane na tuwe na mwelekeo na kuwa thabiti.

Leicester wameshinda mechi zao tano zilizopita bila kufungwa bao. Hata hivyo walitoka sare 2-2 na West Ham Jumapili.

Haki miliki ya picha Getty
Image caption Leicester walilaza Sunderland 2-0

Ushindi wao wa 2-0 ugenini Sunderland Jumapili iliyotangulia uliwahakikishia kumaliza katika nafasi nne za kwanza.

Mambo makubwa yasipofanyika, kwa mfano Manchester City na Liverpool kushinda Ligi ya Klabu Bingwa Ulaya na Europa League, basi wamehakikishiwa kucheza hatua ya muondoano wa kufuzu Ligi ya Klabu Bingwa Ulaya.