Coronavirus News: கொரோனா வைரஸால் உருவாகியுள்ள நோய்க்கு ‘கோவிட்-19’ என பெயர் அறிவிப்பு

கோப்புப்படம் படத்தின் காப்புரிமை Getty Images

தற்போது உலகை அச்சுறுத்தி வரும் புதிய கொரோனோ வைரஸால் தற்போது உருவாகியுள்ள நோய்க்கு கோவிட்-19 என அதிகாரபூர்வமாக பெயரிட்டுள்ளதாக உலக சுகாதார நிறுவனம் தெரிவித்துள்ளது.

ஜெனீவாவில் இதுகுறித்து செய்தியாளர்களிடம் பேசிய உலக சுகாதார நிறுவனத்தின்தலைவர் டெட்ரோஸ், ''தற்போது இந்த நோய்க்கு கோவிட்-19 என பெயரிட்டுள்ளோம்'' என்று தெரிவித்தார்.

கொரோனா வைரஸால் ஆயிரத்துக்கும் மேற்பட்டவர்கள் உயிரிழந்துள்ள நிலையில் தற்போது இந்த பெயர் அறிவிப்பு வெளிவந்துள்ளது. மேலும் இந்த நோயால் பல ஆயிரத்துக்கும் மேலானோர் பாதிக்கப்பட்டுள்ளனர்.

சிங்கப்பூர் வங்கி ஊழியருக்கு கொரோனா - வீட்டுக்கு அனுப்பப்பட்ட 300 ஊழியர்கள்

ஒரு ஊழியருக்கு கொரோனா வைரஸ் தாக்கியதால் குறிப்பிட்ட வங்கிக் கிளையில் வேலை செய்யும் 300 பேரையும் உடனடியாக வீட்டுக்கு அனுப்பிவைத்தது சிங்கப்பூரில் உள்ள டி.பி.எஸ். என்னும் ஒரு மிகப்பெரிய வங்கி.

இந்த வங்கிக் கிளை அமைந்திருக்கும் கட்டடத்தின் 43வது மாடியில் வேலை செய்யும் 300 ஊழியர்கள் அனைவரும் வீட்டுக்குச் சென்றுவிடும்படி புதன்கிழமை கேட்டுக்கொள்ளப்பட்டனர்.

சிங்கப்பூரில் ஏற்கெனவே 47 பேருக்கு கொரோனா வைரஸ் இருப்பது உறுதி செய்யப்பட்டது. சீனா தவிர்த்து, அதிக எண்ணிக்கையில் கொரோனா வைரஸ் தாக்கியவர்கள் உள்ள நாடுகளில் சிங்கப்பூரும் ஒன்று.

சீன பெருநிலப் பரப்பில் கொரோனா வைரஸ் தாக்கியவர்கள் எண்ணிக்கை, 44 ஆயிரம். 20 நாடுகளில் கொரோனா வைரஸ் பரவயிருக்கிறது.

குறிப்பிட்ட டி.பி.எஸ். வங்கியின் ஊழியர் செவ்வாய்க்கிழமை பரிசோதிக்கப்பட்டார். அவருக்கு கொரோனா தொற்று இருப்பது புதன்கிழமை உறுதி செய்யப்பட்டது.

இதையடுத்து, அவர் வேலை செய்த குறிப்பிட்ட தளத்தில் வேலை செய்யும் 300 பேரும் முன்னெச்சரிக்கை நடவடிக்கையாக வீட்டுக்கு அனுப்பப்பட்டு, அங்கிருந்தே வேலை செய்யும்படி கேட்டுக்கொள்ளப்பட்டனர் என்று அந்த வங்கி விடுத்த அறிக்கையில் தெரிவிக்கப்பட்டுள்ளது.

"சிக்கலான இத்தருணத்தில் குறிப்பிட்ட ஊழியருக்கும், அவரது குடும்பத்துக்கும் தேவையான எல்லா ஆதரவையும், வழிகாட்டுதலையும் வங்கி அளிக்கும் என்றும்" அந்த வங்கி தெரிவித்துள்ளது.

படத்தின் காப்புரிமை EPA
Image caption குறிப்பிட்ட வங்கியின் மின் தூக்கி, கழிப்பிடங்கள் போன்ற பொதுப் பயன்பாட்டு இடங்கள், சுத்தம் செய்யப்படுகின்றன.

யார் யார் அந்தக் குறிப்பிட்ட ஊழியருடன் நெருங்கிய தொடர்பில் இருந்தது என்பது ஆராயப்படுகிறது. மெரினா பே ஃபினான்சியல் சென்டர் கட்டடத்தின் மின் தூக்கி, கழிப்பிடங்கள் போன்ற பொதுப் பயன்பாட்டு இடங்கள், முழுமையாக சுத்தம் செய்யப்பட்டு, கிருமி நீக்கம் செய்யப்படுகின்றன.

முடிந்தவரை இந்த புதிய வைரஸை எதிர்த்து கடுமையாக போரிட வேண்டும் என உலக நாடுகளையும், மக்களையும் டெட்ரோஸ் கேட்டுக் கொண்டுள்ளார்.

படத்தின் காப்புரிமை Getty Images

கடந்த சில நாட்களாகவே குழப்பங்களை தவிர்க்கவும், எந்த நாடு அல்லது குழு மீது முத்திரை குத்தப்படுவதை தவிர்க்கவும் கொரோனா வைரஸால் ஏற்பட்டுள்ள நோய்க்கு அதிகாரப்பூர்வ பெயர் வைத்திட வேண்டுமென ஆராய்ச்சியாளர்கள் கோரி வந்தது குறிப்பிடத்தக்கது.

''எந்த ஒரு தனி நபர், குழு, அல்லது விலங்கு என்று யாரையும் தொடர்புபடுத்தாமல் இருக்கும் விதத்திலும், அதேவேளையில் எளிதில் உச்சரிக்கும் விதத்திலும், இந்த நோய்க்கு தொடர்புடையதாகவும் இருக்கும் ஒரு பெயரை நாங்கள் கண்டுபிடிக்க வேண்டும் என்பதே சவாலாக இருந்தது'' என்று உலக சுகாதார நிறுவனத்தின் தலைவர் இது குறித்து குறிப்பிட்டார்.

''கொரோனா'', ''வைரஸ்'' மற்றும் ''நோய்'' ஆகிய வார்த்தைகளில் இருந்து எடுக்கப்பட்ட இந்த புதிய பெயருடன் இணைந்துள்ள 19 என்ற எண், இந்த வைரஸ் பரவ தொடங்கிய 2019 என்ற ஆண்டை குறிப்பதாகும். (கடந்த 31 டிசம்பரில் இந்த வைரஸ் குறித்து உலக சுகாதார நிறுவனத்துக்கு செய்தி அனுப்பப்பட்டது).

படத்தின் காப்புரிமை EPA

இதனிடையே சீனாவில் மேலும் 42000 பேருக்கு கொரோனோ வைரஸ் தாக்கப்பட்டுள்ளது உறுதி செய்யப்பட்டுள்ளது. கடந்த 2002-2003-இல் கடுமையான பாதிப்பை உருவாக்கிய சார்ஸ் நோய் தொற்றால் ஏற்பட்ட மரணங்களை விட தற்போது கொரோனோ வைரஸ் தாக்குதலால் அதிக மரணங்கள் ஏற்பட்டுள்ளது.

கொரோனா வைரஸ் தொற்றால் கடுமையான பாதிப்பு ஏற்பட்டுள்ள சீனாவின் ஹூபே மாகாணத்தில் திங்கள்கிழமையன்று 103 பேர் உயிரிழந்துள்ளனர். தற்போது வரை சீனாவில் கொரோனா வைரஸ் தொற்றால் 1016 பேர் இறந்துள்ளனர்.

முன்னதாக கடந்த திங்கள்கிழமையன்று, கொரோனா வைரஸ் குறித்துப் பொய் செய்திகளைப் பரப்பாதீர்கள். அது குறித்து கிண்டல் செய்யாதீர்கள் என உலக சுகாதார அமைப்பு எச்சரித்தது.

பொய் பரப்புரைகள் எங்களது முயற்சிகளை குறைத்து மதிப்பிடுவதாக உள்ளது என உலக சுகாதார அமைப்பு குற்றஞ்சாட்டி உள்ளது.

படத்தின் காப்புரிமை Getty Images

மீட்புப் பணியில் நமது கதாநாயகர்கள் பணியாற்றி வருகிறார்கள் என்று கூறி உள்ள உலக சுகாதார அமைப்பின் இயக்குநர் டெட்ரோஸ், "தற்போது வெளிவரும் பல பொய் செய்திகள் நமது கதாநாயகர்கள் மேற்கொண்டுள்ள பணியை மேலும் சிரமமாக்கிவிடுகிறது," என தெரிவித்திருந்தது குறிப்பிடத்தக்கது.

மேலும் அவர், "உண்மையில் நாங்கள் வைரஸை எதிர்த்து போராடுவதைவிட, இதுபோன்ற பொய் செய்திகளை, கிண்டல்களை எதிர்த்துதான் அதிகம் போராடுகிறோம்," என்று அவர் கூறி உள்ளார்.

பிற செய்திகள்:

சமூக ஊடகங்களில் பிபிசி தமிழ்: