Uingereza yatishia ubalozi wa Ecuador

Imebadilishwa: 16 Agosti, 2012 - Saa 03:09 GMT

Wakati Julian Assange, alipotorokea ubalozi wa Ecuador miezi miwili iliyopita, Serikali ya Uingereza ilisema kuwa alikuwa amekwepa mikono ya maafisa wa usalama wa taifa hilo.

Maafisa wa Uingereza walieleza kwamba bado wangalimtia mbaroni Assange kama angaliondoka kwenye ubalozi huo, kwa madai kuwa alikataa kutii masharti ya kuachiliwa kwa dhamana na mahakama. Ilidhaniwa kuwa bora tu aendelee kuwa katika ubalozi wa Ecuador alikuwa salama.

Hata hivyo Uingereza imebadili kauli yake na kusema kuwa inaweza kuingia katika ubalozi wa Ecuador mjini London na kumtia mbaroni Assange chini ya Sheria maalumu inayohusiana na maswala ya kibalozi ya mwaka 1987.

Waziri wa mashauri ya Kigeni wa Ecuador ameshutumu kauli hiyo ya Uingereza na kusema kwamba ni vitisho ambavyo "ni kinyume cha demokrasia, na tabia ya watu wasiostaarabika wala kuheshimu sheria. Waziri Ricardo Patino alisema kuwa Uingereza ikiingia katika ubalozi wake, kitendo hicho kitatambuliwa kama uchokozi.

Msemaji wa Wizara ya Mashauri ya kigeni wa Uingereza amefafanua kuwa Uingereza ingali ina matumaini kwamba maafikiano yatapatikana kidiplomasia. Lakini maafisa wa Uingereza wangali wanasisitiza kuwa ni wajibu wao kumkamata na kumhamisha Assange hadi Sweden ambako anakabiliwa na madai ya ubakaji kutoka kwa wanawake kadhaa.

BBC © 2014 Ilani: BBC haihusiki na yaliyoandikwa na tovuti za nje ya BBC.

Ukurasa huu unaonekana vyema kwa kivinjari cha kisasa kikiwa na laha mtindo (CSS).Wakati unaweza kuona yaliyomo katika ukurasa huu kwa kivinjari ulichonacho, hautaweza kufaidi kuona kila kitu vizuri. Tafadhali zingatia uwezekano wa kuboresha progaramu ya kivinjari au kuwezesha laha mtindo (CSS) endapo unaweza kufanya hivyo.