அலைபேசியில் குரல் மூலம் தமிழில் டைப் செய்வது எப்படி?

இதை பகிர Email இதை பகிர ஃபேஸ்புக்கில் இதை பகிர டுவிட்டரில் இதை பகிர வாட்ஸ்அப்

Image copyright metamorworks

கணினியின்/ அலைபேசியின் தாக்கம் உலகம் முழுவதும் அதிகரித்தபோதும், அத்தியாவசமான ஒன்றாக மாறியபோதும் தமிழ் மொழில் தட்டச்சு செய்வது எப்படி என்ற கேள்வி மக்களிடையே எழுந்தது, மறைந்தது.

இந்நிலையில், தொழில்நுட்பத்தின் அபரிதமான வளர்ச்சியின் காரணமாக தற்போது தமிழில் பேசுவதை எப்படி எழுத்துக்களாக மாற்றுவது என்பதில் கேள்விகளும், ஐயப்பாடும் நிலவுகிறது.

பிபிசி தமிழின் பிரத்யேக வாராந்திர தொடரின் சிறப்பு பகுதியில், ஒவ்வொரு வாரமும் பயன்பாட்டாளர்களின் தினசரி வாழ்க்கையில் பயன்படும் தகவல்களை விளக்கி வருகிறோம். அந்த வகையில் இந்த வாரம், கூகுள் நிறுவனத்தின் குரல் வழித் தேடல் பயன்படுத்தி குரல்வழியில் தமிழில் தட்டச்சு செய்வது என்பது குறித்து காண்போம்.

கூகுள் பிளே ஸ்டோருக்கு சென்று, ஜிபோர்டு (Gboard) என்ற செயலியை பதிவிறக்கம் செய்து, அலைபேசியில் நிறுவுங்கள் (இன்ஸ்டால்).

பிறகு உங்களது அலைபேசியின் செட்டிங்ஸ் (Settings) பகுதிக்கு சென்று, அதில் லாங்குவேஜஸ் & இன்புட் (Languages & Input) என்ற பிரிவை தேர்ந்தெடுத்து அதில் ஜி போர்டு (Gboard) என்னும் தெரிவை தேர்ந்தெடுக்கவும். அதில் வாய்ஸ் டைப்பிங் (Voice Typing) என்பதை தேர்ந்தெடுத்தவுடன் வரும் திரையில் லாங்குவேஜஸ் (Languages) என்ற தெரிவில் ஏற்கனவே தமிழை தவிர்த்து ஆங்கிலம் உள்பட எந்த மொழி தேர்ந்தெடுக்கப்பட்டிருந்தாலும், அதை நீக்கிவிட்டு தமிழை (இந்தியா, இலங்கை, சிங்கப்பூர், மலேசியா ஆகிய ஏதாவது ஒன்றை) தேர்ந்தெடுங்கள்.

Image copyright Google

வாட்ஸ்ஆப், பேஸ்புக் உள்ளிட்ட எல்லா செயலியிலும், உங்களது கீ போர்டில் உள்ள குரவல்வழி பதிவை (மைக் ஐகான்) தேர்ந்தெடுத்து உங்களது குரலை உடனடியாக தமிழ் எழுத்துக்களாக மாற்றுங்கள்!

(Settings - Languages & Input - ஆகியவற்றை தேர்ந்தெடுத்த பிறகு, உங்களது அலைபேசியில் கூகுள் வாய்ஸ் டைப்பிங் (Google Voice Typing) - என்ற தெரிவு இருந்தால், அதில் Languages பிரிவில் தமிழை தேர்ந்தெடுப்பதன் மூலம் ஜிபோர்டு செயலியை பதிவிறக்கம் செய்யாமலேயே உங்களால் தமிழில் குரல்வழி தட்டச்சு செய்ய முடியும் )

Image copyright MagicScroll

உலக அளவில் கடந்த வாரம் வெளியான சில முக்கிய தொழில்நுட்ப செய்திகளைத் தொகுத்து வழங்குகிறது பிபிசி தமிழின் இந்த பிரத்யேக வாராந்திர தொழில்நுட்ப தொடர்.

விரித்து, சுருட்டி வைத்துக்கொள்ளும் வகையிலான மொபைல் தயாரிப்பு

உருளை வடிவ சிறு குழாய் போன்ற வித்தியாசமான வடிவத்தில் இருக்கும் அலைபேசி, கண்ணிமைக்கும் நேரத்தில் 7.5 அங்குல திரையுள்ள டேப்லெட்டாக மாறினால் எப்படி இருக்கும்? இதுவரைக்கும் கனவாக, எதிர்கால தொழில்நுட்ப வருகையாக பார்க்கப்பட்ட இதுபோன்ற தொழில்நுட்ப கருவியை உருவாக்கியுள்ளனர் கனடாவின் ஒண்டாரியோ மாகாணத்திலுள்ள குயின்ஸ் பல்கலைக்கழக விஞ்ஞானிகள் உருவாக்கியுள்ளனர்.

காலங்காலமாக மக்களின் தகவல் மூலமாக இருந்துவரும் செய்தித்தாளை படித்து முடித்துவிட்டு, சுருட்டி வைத்துக்கொண்டு நகர முடியும். ஆனால், ஏன் அதுபோன்ற தொழில்நுட்ப கருவியை உருவாக்க கூடாது என்று எழுந்த கேள்வியின் பதிலாகத்தான், மடித்து, சுருட்டி வைத்துக்கொள்ளக்கூடிய மேஜிக்ஸ்க்ரோல் என்னும் இந்த கருவியை உருவாக்கியுள்ளதாக கூறுகிறார் இந்த ஆராய்ச்சியின் தலைமை விஞ்ஞானியான வெர்டேகால்.

Image copyright MagicScroll

7.5 அங்குல திரையும், 2K ரெசல்யூஷனும் கொண்ட இந்த உருளை வடிவ கருவியை மடித்து வைத்துக்கொண்டே அதன் இருமுனைகளிலுள்ள சக்கரம் போன்ற அமைப்பை திருகுவதன் மூலமும், திரையை தொடுவதன் மூலமும் வழக்கம்போல் போன் செய்யலாம், செயலிகளை பயன்படுத்தலாம்.

அதேசமயத்தில், பயன்பாட்டாளர்கள் தங்களுக்கு வேண்டும்போது, அந்த திரையை வெளியே இழுத்து, கையடக்க கணினி (டேப்லெட்) போன்று பயன்படுத்தி கொள்ளும் வகையில் இது உருவாக்கப்பட்டுள்ளது. இதன் செயற்பாட்டுக்கு தேவையான அனைத்து அமைப்புகளும் உருளையின் உட்புறத்தில் வைக்கப்பட்டுள்ளதாக விஞ்ஞானிகள் தெரிவித்துள்ளனர்.

எச்சரிக்கை: வெளியார் தகவல்களில் விளம்பரங்கள் இருக்கலாம்

சாம்சங், ஆப்பிள் போன்ற பல்வேறு நிறுவனங்கள் மடித்து, விரிக்கும் வகையிலான அலைபேசி உருவாக்கும் முயற்சியில் பல்வேறு ஆண்டுகளாக ஈடுபட்டு வருவதாக கூறப்பட்டு வரும் சூழ்நிலையில் அவர்களுக்கு முன்னதாகவே உருவாக்கப்பட்டுள்ள இந்த கருவி இதுசார்ந்த ஆராய்ச்சிகளுக்கு புத்துணர்ச்சி அளிக்கும் என்று கருதப்படுகிறது.

யூடியூப்பில் பயன்பாட்டு நேரத்தை கண்காணிக்கும் புதிய வசதி அறிமுகம்

ஒரு பயனர் தனது யூடியூப் செயலியில் (அப்ளிகேஷன்) அன்றைய நாளில், கடந்த ஏழு தினங்களில் மற்றும் ஒருநாளைக்கு சராசரியாக செலவிட்டுள்ள நேரத்தை அறிந்துகொள்ளும் வசதியை யூடியூப் அறிமுகப்படுத்தியுள்ளது.

Image copyright Google

நிஜ வாழ்வில் செலவிடும் நேரத்தை விட அலைபேசி, கணினி, மடிகணினி உள்ளிட்ட தொழில்நுட்ப கருவிகளில் நேரத்தை பயன்பாட்டாளர்கள் செலவிடும் நிலை உலகம் முழுவதும் அதிகரித்து வருகிறது.

தொழில்நுட்பம் சார்ந்த கருவிகள் வாழ்க்கையில் எந்தளவிற்கு மேம்பாட்டுக்கு உதவுகிறதோ, அது ஒரு குறிப்பிட்ட அளவை விஞ்சும்போது அதைவிட அதிகமான அளவு பாதிப்பை ஏற்படுத்தக்கூடியது. இந்நிலையில், டிஜிட்டல் பிட்னஸ் என்ற கருத்தாக்கம் உலகளவில் முக்கிய இடத்தை பிடித்து வரும் சூழ்நிலையில், பேஸ்புக்கை தற்போது யூடியூப் நிறுவனமும் ஒரு பயன்பாட்டாளர் தனது செயலில் செலவிடும் நேரத்தை அறிந்துகொள்ளும் வசதியை அறிமுகப்படுத்தியுள்ளது.

யூடியூப் செயலில் தான் செலவிட்டுள்ள நேரத்தையும், ஒரு வாரகால சராசரியை பயன்பாட்டாளர் அறிந்துகொள்வதோடு மட்டுமல்லாமல், ஒருவர் தான் யூடியூப் செயலியில் செலவிடும் நேரத்தை கட்டுப்படுத்துவதும் வகையில், ஒரு குறிப்பிட்ட நேரத்தை கடக்கும்போது தகவல் தெரிவிக்கும் வசதியும் தற்போது சேர்க்கப்பட்டுள்ளது.

நீங்கள் உங்களது கூகுள் கணக்கில் உள்நுழைந்து பார்க்கும் அனைத்து காணொளிகள் தரவுகளையும் கொண்டு இது கணக்கிடப்படுகிறது. ஆனால், நீங்கள் யூடியூப் மியூசிக், டிவி, இன்காக்நிட்டோ போன்றவற்றை பயன்படுத்தி பார்க்கும் காணொளிகள் இந்த கணக்கில் சேர்க்கப்படாது என்று அந்நிறுவனம் தெரிவித்துள்ளது.

பிற செய்திகள்:

சமூக ஊடகங்களில் பிபிசி தமிழ் :