தேர்தலில் வாக்களிப்பது எப்படி? தமிழ்நாடு மக்களவைத் தேர்தல் பற்றிய முக்கிய கேள்விகளுக்கான விடை

தேர்தல்

இந்திய மக்களவையின் இரண்டாவது கட்ட வாக்குப்பதிவின்போது தமிழ்நாட்டில் உள்ள 39 தொகுதிகளில் 38 தொகுதிகளுக்கு ஏப்ரல் 18ம் தேதி வாக்குப்பதிவு நடைபெறுகிறது.

வேலூர் மக்களவைத் தொகுதியின் தேர்தல் ரத்து செய்யப்பட்டுள்ளது.

தமிழ் நாட்டில் மக்களவைத் தேர்தல் எப்போது நடைபெறுகிறது?

தமிழ்நாடு மற்றும் புதுச்சேரியில் மக்களவைத் தேர்தல் வேலூர் தொகுதியை தவிர (வேலூர் தொகுதியில் தேர்தல் ரத்து) ஏனைய எல்லா தொகுதிகளுக்கும் ஏப்ரல் 18ம் தேதி நடைபெறுகிறது.

விரிவாக படிக்க:தமிழகத்தில் ஏப்ரல் 18ல் வாக்குப்பதிவு

இந்திய மக்களவைத் தேர்தலின் இரண்டாவது கட்ட தேர்தலில், தமிழ் நாடு (38 தொகுதிகள்), புதுச்சேரி (1 தொகுதி), அஸ்ஸாம் (5 தொகுதிகள்), பிகார் (5 தொகுதிகள்), சத்தீஸ்கார் (3 தொகுதிகள்), ஜம்மு காஷ்மீர் (2 தொகுதிகள்), கர்நாடகா (14 தொகுதிகள்), மகாராஷ்ரா (10 தொகுதிகள்), மணிப்பூர் (1 தொகுதி), ஒடிஸா (5 தொகுதிகள்), உத்தரபிரதேசம் (8 தொகுதிகள்), மேற்கு வங்காளம் (3 தொகுதிகள்) என மொத்தம் 95 தொகுதிகளில் வாக்குப்பதிவு நடைபெறுகிறது,

மக்களவைத் தேர்தல் ஏழு கட்டங்களாக எப்போது நடைபெறுகிறது?

இந்தியாவின் 17வது மக்களவைத் தேர்தல் கீழ்காணும் பட்டியல்படி ஏழுக்கட்டங்களாக நடைபெறுகிறது.

கட்டம் வாக்குப்பதிவு தேதி தொகுதிகள் மாநிலங்கள்
1 ஏப்ரல் 11 91 20
2 ஏப்ரல் 18 97 13
3 ஏப்ரல் 23 115 14
4 ஏப்ரல் 29 71 9
5 மே 6 51 7
6 மே 12 59 7
7 மே 19 59 8

தமிழகத்தில் வாக்குப்பதிவு நேரம் எப்போது வரை?

காலை ஏழு மணிக்குத் தொடங்கும் வாக்குப்பதிவு மாலை ஆறு மணிவரை நடைபெறும். எனினும், ஆறு மணிக்கு முன்பாகவே வாக்குச்சாவடிக்கு வந்தவர்கள் ஆறு மணிக்கு மேலும் வரிசையாக வாக்களிக்க அனுமதிக்கப்படுவார்கள்.

ஆறு மணிக்கு முன்பே வந்தவர்களுக்கு டோக்கன் வழங்கப்படும்.

17வது மக்களவைத் தேர்தல் பற்றி அறிந்து கொள்ள வேண்டியவை என்ன?

தற்போது தொடங்கியுள்ள மக்களவை தேர்தல் குறித்து நீங்கள் தெரிந்து கொள்ள வேண்டிய 10 முக்கிய விஷயங்கள் இவைதான்.

விரிவாக படிக்க: மக்களவை தேர்தல் குறித்து நீங்கள் தெரிந்து கொள்ள வேண்டிய 10 முக்கிய விஷயங்கள்

மக்களவைத் தேர்தலின் முடிவு எப்போது வெளியாகும்?

ஏப்ரல் 11ஆம் தேதி தொடங்கி மே 19ஆம் தேதி வரை ஏழு கட்டங்களாக மக்களவை தேர்தல் நடைபெறுகிறது. இந்திய மக்களவைத் தேர்தல் வாக்குகளும், ஆந்திரபிரதேச சட்டப்பேரவை வாக்குகளும் மே மாதம் 23ம் தேதி எண்ணப்பட்டு முடிவுகள் அறிவிக்கப்படும்.

தமிழகத்தில் எந்தெந்த தொகுதிகளுக்கு சட்டப்பேரவை இடைத்தேர்தல் நடைபெறுகிறது?

பூந்தமல்லி, பெரம்பூர், திருப்போரூர், சோளிங்கர், குடியாத்தம், ஆம்பூர், பாப்பிரெட்டிபட்டி, அரூர், நிலக்கோட்டை, தஞ்சாவூர், ஓசூர், மானாமதுரை, ஆண்டிப்பட்டி, பெரியகுளம், சாத்தூர், பரமக்குடி, விளாத்திகுளம், திருவாரூர் ஆகிய 18 தொகுதிகளுக்கு தமிழகத்தில் நாடாளுமன்றத் தேர்தல் நடைபெறும் நாளிலேயே, அதாவது ஏப்ரல் 18ஆம் தேதி வாக்குப்பதிவு நடைபெறுகிறது

விரிவாக படிக்க: 22 சட்டப்பேரவை தொகுதிகளுக்கு இடைத்தேர்தல் அறிவிப்பு

சூலூர், அரவக்குறிச்சி, திருப்பரங்குன்றம், ஓட்டப்பிடாரம் (தனி) ஆகிய நான்கு தொகுதிகளுக்கும் மக்களவைத் தேர்தலின் ஏழாவது மற்றும் கடைசிக் கட்ட வாக்குப் பதிவு நடைபெறும் நாளில் அதாவது மே 19ஆம் தேதி வாக்குப் பதிவு நடைபெறுமென இந்தியத் தேர்தல் ஆணையம் அறிவித்துள்ளது.

தேர்தலில் வாக்களிப்பது எப்படி?#India

வாக்காளர் அடையாள அட்டையோடு வாக்குப்பதிவு மையத்திற்கு செல்லவும்.

விரிவாக படிக்க: வாக்களிப்பது எப்படி என்பதற்கான விளக்கம்

வாக்காளர் அடையாள அட்டை, பாஸ்போட், பேன் கார்டு, ஆதார் கார்டு, ஓட்டுநர் உரிமம் அல்லது வங்கிக் கணக்கு புத்தகம் ஆகியவற்றை பயன்படுத்தி வாக்களிக்க வேண்டும்.

வாக்களிப்பது பற்றிய காணொளி

ஒலிபரப்பு மென்பொருள் உங்கள் கணினியில் இல்லை
தேர்தலில் வாக்களிப்பது எப்படி?

தமிழ்நாடு வாக்காளர் பட்டியலில் உங்களது பெயரை கண்டுபிடிப்பது எப்படி?

வாக்காளர் அடையாள அட்டை வைத்திருந்தால் மட்டும் போதாது. தமிழ்நாடு தேர்தல் ஆணைய இணையதளத்திற்கு சென்று வாக்காளர் பட்டியலில் உங்கள் பெயர் இருக்கிறதா என்று சோதனை செய்ய வேண்டும்.

விரிவாக படிக்க: தமிழ்நாடு தேர்தல் ஆணைய இணையதளம்

தமிழ்நாடு வாக்காளர் பட்டியலில் உங்கள் பெயர் உள்ளதா என்று பார்க்க பக்கத்திற்கு சென்று சோதனை செய்யுங்கள்.

வாக்களர் பட்டியலில் உங்கள் பெயரை சேர்ப்பது எப்படி?

உங்களிடம் வாக்காளர் அடையாள அட்டை இருந்தால், உங்கள் பெயர் வாக்காளர் பட்டியலில் இருக்கவேண்டும் என்று எந்த அவசியமும் இல்லை. தேர்தல் ஆணையம் அவ்வப்போது வாக்காளர் பட்டியலைப் புதுப்பிக்கும். என்பதால், உங்கள் பெயர் பட்டியலில் இருந்து தற்செயலாகக்கூட விடுபட்டிருக்கலாம்.

ஒவ்வொரு ஆண்டும் ஜனவரி முதல் வாரத்தில், தேர்தல் ஆணையத்தின் தேசிய வாக்காளர்களுக்கான சேவைகள் (national voters service portal) என்ற வலைதளத்தில் வாக்காளர் பட்டியல் வெளியிடப்படுகிறது.

படத்தின் காப்புரிமை Getty Images

இணையம் மூலம் வாக்காளர் அடையாள அட்டை பெறுவது எப்படி?

உங்களிடம் வாக்காளர் அடையாள அட்டை இல்லையென்றால் இணையம் மூலம் பெறுவது எப்படி என்பதை இந்த காணொளி விளக்குகிறது.

ஒலிபரப்பு மென்பொருள் உங்கள் கணினியில் இல்லை
வாக்காளர் அடையாள அட்டை இல்லையென்றால் பெறுவது எப்படி?

VVPAT என்றால் என்ன? இது எவ்வாறு வேலை செய்கிறது?

VVPAT எனப்படும் ஓட்டர் வெரிஃபயபிள் பேப்பர் ஆடிட் ட்ரெயில்(Voter Verifiable Paper Audit Trail) இயந்திரங்கள் வாக்காளர்கள் தாங்கள் வாக்களித்த வேட்பாளருக்கே தங்களது வாக்கு பதிவாகியுள்ளதா என்பதை சரிபார்க்க உதவுகிறது.

விரிவாக படிக்க: VVPAT பற்றி நீங்கள் தெரிந்து கொள்ள வேண்டிய 10 தகவல்கள்

வாக்களிக்கும் மையத்தை கண்டுபிடிப்பது எவ்வாறு?

  • தேர்தல் ஆணையம் வழங்குகின்ற பூத் சிலிப்பில் எந்த வாக்குப்பதிவு மையத்தில் வாக்களிக்க வேண்டும் என்பதை அறிந்து கொள்ளலாம்.
  • இந்திய தேசிய வாக்காளர்கள் சேவை இணையபக்கத்திற்கு சென்று, கேட்கப்படும் தகவல்களை வழங்கியும் நாம் வாக்களிக்க வேண்டிய மையத்தை கண்டறியலாம்.

தமிழ் நாட்டின் முக்கிய வேட்பாளர்கள் யார்?

திமுக-வின் கருணாநிதி மற்றும் அதிமுக-வின் ஜெயலலிதா போன்ற பெரிய தலைவர்கள் இல்லாத நிலையில் நடைபெறும் இந்தத் தேர்தலில் தமிழ் நாட்டின் முக்கியக் கட்சிகளின் வேட்பாளர்கள் பட்டியலை இந்த இணைப்பில் காணலாம்.

விரிவாக படிக்க: தமிழ் நாடு வேட்பாளர்கள் பட்டியல்

தமிழ் நாட்டின் முக்கிய மக்களவைத் தொகுதிகள் எவை?

தமிழ்நாட்டின் முக்கிய தொகுதிகளை இந்த இணைப்பில் காணலாம்.

விரிவாக படிக்க: தமிழக மக்களவைத் தேர்தல் 2019: பொள்ளாச்சி, மத்திய சென்னை, தூத்துக்குடி முக்கியத்துவம் பெறுவது ஏன்?

படத்தின் காப்புரிமை THE INDIA TODAY GROUP

நோட்டா என்றால் என்ன?

நோட்டா - NOTA - ஆங்கில சொல்லின் விரிவாக்கம் None of The Above என்பதாகும். இதன் பொருள் "மேலே உள்ள எவரும் அல்ல" என்பதாகும்.

2013ம் ஆண்டு செப்டம்பர் மாதம் தேர்தல் ஆணையத்திற்கு உச்ச நீதிமன்றம் அளித்த ஆணையில், மின்னணு வாக்குப்பதிவு இயந்திரத்தில் "நோட்டா" பொத்தானை வைக்க வேண்டுமென குறிப்பிட்ப்பட்டது.

விரிவாக படிக்க: நோட்டா பற்றிய விளக்கம்

வாக்குப் பதிவு இயந்திரத்தில் கடைசியாக இருக்கும் பொத்தான் நோட்டா பொத்தான்தான்.

நீங்கள் செய்ய வேண்டியது, இந்த பொத்தானை அழுத்துவதுதான்.

தமிழ்நாட்டில் எதுவரை மதுபான விற்பனைக்கு தடை உள்ளது?

ஏப்ரல் 16ம் தேதி தொடங்கி, ஏப்ரல் 18ம் தேதி நள்ளிரவு 12 மணி வரை மது விற்பனை தமிழகத்தில் தடை செய்யப்பட்டுள்ளது.

இதேபோல வாக்குகள் எண்ணப்படுகின்ற மே மாதம் 23ம் தேதியும் மது விற்பனை தடை செய்யப்பட்டுள்ளது.

இந்தியாவின் முதல் தேர்தல் எப்படி நடந்தது தெரியுமா?

16 முறை மக்களவைத் தேர்தல்கள் அமைதியான முறையில் நடந்து, 16 மக்களவையும் ஆயுட்காலம் முடிந்தோ, அல்லது ஆளும் கட்சி பெரும்பான்மை இழந்ததாலோ ஜனநாயக ரீதியிலேயே முடிவுக்கு வந்தன. புதிதாக அமைக்கப்பட்ட மக்களவை மூலம் புதிய அரசுகள் தேர்வு செய்யப்பட்டுள்ளன. காலனியாதிக்கக் காலத்தில் இருந்து ஜனநாயகக் குடியரசாக இந்தியா காலூன்றியது எப்படி? விளக்குகின்றன பிபிசி தமிழின் இரண்டு சிறப்புக் கட்டுரைகள்.

எத்தனை கட்டங்கள்?

ஆந்திரபிரதேசம், அருணாச்சல பிரதேசம், கோவா, குஜராத், ஹரியானா, இமாச்சல பிரதேசம், கேரளா, மேகாலயா, மிசோரம், நாகாலாந்து, பஞ்சாப், சிக்கிம், தெலுங்கானா, தமிழ்நாடு, உத்தராகண்ட், அந்தமான் நிக்கோபார் தீவுகள், தாத்ரா ஹவேலி, டாமன் டையூ ஆகிய மாநிலங்களில் ஒரே கட்டத்தில் தேர்தல் நடைபெறும்.

கர்நாடகா, மணிப்பூர், ராஜஸ்தான், திருபுரா ஆகிய நான்கு மாநிலங்களிலும் இரண்டு கட்டங்களாக தேர்தல் நடைபெற உள்ளது.

அசாம் மற்றும் சத்தீஸ்கரில் மூன்று கட்டங்களாக தேர்தல் நடைபெறும். மேலும், ஜார்கண்ட், மத்திய பிரதேசம், மகாராஷ்டிரா, ஒடிஷா ஆகிய மாநிலங்களில் நான்கு கட்டங்களாக தேர்தல் நடைபெறும்.

படத்தின் காப்புரிமை Getty Images

ஐந்து கட்டங்களாக ஜம்மு காஷ்மிர் மாநிலத்திலும், ஏழு கட்டங்களாக பிகார், உத்தர பிரதேசம் மற்றும் மேற்கு வங்க மாநிலங்களில் தேர்தல் நடைபெறும்.

பத்திரிகைகள், தொலைக்காட்சி, பொது இடங்கள் என எல்லா இடங்களிலும் வரவிருக்கும் மக்களவை தேர்தல் பற்றிய பேச்சே அதிகமாக தென்படுகிறது. அரசியல் தலைவர்கள் நடத்தும் பேரணிகளின் எண்ணிக்கையும் இந்தியாவின் பிற மாநிலங்களில் அதிகரித்து வருகிறது. கருத்துக்களும்-எதிர் கருத்துக்களும், குற்றச்சாட்டுகளும் அதற்கு பதில்களும் என தேர்தல் திருவிழா களைகட்டுகிறது.

2014ஆம் ஆண்டு பொதுத் தேர்தல்

2014 ஆம் ஆண்டு பொதுத் தேர்தல் நடைபெற்றபோது, அந்த ஆண்டு மார்ச் ஐந்தாம் தேதி தேர்தல் அறிவிப்பு வெளியிடப்பட்டது. தேர்தல் வாக்குப்பதிவு ஏப்ரல் 16 ம் தேதி தொடங்கி, மே 13 வரை 5 கட்டங்களாக நடைபெற்றது.

தேர்தல் முடிவுகள் மே 16 அன்று வெளியானபோது பாரதிய ஜனதா கட்சி பெரும்பான்மை தொகுதிகளில் வெற்றி பெற்றது, பிறகு தேசிய ஜனநாயக கூட்டணி அரசு உருவானது. பா.ஜ.க மட்டும் 282 தொகுதிகளில் வென்று அறுதிப் பெரும்பான்மை பெற்றது.

வேட்பாளர்கள் தங்களது வேட்பு மனுவைத் திரும்பப் பெறும் தேதியையும் தேர்தல் ஆணையம் அறிவிக்கிறது. அரசியல் கட்சிகள் தேர்தல் பிரசாரம் செய்வதற்கு ஏதுவாக, வேட்பு மனுவைத் திரும்பப் பெறும் தேதி மற்றும் வாக்குப்பதிவு தேதிக்கு இடையில் குறைந்தபட்சம் 14 நாட்கள் இருக்குமாறு தேர்தல் ஆணையம் தேர்தல் தேதிகளை முடிவு செய்யும்..

இது தவிர, தேர்தல் அறிவிப்பு மற்றும் வேட்பு மனு தாக்கல் செய்வதற்கு இடையில் 7 நாட்கள் இருக்கும்.

படத்தின் காப்புரிமை Reuters

நாடாளுமன்ற தொகுதிகள் மொத்தம் எத்தனை?

இந்திய அரசமைப்பு சட்டம், நாட்டில் அதிகபட்ச நாடாளுமன்றத் தொகுதிகள் 552 இருக்க முடியும் என்று வரையறுத்துள்ளது. தற்போது நம் நாட்டின் மொத்த மக்களவை தொகுதிகள் 545. இதில் மாநிலங்கள் மற்றும் யூனியன் பிரதேசங்கள் என மொத்தம் 543 தொகுதிகளுக்கு பொதுத் தேர்தல் நடைபெறும்.

இதைத் தவிர, ஆங்கிலோ-இந்திய சமூக மக்களுக்கு மக்களவையில் போதுமான பிரதிநிதித்துவம் இல்லை என்று குடியரசுத் தலைவர் கருதினால், அவர் இரண்டு பேரை நியமிக்கலாம்.

மொத்த மக்களவைத் தொகுதிகளில் 131 தொகுதிகள் ஒதுக்கீடு செய்யப்பட்டவை, அவற்றை தனித் தொகுதிகள் என்று அழைக்கிறோம். அந்த 131 தொகுதிகளில் பட்டியல் சாதிகளுக்கு 84 தொகுதிகளும், பட்டியல் பழங்குடி மக்களுக்கு 47 தொகுதிகளும் ஒதுக்கப்பட்டுள்ளன. அதாவது இந்த தனித் தொகுதிகளில் முறையே, பட்டியல் சாதியினர் மற்றும் பட்டியல் பழங்குடியினர் மட்டுமே போட்டியிட முடியும்.

பொதுத் தேர்தலில் ஒரு கட்சி அறுதிப் பெரும்பான்மை பெற வேண்டுமானால் 272 தொகுதிகளில் வெற்றி பெற வேண்டும். அறுதி பெரும்பான்மை பெறுவதற்கு சில தொகுதிகள் குறைவாக இருந்தால், பிற கட்சிகளிடன், சுயேட்சை வேட்பாளர்களின் ஆதரவுடன் ஆட்சி அமைக்கலாம்.

தேர்தலுக்கு முன்போ அல்லது தேர்தல் முடிவுகள் அறிவிக்கப்பட்ட பிறகோ அரசியல் கட்சிகள் கூட்டணி அமைக்கின்றன. ஒரு அரசியல் கட்சி மக்களவை எதிர்க்கட்சித் தலைவரை பெறும் அந்தஸ்து பெற, மொத்த மக்களவைத் தொகுதிகளில் குறைந்தபட்சம் 10%, அதாவது 55 இடங்களில் வெற்றி பெற்றிருக்க வேண்டும்.

2014 ஆம் ஆண்டில் பா.ஜ.க 282 தொகுதிகளில் வெற்றி பெற்று அறுதி பெரும்பான்மை பெற்றது, ஆனால் தற்போது பாரதிய ஜனதா கட்சியிடம் 268 மக்களவை எம்.பிக்கள் மட்டுமே இருக்கின்றனர். அதற்கு காரணம், இடைத் தேர்தல்களில் பா.ஜ.க சில தொகுதிகளை இழந்தது.

பி.எஸ். எடியூரப்பா மற்றும் பி. ஸ்ரீராமுலு போன்ற சிலர், சட்டசபை தேர்தலில் போட்டியிடுவதற்காக எம்.பி பதவியை ராஜினாமா செய்தனர், இதனால் அந்த தொகுதிகளுக்கு இடைத் தேர்தல் நடைபெற்றது. ஆனால் கூட்டணி கட்சிகளின் ஆதரவு இருப்பதால், பா.ஜ.க அரசு நீடிக்கிறது.

படத்தின் காப்புரிமை Getty Images

இந்திய தேர்தல் நடைமுறை எதை அடிப்படையாகக் கொண்டது?

இந்திய ஜனநாயக அமைப்பு பிரிட்டிஷ் வெஸ்ட்மின்ஸ்டர் மாதிரியை அடிப்படையாகக் கொண்டது. பிரிட்டனின் பொதுத் தேர்தலுக்கான வாக்குப்பதிவு ஒரே நாளில் நடைபெறும். வாக்குப்பதிவன்று மாலையே கருத்துக் கணிப்புக்கள் வெளியாகும். அதே நாள் இரவில் வாக்குகள் எண்ணப்பட்டு, அடுத்த நாள் காலைக்குள் தேர்தல் முடிவுகள் வெளிப்படையாக அறிவிக்கப்பட்டுவிடும்.

ஆனால் இந்தியாவில் அப்படி நடைபெறுவதில்லை. வாக்குப்பதிவின்போது பாதுகாப்பு நடவடிக்கைகளை முன்னிட்டு இந்தியா போன்ற மிகப் பெரிய நாட்டில் தேர்தல் பல கட்டங்களாக நடைபெறுகிறது. ஒவ்வொரு கட்டமாக தேர்தல் வாக்குப்பதிவு நடைபெற்று முடிந்ததும், மின்னணு வாக்குப்பதிவு இயந்திரங்கள் வாக்கு எண்ணும் மையங்களில் பாதுகாப்பாக வைக்கப்படும்.

தேர்தல் ஆணையத்தின் நெறிமுறைகளின்படி, பல கட்டங்களாக தேர்தல் நடைபெறும்போது, இறுதி கட்ட தேர்தல் வாக்குப்பதிவுக்கு பின்புதான், வாக்குப் பதிவுக்குப் பிந்தைய கருத்துக்கணிப்புகளை வெளியிடலாம். இறுதி கட்ட வாக்குப்பதிவு முடிவடைந்த ஒரு சில நாட்களுக்கு பிறகு, வாக்குகள் எண்ணப்படும். வாக்கு எண்ணிக்கை காலையிலிலேயே தொடங்கிவிடும்.

தேர்தலில் வாக்குச்சீட்டுகள் பயன்படுத்தப்பட்ட சமயத்தில், தேர்தல் முடிவுகள் தெளிவாக வெளி வருவதற்கு அதிக நேரம் ஆகும். ஆனால், மின்னணு வாக்குப்பதிவு இயந்திரங்களை பயன்படுத்த தொடங்கிய பிறகு முடிவுகள் மாலைக்குள் தெளிவாக தெரிய வந்துவிடுகிறது.

பிற செய்திகள்:

சமூக ஊடகங்களில் பிபிசி தமிழ் :