நேரு - படேல் உறவில் பகைமை இருந்ததா?

  • 17 பிப்ரவரி 2018
ஜவஹருலால் நேரு மற்றும் சர்தார் வல்லபாய் பட்டேல் படத்தின் காப்புரிமை HULTON ARCHIVES/PHOTO DIVISION

கடந்த சில ஆண்டுகளாக இந்தியாவின் முதல் பிரதமர் ஜவஹர்லால் நேருவை தாக்குவதற்கு அப்போதைய துணைப் பிரதமர் சர்தார் வல்லபாய் படேலின் பெயர் பயன்படுத்தப்படுகிறது. இது முன்னெப்போதும் இல்லாத ஒன்றாகும்.

சர்தார் படேலும் நேருவும் ஒருவரையொருவர் விரோதிகளாக பாவித்ததாக வாட்ஸ் ஆப் செயலியில் செய்திகள் பரவிவருகின்றன.

பிரதமர் பதவிக்கு நேருவைவிட அதிக தகுதி வாய்ந்தவர் படேல் என்றும், அவரே பிரதமராக பதவியேற்றிருக்கவேண்டும் என்றும் அவை கூறுகின்றன. இந்த பிரசாரத்தை செய்வது ஆர்.எஸ்.எஸ்ஸும் அத்துடன் தொடர்புடைய அமைப்புகளுமே.

சர்தார் வல்லபாய் படேல் பிரதமராக இருந்திருந்தால், காஷ்மீர் பிரச்சனைக்கு அப்போதே தீர்வு ஏற்பட்டிருக்கும் என்று பிரதமர் நரேந்திர மோதி நாடாளுமன்றத்தில் ஆற்றிய உரையில் தெரிவித்தார் என்பதும் குறிப்பிடத்தக்கது.

நேரு-படேல் இருவருக்கும் இடையிலான உறவு எத்தகையது?

படத்தின் காப்புரிமை Getty Images

இந்தியாவின் சுதந்திர தினம் நெருங்கி வந்துக் கொண்டிருந்த வேளை அது. அமைச்சரவையை எப்படி அமைக்கலாம் என்ற ஆலோசனைகள் மும்முரமாக இருந்த சமயத்தில், 1947 ஆகஸ்ட் முதல் நாளன்று படேலுக்கு கடிதம் எழுதினார் நேரு.

"ஓரளவு சம்பிராதயங்கள் கடைபிடிக்கவேண்டும் என்பதன் அடிப்படையில் மத்திய அமைச்சரவையில் உங்களை சேர்த்துக் கொள்வதற்கான முறையான அழைப்பு விடுப்பதற்கான கடிதம் இது. இந்த கடிதத்திற்கு எந்தவித முக்கியத்துவமும் கிடையாது, ஏனெனில் நீங்கள் நம் அமைச்சரவையின் வலுவான தூண்."

நேருவின் இந்தக் கடிதத்திற்கு படேல் ஆகஸ்ட் மூன்றாம் தேதியன்று பதில் எழுதினார், ''அமைச்சரவையில் இணைவதற்கான அழைப்பு விடுத்த உங்கள் கடிதத்திற்கு நன்றி. நம் இருவருக்கும் இடையிலான பாசமும் அன்பும் 30 ஆண்டுகளாகத் தொடர்கிறது. நம்மிடையே சம்பிரதாய நடைமுறைகளுக்கு எந்தவிதமான அவசியமும் இல்லை.''

கடிதத்தில் படேல் மேலும் இவ்வாறு குறிப்பிடுகிறார், "எனது வாழ்வின் எஞ்சியுள்ள காலம் முழுவதும் உங்களுக்கு சேவை செய்ய விரும்புகிறேன். உங்களைப் போன்ற தியாகத்தை வேறு யாரும் செய்ததில்லை, நாட்டின் லட்சியத்தை நிறைவேற்ற அப்பழுக்கற்ற முழுமையான விசுவாசத்தை காட்டுவேன்."

"நமது நட்பையும் ஒற்றுமையையும் யாராலும் பிரிக்க முடியாது, சக்தி வாய்ந்த நம்முடைய உறவு வலுவானது. கடிதத்தில் நீங்கள் வெளிப்படுத்திய அன்புக்கு நன்றிக் கடன்பட்டுள்ளேன்..." என்று இளகிய நெஞ்சுடன் கடிதம் எழுதினார் இரும்பு மனிதர்.

நேருவே நமது தலைவர் என்று முழங்கிய படேல்

படத்தின் காப்புரிமை HULTON ARCHIVES

படேலின் உணர்வுகள் வெறும் சம்பிரதாயமானவையோ, வெற்று வாய்ச்சவடால்களோ அல்ல. படேல் இறப்பதற்கு சுமார் ஒன்றரை மாதத்திற்கு முன் நேருவை பற்றி அவர் சொன்னது உயிலுக்கு (மரண சாசனத்திற்கு) சமமானது.

1950, அக்டோபர் இரண்டாம் தேதியன்று இந்தோரில் ஒரு பெண்கள் மையத்தின் திறப்பு விழாவுக்கு சென்ற படேல் அங்கு உரையாற்றியபோது, ''இப்போது மகாத்மா காந்தி நம்முடன் இல்லை, அவர் தன்னுடைய பிரதிநிதியை நியமித்து அதனை அறிவித்தும் விட்டார். காந்தியின் சீடர்கள் அவர் சொன்னதை அடியொற்றி நடக்கவேண்டும்.''

('சர்தார் பட்டேலின் கடிதங்கள் 1945-50', வெளியீட்டாளர்: நவ்ஜீவன் பப்ளிஷிங் ஹவுஸ், அகமதாபாத்)

நேருவிற்கும் படேலுக்கும் கருத்து வேறுபாடுகள் இருந்ததன என்பதில் எந்தவித சந்தேகமும் இல்லை என்றாலும், இருவரும் எதிரிகள் இல்லை என்பதும் உண்மையே. படேல் யதார்த்தவாதி என்றால், நேரு கனவு காணும் அரசியல்வாதி. படேல் அமைப்பின் மீது பிடிப்பு கொண்டவர். ஆனால் நேருவிற்கு தேசிய அளவில் இருந்த புகழ் இரும்பு மனிதருக்கு இல்லை.

இருவரும் காந்தியின் சீடர்களே. நேருவே பிரதமராக பதவியேற்று நாட்டை வழிநடத்த வேண்டும் என்று முடிவு செய்தார் காந்தி. நேருவின் கண்ணோட்டம், விஷயங்களை அவர் அணுகும் முறை மற்றும் உலக அளவில் அவருக்கு இருந்த அங்கீகாரத்தை கருத்தில் கொண்டே காந்தி இந்த முடிவை எடுத்தார்.

காங்கிரஸார் படேலின் குடும்பத்தினரை மறந்து விட்டதாகவும், ஆனால் நேருவின் பரம்பரை, ஆட்சிப் பொறுப்பில் தொடர்வதாகவும் மற்றொரு பிரசாரம் கூறுகிறது. இதில் எத்தனை உண்மை இருக்கிறது?

படேலின் பிள்ளைகளை மறந்தாரா நேரு?

படத்தின் காப்புரிமை HULTON ARCHIVES

உண்மை என்னவென்றால், நேரு உயிருடன் இருந்த காலத்தில் தனது ஒரே வாரிசான இந்திரா பிரியதர்ஷினியை ஆட்சிப் பொறுப்பில் அமரவைக்கவில்லை. நேருவின் உதவியாளராகவே இந்திரா செயல்பட்டார். 1959ஆம் ஆண்டு டெல்லி காங்கிரஸ் கட்சியின் தலைவராக தேர்ந்தெடுக்கப்பட்டார், ஆனால் 1960இல் நீலம் சஞ்சீவ் ரெட்டி காங்கிரஸ் தலைவரானார்.

1964இல் நேருவின் மறைவுக்கு பிறகு காங்கிரஸ் கட்சி இந்திராவை மாநிலங்களவைக்கு அனுப்பியது. "பேசாத பொம்மை" என்று பொருள்படும் "கூங்கி குடியா" என்று அழைக்கப்பட்ட இந்திராவை மாநிலங்களவைக்கு அனுப்பியது தந்தை நேருவல்ல, அவருக்கு பின் வந்த காங்கிரஸார்கள் தான்.

ஆனால் 1950இல் சர்தார் படேல் இறந்த பிறகு, நேரு படேலின் பிள்ளைகள் குறித்து அக்கறை எடுத்துக் கொண்டார். இந்திராவின் மீது காட்டிய அதே அக்கறையை, சர்தார் படேலின் மகள் மணிபென் படேல் மீதும் நேரு காட்டினார். 1952க்கு முன்னரே பொதுத் தேர்தலில் போட்டியிட அவருக்கு வாய்ப்பு கொடுத்தார் நேரு.

மணிபென் படேல் தெற்கு கைரா நாடாளுமன்றத் தொகுதியில் வெற்றிபெற்றார். 1957இல் ஆனந்த் நாடாளுமன்றத் தொகுதியில் இருந்து தேர்ந்தெடுக்கப்பட்டார். 1964இல் காங்கிரஸ் அவரை மாநிலங்களவைக்கு அனுப்பியது.

1953 முதல் 1956 வரையிலான காலகட்டத்தில் குஜராத் மாநில காங்கிரஸ் கமிட்டி செயலரகவும் 1957 முதல் 1964 வரை குஜராத் மாநிலத் தலைவராகவும் பொறுப்பு வகித்தார் அவர்.

சர்தார் வல்லப்பாய் படேலின் மகனுக்கும் வாய்ப்பு

படத்தின் காப்புரிமை PRAMOD KUMAR

நேருவின் காலகட்டத்தில் காங்கிரஸில் மணிபென் படேலுக்கு மிகுந்த மரியாதை வழங்கப்பட்டது. அதேபோல் வல்லபாய் படேலின் மகன் தஹ்யாபாய் படேலுக்கும் காங்கிரஸ் சிறப்பான மரியாதையை வழங்கியது.

1957 மற்றும் 1962இல் நாடாளுமன்றத்திற்கு காங்கிரஸ் சார்பில் தேர்ந்தெடுக்கப்பட்ட அவர், 1973 முதல் தனது வாழ்நாள் இறுதிவரை மாநிலங்களவை உறுப்பினராக பதவி வகித்தார்.

(காங்கிரஸ் கட்சியின் வேட்பாளராக மணிபென் மற்றும் தஹ்யாபாய்க்குக் வாய்ப்பு வழங்கப்பட்டபோது ஆர்.எஸ்.எஸ் மற்றும் ஜன சங் கடுமையான எதிர்ப்பை தெரிவித்தன.)

அதாவது சர்தார் படேலின் மகனும், மகளும் ஒரே சமயத்தில் மக்களவைக்கும், மாநிலங்களவைக்கும் அனுப்பப்பட்டனர். ஆனால் தனது ஒரே வாரிசான இந்திராவுக்கு நேரு அந்த வாய்ப்பை தனது வாழ்நாளில் வழங்கவில்லை.

படேல் பிரதமராக இருந்திருந்தால் காஷ்மீர் விவகாரத்தில் ஒரு முடிவு கிடைத்திருக்கும் என்றும் சொல்லப்படுகிறது. அதாவது படேல் ராணுவ பலத்தை பயன்படுத்தி காஷ்மீரை இந்தியாவின் அங்கமாக்கியிருப்பார், நேருவின் `தாராள மனப்பான்மை` அதை தடுத்துவிட்டதாக கூறப்படுகிறது.

உண்மை என்னவென்றால், ஜம்மு & காஷ்மீர் மாநிலத்திற்கு சிறப்பு சலுகைகள் வழங்கும் இந்திய அரசியலமைப்பின் சட்டப் பிரிவு 370ஐ வடிவமைத்தவர்களில் முக்கியமானவர் சர்தார் படேல்.

ஆர்.எஸ்.எஸ் பற்றிய சர்தார் படேலின் கருத்து

படத்தின் காப்புரிமை Getty Images

1948ஆம் ஆண்டு அக்டோபர் 30ஆம் தேதி மும்பையில் பொதுக்கூட்டம் ஒன்றில் பேசிய படேல், ''நாட்டில் இஸ்லாமியர்கள் பெரும்பான்மையினராக வாழும் பகுதியாக இருந்தால் அதை பாகிஸ்தானுக்கு கொடுத்துவிடலாம் என்று பலர் நினைக்கின்றனர். ஆனால் நாம் காஷ்மீர் இந்தியாவுக்கு வேண்டும் என்று ஏன் விரும்புகிறோம்? இதற்கான பதில் நேரிடையானது.''

''காஷ்மீர் இந்தியாவுடன் இருக்க வேண்டும் என்று அந்த மக்கள் ஆசைப்படுவதால் தான் இந்தியா அதற்கு முயற்சிக்கிறது. இந்தியாவுடன் காஷ்மீர் இணையவேண்டாம் என்று அங்கிருக்கும் மக்கள் கருதினால், நாம் அடுத்த நொடியே அங்கு இருக்கமாட்டோம். காஷ்மீர் மக்களின் விருப்பத்தை புறக்கணிக்க முடியாது'' என்று முழக்கமிட்டார் சர்தார் படேல். (த ஹிந்துஸ்தான் டைம்ஸ், 31 அக்டோபர், 1948)

சுதந்திர இந்தியாவை ஒருங்கிணைத்த சிற்பியான இந்தியாவின் இரும்பு மனிதர் ஐந்நூற்றுக்கும் மேற்பட்ட சமஸ்தானங்களை இணைத்து இந்தியாவை கட்டமைத்த தூண்களில் ஒருவர்.

மகாத்மா காந்தி படுகொலை செய்யப்பட்ட பிறகு, 1948 பிப்ரவரி நான்காம் தேதியன்று, ஆர்.எஸ்.எஸ் சட்டவிரோத அமைப்பு என்று அறிவிக்கப்பட்டது.

'இந்துக்களிடையே ஒற்றுமையை வளர்ப்பதுதான் தங்களுடைய நோக்கம் என்று ஆர்.எஸ்.எஸ் கூறினாலும், நடைமுறையில் அதை கடைபிடிக்கவில்லை. விரும்பத்தகாத, அதேசமயம் பயங்கரமான சில நடவடிக்கைகளில் அந்த அமைப்பின் உறுப்பினர்கள் தனிப்பட்ட முறையில் ஈடுபட்டுள்ளனர். பொதுச் சொத்துக்களுக்குத் தீயிடல், சேதப்படுத்துதல், கொள்ளை போன்ற சம்பவங்களில் அவர்களுக்குத் தொடர்பிருப்பது தெரியவருகிறது. சட்ட விரோதமாக ஆயுதங்களையும் வெடிமருந்துகளையும், குண்டுகளையும் அவர்கள் சேகரித்துள்ளனர். அவர்களுடைய செயல்பாடுகள் ரகசியமாகவே உள்ளன,' என அறிவிக்கப்பட்டது.

1949, ஜூலை 11ஆம் தேதியன்று அந்த அமைப்பின் மீதான தடை நீக்கப்பட்டது. நேருவின் கட்டாயத்தின் பேரிலேயே இந்தத் தடை விதிக்கப்பட்டதாகவும், அதை படேல் தான் அகற்றினார் என்றும் சொல்லப்படுகிறது.

ஆனால் நேருவைப் போன்றே சர்தார் படேலும் ஆர்.எஸ்.எஸ்ஸின் நடவடிக்கைகள் ஆபத்தானது என்றே கருதினார். காந்தியின் படுகொலையை ஆர்.எஸ்.எஸ் உறுப்பினர்கள் இனிப்பு வழங்கிக் கொண்டாடியதைக் கண்டு அவர் அதிருப்தி அடைந்தார்.

அதேபோல், ஆர்.எஸ்.எஸ்ஸின் உதவி இல்லாமல் காந்தி கொலை செய்யப்பட்டிருக்க முடியாது என்றும் படேல் நம்பினார்.

படேல் என்ன செய்தார்?

படத்தின் காப்புரிமை HULTON ARCHIVES

சர்தார் படேல் ஆர்.எஸ்.எஸ்ஸை நிரந்தரமாக 'கட்டுப்படுத்த' தேவையான நடவடிக்கைகளை எடுக்க விரும்பினார். 1925 இல் உருவாக்கப்பட்ட ஆர்.எஸ்.எஸ் அந்த நேரத்தில் விதிமுறைகளையும், கட்டுப்பாட்டையும் கொண்டிருக்கவில்லை. ஆர் எஸ் எஸ் அமைப்பில் உறுப்பினரான சேர எவ்வித நடைமுறையும் இல்லை. உறுப்பினர் கட்டணம், அடையாள அட்டை வழங்கப்படுவதில்லை. மேலும் உறுப்பினர்களுக்கு ரசீது கூட கொடுக்கப்படவில்லை.

ஆர்.எஸ்.எஸ் மீதான தடை நீக்கப்படுவதற்கு முன்னர் படேல் இந்த குறைகளை எல்லாம் நிவர்த்தி செய்யுமாறு அறிவுறுத்தினார்.

1949 ஜூலை 11ஆம் தேதியன்று ஆர்.எஸ்.எஸ் மீதான தடையை விலக்குவதாக அரசு அறிவித்தபோது, "இந்திய அரசியலமைப்பு மற்றும் தேசியக் கொடியினை மதிப்பதை ஆர்.எஸ்.எஸ் அமைப்பின் கொள்கைகளில், விதிமுறைகளில் மேலும் தெளிவாக குறிப்பிடுவதாக ஆர்எஸ்எஸ் தலைவர் உத்தரவாதம் அளித்திருக்கிறார்'' என்று சர்தார் படேல் கூறினார்.

மேலும், "வன்முறையில் ஈடுபடுபவர்கள், அதில் நம்பிக்கை கொண்டவர்கள் அல்லது ரகசியமாக செயல்படுபவர்கள் ஆர்.எஸ்.எஸ் அமைப்பில் இருந்து விலக்கி வைக்கப்படுவார்கள் என்றும் ஆர்.எஸ்.எஸ் தலைவரும், அமைப்பை வழிநடத்துபவர்களும் ஜனநாயக ரீதியாக தேர்வு செய்யப்படுவார்கள் என்றும் உறுதியளிக்கப்பட்டுள்ளது."

ஆர்.எஸ்.எஸ். அமைப்பு மீதான தடையை விலக்க சில முக்கிய நிபந்தனைகளை படேல் விதித்தார். "இந்திய தேசியக் கொடியை மதிப்போம், வெளிப்படையாகச் செயல்படுவோம், அமைதியான வழிமுறைகளிலேயே ஈடுபடுவோம், அரசியல் நடவடிக்கைகளிலிருந்து விலகி நிற்போம்" என்பது அந்த நிபந்தனைகளில் சில.

ஆர்.எஸ்.எஸ். கலாசாரப் பணியில்தான் ஈடுபடும். அரசியலில் ஈடுபடாது என்று ஆர்.எஸ்.எஸ். தனது அமைப்பு விதியிலேயே வரையறை செய்தது.

கருத்து வேறுபாடுகளை மறுத்தார் படேல்

படத்தின் காப்புரிமை CENTRAL PRESS

ஆர்.எஸ்.எஸ் அமைப்பின் மீதான தடை விலக்கப்பட்ட போது அரசு வெளியிட்ட இந்த அறிக்கை, அந்த அமைப்பின் மீதான தடை, அதை விலக்கிக்கொள்ள அது கொடுத்த உறுதிமொழிகள் பற்றி விரிவாக விளக்குகிறது. இதிலிருந்து இந்தியாவின் மூவர்ணக் கொடியையும் அந்த அமைப்பு மதிக்கவில்லை என்று தெரிகிறது.

ஆனால் இப்படிப்பட்ட ஒரு அமைப்பின் மீதான தடையை நீக்கியதற்கு ஜனநாயகம் என்ற நடுநாயகம் தான் காரணம். அதோடுகூட, பிரதமர் ஜவஹர்லால் நேருவின் அறிவுறுத்தலும் மற்றொரு காரணமாக கருதப்படுகிறது.

குறிப்பிடத்தக்க வகையில், படேலின் பெயரைப் பயன்படுத்தும் ஆர்.எஸ்.எஸ், அவரது மரணத்திற்கு பிறகு, அமைப்பின் மீதான தடை நீக்கத்தின்போது வழங்கப்பட்ட வாக்குறுதிகளை காற்றில் பறக்கவிட்டது.

தற்போது அந்த அமைப்பு அரசியலில் பங்கெடுக்கிறது. மாநிலங்களின் முதலமைச்சராவது யார், யார் பிரதமராகலாம், அமைச்சராக யாரை நியமிக்கலாம், பாரதிய ஜனதா கட்சியின் தலைவராக யாரை தேர்ந்தெடுக்கலாம் என பல 'யார்'களுக்கான சூத்திரதாரியாக விளங்குகிறது ஆர்.எஸ்.எஸ்.

முதலில் ஜனசங்கத்தையும், பிறகு பாரதிய ஜனதா கட்சியையும் உருவாக்கிய ஆர்.எஸ்.எஸ், அரசியலில் ஈடுபடமாட்டோம் என்று இரும்பு மனிதர் வல்லபபாய் படேலுக்கு கொடுத்த வாக்குறுதியை மீறியது. அதேபோல் அமைப்பை வழிநடத்துபவர்களுக்கும் தேர்தல் நடத்தப்படுவதில்லை. மாறாக அமைப்பை அடுத்து வழிநடத்துபவர் யார் என்று முன்மொழியப்படுகிறது.

தனக்கும் நேருவுக்கும் இடையில் பகைமை இருப்பதாக கூறப்படுவதை தொடர்ந்து மறுத்துவந்தார் சர்தார் படேல். அவர் இதுகுறித்து நாடாளுமன்றத்தில் வெளிப்படையாகவே பேசினார், ''நாடு எதிர்கொண்டிருக்கும் அனைத்து பிரச்ச்சனைகளிலும் நான் பிரதமருடன் உறுதுணையாக நிற்கிறேன். நாங்கள் இருவரும் எங்கள் தலைவர் மகாத்மா காந்தியின் பாதத்தில் அமர்ந்து பாரதத் தாயின் விடுதலைக்காக பாடுபட்டோம். இன்று மகாத்மா நம்முடன் இல்லை. இந்த நிலையில் நாங்கள் ஒருவரோடு ஒருவர் சண்டையிடுவதைப் பற்றி சிந்திக்கக்கூட மாட்டோம்.''

படேல் நாட்டின் முதல் பிரதமராகும் வாய்ப்பை நேரு தட்டிப் பறித்தார் என்று சங்க பரிவாரம் கூறுவது போல படேல் நினைக்கவில்லை என்பதை அவரே பலமுறை சொல்லிவிட்டார். சர்தார் வல்லபாய் படேல், ஆர்.எஸ்.எஸ் விரும்பிய இந்தியாவை அல்ல, மகாத்மா காந்தி கனவு கண்ட உன்னத பாரதத்தை உருவாக்கவே நினைத்தார்.

இந்தியாவை 'இந்து நாடாக' மாற்றும் எண்ணத்தை 'பைத்தியக்காரத்தனம்' என்று வல்லபாய் படேல் வெளிப்படையாகவே விமர்சித்தார், ஆனால் சங் பரிவாரின் இலக்கு என்பது 'இந்து நாடு' என்பது அனைவருக்கும் உள்ளங்கை நெல்லிக்கனியாக தெரிந்ததே.

(இது பிபிசியின் கருத்தல்ல. கட்டுரையாளரின் தனிப்பட்ட கருத்து)

சர்தார் படேல் பற்றி வாசகர்கள் தெரிந்து கொள்ள விரும்பும் தகவல்களை பற்றி பிபிசி ஹிந்தி பிரிவு கேட்டிருந்தது. வாசகர்களின் கேள்விகளுக்கான பதிலாக இந்த கட்டுரை எழுதப்பட்டுள்ளது.

கிரிக்கெட் வீரர் ஜவஹர்லால் நேருவை உங்களுக்கு தெரியுமா?

பிற செய்திகள்

சமூக ஊடகங்களில் பிபிசி தமிழ் :