டிரம்ப்-புதின் மாநாடு: 'நல்ல தொடக்கம்' என டிரம்ப் புகழாரம்

  • 16 ஜூலை 2018
டிரம்ப்-புதின் மாநாடு படத்தின் காப்புரிமை Getty Images

ரஷ்யாவுடன் இணைவது "நல்ல ஒரு விஷயம் என்றும், அது கெட்டது அல்ல" என்றும் அமெரிக்க அதிபர் டொனால்ட் டிரம்ப் தெரிவித்துள்ளார்.

ரஷ்ய அதிபர் புதினுடனான முதல் உச்சிமாநாட்டின் தொடக்கத்தில் அவர் இவ்வாறு கூறினார்.

ஃபின்லாந்து நாட்டின் ஹெல்ஸின்கி நகரத்தில் ரஷ்ய அதிபர் புதினும், அமெரிக்க அதிபர் டிரம்பும் சந்தித்ததை தொடர்ந்து, "ரஷ்யாவுடன் நல்ல உறவை எதிர்பார்ப்பதாக" டிரம்ப் தெரிவித்தார்.

முன்னதாக, அமெரிக்க - ரஷ்ய நாடுகளுக்கு இடையேயான பதற்றத்திற்கு கடந்த நிர்வாகங்கள்தான் காரணம் என டிரம்ப் குற்றஞ்சாட்டியிருந்தார்.

அமெரிக்காவும், ரஷ்யாவும் நீண்டகால எதிரிகளாக இருந்து வந்தாலும், கடந்த 2016ஆம் ஆண்டு நடந்த அமெரிக்க அதிபர் தேர்தலில் ரஷ்யா தலையிட்டதாக எழுந்த குற்றச்சாட்டு அவர்களுக்கிடையேயான பகைமையை இன்னமும் அதிகரித்தது.

இதுகுறித்து தனது ட்விட்டரில் கருத்து தெரிவித்த அவர், பல ஆண்டுகளாக அமெரிக்கா முட்டாள்தனமாக நடந்து கொண்டதுதான், ரஷ்யாவுடனான உறவு சீரழிந்ததற்கு காரணம் என்று கூறினார்.

இதற்கு பதிலளித்துள்ள ரஷ்ய வெளியுறவுத்துறை அமைச்சகம், "நாங்கள் ஒப்புக் கொள்கிறோம்" என்று ட்வீட் செய்துள்ளது.

இந்த உச்சிமாநாட்டில் எந்த திட்டமும் இருக்காது என இருதரப்பும் ஒப்புக்கொண்டதாக அமெரிக்க தேசிய பாதுகாப்பு செயலாளர் ஜான் போல்டன் தெரிவித்தார்.

படத்தின் காப்புரிமை Getty Images

அமெரிக்கா - ரஷ்யா என்னதான் பிரச்சனை?

இதன் தொடக்கத்தை அறிய வேண்டுமென்றால் 1945-1989ஆம் ஆண்டுகளுக்கிடையில் நடந்த பனிப்போருக்கு செல்ல வேண்டும்.

இவ்விரு நாடுகளும் நேரடியாக சண்டையிட்டதில்லை. சோவித் யூனியன் வீழ்ந்த பிறகு, மற்றும் உலகின் வல்லரசு நாடாக அமெரிக்கா எழுந்த பிறகும் கூட இந்த நாடுகளுக்கிடையேயான பகைமை குறைந்தபாடில்லை.

குறிப்பாக, கடந்த 2014ஆம் ஆண்டு ரஷ்யா உக்ரைனின் கிரிமியாவை தன்னுடன் இணைத்துக்கொண்டது இருநாடுகளுக்கிடையேயான உறவை மேலும் மோசமடைய செய்தது. அதன் காரணமாக, அமெரிக்கா மற்றும் பல உலக நாடுகள் ரஷ்யா மீது தீவிரமான பொருளாதார தடைகளை விதித்தன.

இந்த சந்திப்பு ஏன் மிகவும் முக்கியமானதாக கருதப்படுகிறது?

2016ஆம் ஆண்டு நடந்த அமெரிக்க அதிபர் தேர்தலில் டிரம்புக்கு ஆதரவாக ரஷ்யாவின் தலையீடு இருந்ததன் காரணமாகவே அவர் வெற்றிபெற்றார் என்ற கருத்து எழுந்ததால் டிரம்ப் - புதின் இடையிலான உறவு உலகளவில் கவனமுடன் ஆராயப்படுகிறது. ஆனால், இந்த குற்றச்சாட்டுகளுக்கு ரஷ்யா தொடர்ந்து மறுப்புத் தெரிவித்து வருகிறது.

படத்தின் காப்புரிமை Getty Images

மேலும், அதிபர் தேர்தலின்போது ரஷ்யா செய்தது என்ன மற்றும் ரஷ்யாவுக்கும் டிரம்பின் தேர்தல் பிரசார குழுவுக்கும் தொடர்பேதாவது உள்ளதா என்பதை ஆராய்வதற்கு அமைக்கப்பட்ட ராபர்ட் முல்லர் தலைமையிலான குழுவின் விசாரணையை "சூனிய வேட்டை" என்று கூறி டிரம்ப் ரத்து செய்திருந்தார்.

தேர்தலில் தோல்வியுற்ற ஜனநாயக கட்சியினரின் கசப்புணர்வால் உந்தப்பட்ட பொய் குற்றச்சாட்டு இது என்று டிரம்ப் தொடர்ந்து கூறி வருகிறார்.

கடந்த ஆண்டு ஜனவரி மாதம் அமெரிக்க அதிபராக பதவியேற்ற டொனால்டு டிரம்ப், தனது குடியரசு கட்சியின் பாரம்பரிய கொள்கைக்கு எதிராக ரஷ்யாவுடனான உறவை பலப்படுத்துவதற்கு முயற்சித்து வருகிறார்.

கிரிமியாவை தன்னுடன் இணைத்துக்கொண்டதற்காக ஜி8 நாடுகளின் கூட்டமைப்பிலிருந்து வெளியேற்றப்பட்ட ரஷ்யாவை மீண்டும் சேர்த்துகொள்ளும் முடிவுக்கு டிரம்ப் கடந்த மாதம் ஆதரவு தெரிவித்திருந்தார்.

இருவரும் ஒருவரைப்பற்றி ஒருவர் கூறியதென்ன?

புதினினை பாராட்டும் வகையிலான பல கருத்துகளை டிரம்ப் கூறியுள்ளார். குறிப்பாக புதினை சிறந்த தலைவர் என்றும், அமெரிக்க முன்னாள் அதிபர் பராக் ஒபாமைவிட சிறந்த தலைவர் என்றும் கடந்த 2016ஆம் ஆண்டே டிரம்ப் கூறியிருந்தார்.

மேலும், கடந்த மார்ச் மாதம் நடைபெற்ற ரஷ்ய அதிபர் தேர்தலில் மீண்டும் சர்ச்சைக்கு மத்தியில் வெற்றிபெற்ற புதினுக்கு வாழ்த்து தெரிவிக்க வேண்டாமென்று தனது ஆலோசகர்கள் கூறியதையும் கேட்காமல், டிரம்ப் புதினுக்கு தனது வாழ்த்துக்களை தெரிவித்திருந்தார்.

ஆனால், டிரம்ப் குறித்து சில சமயங்களே பேசிய போதும் புதின் வார்த்தைகளை கவனமுடனே கையாண்டார். இருந்தபோதிலும், புதின் டிரம்பை "மிகவும் சாமர்த்தியமான மனிதர், புத்திசாலி" என்று பாராட்டியுள்ளார்.

பிற செய்திகள்:

சமூக ஊடகங்களில் பிபிசி தமிழ்: