பெண்களை வாக்களிக்க அனுமதிக்காத பாகிஸ்தானின் விசித்திர கிராமங்கள்

வரலாறு படைக்கிறார் ஹமீதா ஷாஹித். பாகிஸ்தானில் ஆஃப்கன் எல்லையில் இருக்கும் பழமைவாத பழங்குடி பகுதியில் இருக்கும் ஒரு நாடாளுமன்றத் தொகுதியில் வரவிருக்கும் தேர்தலில் போட்டி இடுகிறார் இவர்.

ஒரு காலத்தில் தாலிபன்கள் வலுவாக இருந்த பகுதி இந்த டிர். அங்கு பெண்களுக்கென வெகு சொற்ப உரிமைகளே இருந்தன. அவர்களுக்கு அப்போது தேர்தலில் போட்டியிட அல்ல வாக்களிக்கவே உரிமைகள் மறுக்கப்பட்டன.

இம்ரான்கானின் கட்சியான பாகிஸ்தானின் தெஹ்ரீக் இ இன்சாஃப் கட்சியின் (பி.டி.ஐ) சார்பாக அவர் அந்த தொகுதியில் போட்டியிடுகிறார்.

உரக்க ஒலிக்கும் கோஷம்

ஹமிதா வீட்டிலிருந்து வெளியே வந்த மறுகணமே 'வாழ்க பி.டி.ஐ' என்ற கோஷம் உரக்க கேட்கிறது. அங்கு குழுமி இருக்கும் ஆண்கள்தான் இந்த கோஷத்தை எழுப்புகிறார்கள். சில பள்ளி மாணவர்கள் அங்கு சில நிமிடங்கள் நின்று, அங்கு நடக்கும் காட்சிகளை பார்க்கிறார்கள்.

"ஒரு பெண்ணால் தேர்தலில் வாக்களிக்க முடியுமென்றால், அவரால் தேர்தலில் போட்டியிடவும் முடியும்தானே? இந்த நினைப்புதான் என்னை தேர்தலில் போட்டியிட தூண்டியது" என்கிறார் ஹமீதா.

கடந்த ஆண்டு, டிர் பகுதியில் நடந்த தேர்தல் முடிவுகளை ஒப்புக் கொள்ள மறுத்தது பாகிஸ்தான் தேர்தல் ஆணையம். அதற்கு காரணம் அந்த தேர்தலில் எந்த பெண்ணும் வாக்களிக்கவில்லை என்பதுதான்.

அந்த நாட்டு சட்டத்தின் படி, தேர்தல் நடைபெறும் தொகுதியில் குறைந்தது 10 சதவீத பெண்களாவது வாக்குபதிவு செய்து இருக்க வேண்டும். அப்போதுதான் தேர்தல் செல்லும்.

என்ன சொல்கிறார் ஹமீதா?

"நான் கட்சி வித்தியாசம் இல்லாமல் பெண்களை சந்திக்கிறேன். அவர்கள் எந்த கட்சியை சார்ந்தவர்களாக இருந்துவிட்டு போகட்டும். ஒரு பெண் இந்த தொகுதியில் போட்டி இடுகிறார். உங்கள் வாக்கு யாருக்கு என்று கேட்கிறேன்? அவர்கள் 'எங்கள் வாக்கு உங்களுக்குதான்' என்கிறார்கள். அவர்களுக்கு வாக்களிக்கும் உரிமை கிடைத்ததால் சந்தோஷமாக இருக்கிறார்கள். இப்போது இந்த நாடாளுமன்ற தேர்தலில் நான் வெல்ல வேண்டும் என்று நினைக்கிறார்கள்" என்கிறார்.

பாகிஸ்தான் வரலாற்றிலேயே முதல்முறையாக இப்போதுதான் டிர் தொகுதியில் பெண் ஒருவர் போட்டியிடுகிறார்.

அவருடைய கட்சியின் ஆண் ஆதர்வாளர்கள் பி.டி.ஐ கட்சி கொடியில் உள்ள வண்ணங்கள் நிறைந்த கழுத்துத் துண்டு ஒன்றை அளித்து இருக்கிறார்கள். அதனை அவர் அணிந்து, தீவிரமான வாக்கு சேகரிப்பில் ஈடுபட்டு இருக்கிறார்.

ஆனால், எல்லா இடத்திலும் இப்படியான நிலை இல்லை. பாகிஸ்தானில் வளர்ச்சி அடைந்த பகுதிகளில் கூட பெண்கள் வாக்களிக்க தடை விதிக்கப்பட்டுள்ளது. இந்த தடையை விதித்தது ஆண்களும், உள்ளூர் பெரியவர்களும்.

வாக்களிக்கத் தடை

பெண்கள் தேர்தலில் வாக்களிப்பது தடுக்கப்பட்டது பழமைவாத டிர் பகுதியில் மட்டுமல்ல. அது அந்நாடெங்கும் நடக்கிறது, பாகிஸ்தானின் வளர்ந்த மாகாணமாக கருதப்படும் பஞ்சாபிலும் கூட பெண்கள் வாக்களிவிடாமல் தடுக்கப்பட்டு இருக்கிறார்கள்.

பாகிஸ்தான் தலைநகரமான இஸ்லாமாபாத்திலிருந்து 150 கி.மீ தொலைவில் இருக்கிறது துர்னல் கிராமம். இந்த கிராமத்திற்கு என்று ஒரு நீண்ட பாரம்பரியம் உள்ளது. ஆனால், அது மகிழ்ச்சி அளிக்கும் பாரம்பரியம் அல்ல. ஆம், அந்த பகுதியில் பெண்கள் பல காலமாக தேர்தலில் வாக்களிக்கவிடாமல் தடுக்கப்பட்டு இருக்கிறார்கள்.

1962 ஆண்டு தேர்தலில் நீண்ட வரிசையில் பெண்கள் வாக்களிக்க நின்று கொண்டிருந்த போது அவர்களுக்குள் சச்சரவு ஏற்பட்டது. இதனால் தங்கள் கெளரவம் போய்விட்டதாகவும், பெரும் அவமானம் நிகழ்ந்துவிட்டதாகவும் நினைத்த ஆண்கள், பெண்கள் தேர்தலில் வாக்களிக்க தடை விதித்தனர்.

அரை நூற்றாண்டு காலம் ஆகி இருந்தாலும், இன்றும் அந்தப் பகுதியில் தடை நீடிக்கிறது.

துர்னல் கிராமம் மிக ரம்மியமான பகுதி. அந்தப் பகுதியில் 15 ஆயிரத்திற்கும் மேற்பட்ட மக்கள் வசிக்கிறார்கள். அங்கு பெரும் பரப்பில் நிலக்கடலை பயிரிடப்படுகிறது.

வீடுகளும் விஸ்தாரமாக இருக்கிறது. வீடுகளும் நவீனமாக கற்கள், சிமெண்ட் கொண்டு கட்டப்பட்டு இருக்கின்றன. சராசரி விவசாய கிராமத்தை விட இந்த துர்னலில் கல்வி அறிவும் அதிகமாகதான் இருக்கிறது.

தேர்தல் வாக்களிக்க விரும்பும் ஒரு பெண்ணை அந்த கிராமத்தில் சந்தித்தேன். அவரிடம் உரையாடும் போது அவரது பதற்றத்தை என்னால் புரிந்துக் கொள்ள முடிந்தது.

பண்பாடாகவே மாறிவிட்டது

அந்த சமூக அழுத்தம் அதிகமாக இருக்கும் காரணத்தால், அந்த பெண் தன்னுடைய உண்மையான பெயர் பிரசுரம் ஆகிவிடக் கூடாது என்று விரும்பினார். அதன் காரணமாக அவரது பெயரை மாற்றி உள்ளோம்.

என் வாழ்நாளில் எந்த பெண்ணும் வாக்களித்ததை நான் கண்டதே இல்லை. எங்கள் கிராமத்து ஆண்கள் தங்கள் வீட்டு பெண்களை வாக்களிக்க வாக்குச் சாவடிக்கு செல்ல அனுமதிக்க மாட்டார்கள். இது இங்கு ஒரு பண்பாடாகவே மாறிவிட்டது என்கிறார் இராம். அவரது முகம் முழுவதும் முக்காடிடப்பட்டி இருக்கிறது. அவரது கண்கள் மட்டுமே வெளியே தெரிகின்றன.

மேலும் அவர், "இங்கு சில ஆண்கள் மனதில் நினைத்தால் கூட, தைரியமாக தங்கள் வீட்டு பெண்களை வாக்களிக்க அனுப்ப மாட்டார்கள். ஏனெனில் அவரும் இந்த சமூகத்தில் வாழ வேண்டும்தானே" என்கிறார்.

இதன் காரணமாகதான் கடந்த தேர்தலில் 17 வாக்குச் சாவடிகளில் ஒரு பெண் கூட வாக்களிக்கவில்லை. ஆனால், இராம் இதனை மாற்ற வேண்டும் என்பதில் தீர்க்கமாக இருக்கிறார். அவர் ஒரு அரசு சாரா அமைப்புடன் இணைந்து, தனது வீட்டில் ரகசியமாக பெண்கள் குழுவை திரட்டி, வாக்களிப்பதன அவசியம் குறித்து ஒரு கலந்தாலோசனை கூட்டத்தை நடத்தி இருக்கிறார்.

வளர்ச்சிக்கான போடொஹர் அமைப்பின் மண்டல மேலாளராக இருக்கிறார் நஹிதா அப்பாஸி.

அவர் கடந்த ஆண்டுகளாஜ்க அந்த கிராம ஆண்களிடம் பெண்களை வாக்களிக்க அனுப்பும்படி பிரசாரம் செய்து வருகிறார். ஆனால், எதுவும் பலன் தரவில்லை. இந்த பழமைவாத கிராமத்தில் பெண்களுடன் உரையாடுவது அவருக்கு பெரும்தடையாக இருக்கிறது. அவருக்கு அந்த கிராமத்தை சேர்ந்த இராம்தான் உதவி வருகிறார்.

வீட்டில் இருப்பதே சிறந்தது

நஹிதா கைகளில் ஒரு தட்டி வைத்திருக்கிறார். அதில், "ஓட்டு சீட்டு உங்களுடைய சக்தி, உங்களுடைய எதிர்காலம் அதில்தான் இருக்கிறது" என்று பெரிய எழுத்துகளில் எழுதப்பட்டு இருக்கிறது. அங்கு கூடி இருக்கும் பெண்களிடம் தேர்தல் நடைமுறைகள் குறித்து விளக்குகிறார்.

ஆனால் அங்கு கூடி இருக்கும் பெண்களில் சிலர் நஹிதாவிடம் முரண்படுகிறார்கள். முக்காடிட்ட ஒரு பெண், "எங்களது தேவைகள் அனைத்தும் கெளரவமாக நிறைவேற்றப்படுகிறது. நாங்கள் வெளியே சென்று, அவமதிப்புக்கு உள்ளாக வேண்டாம் என்று எங்கள் வீட்டு ஆண்கள் நினைக்கிறார்கள். தேர்தல் தினத்தன்று வாக்குச்சாவடியில் பல ஆண்கள் திரண்டு இருப்பார்கள். அதனால், நாங்கள் வீட்டில் இருப்பதே சிறந்தது" என்கிறார் அந்தப் பெண்.

நஹிதா பொறுமையாக அந்தப் பெண் சொல்வதை எல்லாம் கேட்கிறார். பின் அந்த்ப் பெண்ணிடம், பாகிஸ்தான் தேர்தல் ஆணையம் பெண்களுக்கென்று தனி வாக்குச் சாவடிகளை பழமைவாத பகுதிகளில் ஏற்படுத்தும் என்கிறார்.

"துர்னல் பகுதியில் இருக்கும் பெண்களுக்கு அரசியல் விழிப்புணர்வும் இல்லை, வாக்களிப்பது தொடர்பான புரிதலும் இல்லை" என்கிறார் நஹிதா.

மேலும் அவர், "பெண்கள் தொடர்ந்து அரசியலிலிருந்து தள்ளிவைக்கப்பட்டு இருக்கிறார்கள். கிராமத்து ஆண்களும், வேட்பாளர்களும் பெண்களின் வாக்கு வேண்டாம் என்று முடிவு செய்துவிட்டார்கள். அதனால், வாக்கு கேட்க கூட அவர்கள் பெண்களை சந்திப்பது இல்லை" என்கிறார்.

அந்த கிராமத்தில் இருக்கும் மசூதி ஒன்றில் மத போதகர் ஹஃபீஸ் அலி தொழுகையை முன்னின்று நடந்துகிறார். அவரிடம் பேசிய போது, அவர் அது போன்ற தடை ஏதும் இல்லை என்கிறார். ஆனால், கள நிலவரம் வேறு மாதிரி இருக்கிறது.

"யாரும் பெண்களை தடுக்கவில்லை. கடந்த காலங்களில் வேண்டுமானால் சில பிரச்னைகள் இருந்து இருக்கலாம். இந்த கிராமத்தில் பல சண்டைகள் கடந்த காலங்களில் நடந்து இருக்கிறது, அதற்கெல்லாம் மூலக் காரணம் பெண்கள். அதனால், மக்கள் பெண்களை வாக்களிக்க அனுமதிக்க அஞ்சி இருக்கிறார்கள். ஆனால், இப்போது நிலவரம் மெல்ல மாறி வருகிறது" என்கிறார் அலி.

துர்னல் பகுதியில் தேர்தல் பிரசாரத்திலும் ஆண்களின் ஆதிக்கம்தான் இருக்கிறது. நான் அமர் யாசிரின் தேர்தல் பிரசாரத்தில் கலந்து கொண்டேன். அவர் இம்ரான் கானின் கட்சி சார்பாக போட்டி இடுகிறார். அந்த பேரணியில் எங்கும் நீக்கமற ஆண்கள்தான் நிரம்பி இருந்தார்கள். கடல் போல திரண்டு இருந்த ஆண்கள் கூட்டம் அது.

பெண்கள் வாக்களிக்க விதிக்கப்பட்டிருக்கும் தடையை நான் ஆதரிக்கவில்லை. இதுவரை எந்த வேட்பாளரும் இதனை மாற்ற முயற்சிக்கவில்லை என்கிறார்.

மேலும் அவர், "பெண்கள் வாக்களிக்க தடை விதிக்கப்பட்டிருக்கும் பகுதிகளுக்கு நான் சென்றேன். அங்குள்ள பெரியவர்களிடம் பேசினேன். அவர்கள் இதனை மாற்ற முயற்சித்து கொண்டிருக்கிறார்கள்" என்கிறார் யாசிர்.

நம்பிக்கை ஒளி கீற்று

தேர்தல் ஆணையம் கடந்த ஆண்டு, ஒரு தொகுதியில் பெண்கள் 10 சதவீதமாவது வாக்களித்து இருக்க வேண்டும். அப்போதுதான் தேர்தல் செல்லும் என்று அறிவித்தது.

ஜூலை 25 நாடாளுமன்ற தேர்தல் நடக்க இருக்கும் சூழ்நிலையில் இது தொடர்பான பிரசாரத்தையும் தேர்தல் ஆணையம் முடுக்கிவிட்டு இருக்கிறது.

"பாகிஸ்தான் தேர்தல் ஆணையத்தொல் பாலின விவகார பிரிவின் கூடுதல் பொது இயக்குநராக இருக்கும் நிஹாத் சித்திக், "பெண்களுக்கும் ஆண்களுக்கும் இது குறித்து விழிப்புணர்வை ஏற்படுத்த நாங்கள் தொடர்ந்து முயன்று வருகிறோம். ஒரு வேளை அந்த தொகுதியில் 10 சதவீத பெண்கள் வாக்களிக்கவில்லை என்றால் நாங்கள் மறுதேர்தல் நடத்துவோம்" என்கிறார்.

பெண் செயற்பாட்டாளர்கள் பல ஆண்டு காலமாக பெண்கள் வாக்களிப்பதன் அவசியம் குறித்து பிரசாரம் செய்து வருகிறார்கள். ஆனால், இப்போது நம்பிக்கை ஒளி மெல்ல தெரிகிறது, எதிர்காலத்தில் நிச்சயம் பெண்களை தவிர்க்க முடியாது. தேர்தலில் முக்கிய சக்தியாக உருவெடுப்பார்கள்.

பிற செய்திகள்:

சமூக ஊடகங்களில் பிபிசி தமிழ் :