Filamu

Lupita-TwitterCopyright: Lupita-Twitter

Nyota wa Hollywood kutoka nchini Kenya Lupita Nyong'o ametembelea kwa mara ya kwanza mbuga ya wanyama ya Tanzania ya Serengeti, Aprili 5, 2021,.

Mwanamitindo huyo muigizaji alipiga picha na kuiweka kwenye mitandao yake ya kijamii na kuandika serengeti.

Picha hiyo aliyojipiga mwenyewe yaani selfie inaonesha mazingira ya mbuga hiyo na kukiwa na tembo nyuma yake.

Miezi michache iliyopita, kulitokea gumzo la kwanini Lupita hakupewa ubalozi wa utalii nchini Kenya na kupewa mwanamitindo wa Uingereza Naomi Campbell.

Lakini waziri wa Utalii nchini Kenya Najib Balala alitetea uamuzi wa kumtaja mwanamitindo wa Uingereza Naomi Campbell kuwa balozi wa utalii kimataifa kwa nchi hiyo.

Wakati wa hafla ya umma, Bwana Balala alisema anajua Wakenya wengi wameuliza kwanini muigizaji wa Hollywood Lupita Nyong'o hakuchaguliwa katika nafasi hiyo.

Waziri akajibu kwamba wamekuwa wakimtafuta Bi. Nyong'o lakini hajapatikana kwa kipindi cha miaka mitano iliyopita.

Muigizaji huyo wa Kenya ambaye pia ni mshindi wa tuzo ya Oscar alipendekezwa na Wakenya katika mitandao ya kijamii kuwa mtu sahihi wa kushikilia nafasi ya balozi wa utalii kimataifa kuwakilisha Kenya.

Bwana Balala alisema Bi. Campbell amechukua nafasi hiyo kwa maslahi ya umma na kwamba serikali inafanyia kazi namna ya kutumia ushawishi wake kutangaza utalii, kulingana na vyombo vya habari vya nchini Kenya.

• Lupita Nyong'o adai kunyanyaswa kijinsia na Weinstein
• Lupita Nyong'o alikosoa jarida kwa kuhariri picha yake

Erick OmondeCopyright: Erick Omonde

Afisa Mkuu Mtendaji wa Bodi ya Ukaguzi Filamu nchini Kenya (KFCB), Dkt Ezekiel Mutua, ametangaza kwamba mchekeshaji Eric Omondi, amekamatwa kwa kukiuka kanuni ya maadili ya bodi hiyo.

''Maafisa wa Ufuatiliaji wa Bodi ya Uainishaji wa Filamu Kenya wakishirikiana na Maafisa wa Polisi kutoka Kurugenzi ya Upelelezi wa Makosa ya Jinai (DCI) leo mchana wamemkamata Eric Omondi kwa kukiuka masharti ya Sheria ya Filamu na Maonyesho ya Sura 222 ya Sheria za Kenya kwa kutengeneza na kusambaza filamu ambayo haijaidhinishwa kwa jina "Wife Material.",taarifa ya Dkt. Mutua ilisema.

Kama hatua ya kutia mkazo tangazo hilo Dkt. Mutua pia ameweka tangazo hilo katika Twitter yake.

Hii sio mara ya kwanza Dkt Mutua na Eric Omondi kutofautiana kuhusu maudhui ya filamu hiyo.

Katika onyesho jipya la filamu hiyo, "Wife material" wa Eric Omondi inayojumuisha wahusika kutoka Kenya na Tanzania wanaonekana wakipigana hadharani na kulazimu polisi kuingilia kati.

''Vita hivyo'' vilianza wakati mmoja wa warembo hao aliangusha meza na kuvunja glesi zilizokuwa mezani na kumwaga vileo.

Kanda ya filamu hiyo iliyosambazwa mitandaoni imeibua mjadala mkali baadhi ya mashabiki wake wakiuliza ikiwa ni uigizaji au ni uhalisia.

Hatua hiyo imemghadhabisha Mkuu wa KFCB, Ezekiel Mutua, aliyetaja kuwa filamu “iliyooza"

Aidha Bw. Mutua amesema Bodi itachukua hatua zote zinazowezekana za kisheria kuzuia utengenezaji na maonyesho ya filamu zisizoruhusiwa kwenye jukwaa lolote linalokusudiwa kuwa maonyesho ya umma.