மக்களை தேர்தல் 2019: கன்னியாகுமரி மக்களவை தொகுதி; தேசிய கட்சிகளின் கோட்டையா?

கன்னியாகுமரி படத்தின் காப்புரிமை Facebook

(வரவிருக்கும் மக்களவை தேர்தலையொட்டி, தமிழகம் மற்றும் புதுவையில் உள்ள 40 தொகுதிகளையும் பற்றிய பிபிசி தமிழின் பார்வை)

குறிஞ்சி, முல்லை, மருதம், நெய்தல் என நான்கு நிலத்திணைகளை கொண்டது கன்னியாகுமரி மாவட்டம்.

இயற்கை வளம் கொழிக்கும் இதன் பெயரிலான மக்களவை தொகுதியில் கன்னியாகுமரி, நாகர்கோவில், குளச்சல், பத்மநாபபுரம், விளவங்கோடு, கிள்ளியூர் ஆகிய சட்டமன்றத் தொகுதிகள் அடங்கியுள்ளன.

ஒன்பதாம் நூற்றாண்டுக்கும் முந்தைய பல வரலாற்றுச் சின்னங்களும் அமைந்திருப்பதால் சுற்றுலாப் பயணிகளுக்கு ஏற்ற இடமாக இது திகழ்கிறது.

இம்மாவட்டத்தின் மேற்கில் கேரள மாநிலமும், வடக்கிலும், கிழக்கிலும் திருநெல்வேலி மாவட்டமும், தெற்கில் இந்தியப் பெருங்கடலும் எல்லைகளாக உள்ளன.

திருவிதாங்கூர் கொச்சின் சமஸ்தானம்

படத்தின் காப்புரிமை Facebook

இந்தியா சுதந்திரம் அடைந்த பின்னர், 1951ம் ஆண்டு திருவிதாங்கூர் கொச்சின் சமஸ்தானத்தின் ஒரு தொகுதியாக நாகர்கோவில் இருந்தது.

1951ம் ஆண்டு நடைபெற்ற நாடாளுமன்ற தேர்தலில் திருவிதாங்கூர் தமிழ்நாடு காங்கிரஸ் கட்சியின் சார்பாக போட்டியிட்ட ஏ.நேசமணி வெற்றி பெற்றார்.

அதோடு திருவனந்தபுரம், சிராயின்கில், கொய்லோன் மற்றும் மாவல்லிகரா, ஆலப்பி, திருவல்லா, மீனாச்சில். கோட்டயம், எர்ணாகுளம், கரங்கனூர், திருச்சகூர் ஆகியவை இந்த திருவிதாங்கூர் கொச்சின் சமஸ்தானத்தின் பிற தொகுதிகளாக இருந்தன.

கன்னியாகுமரி மாவட்டம் 1956ம் ஆண்டு நவம்பர் 1ம் தேதி தமிழ் நாட்டோடு இணைந்தது. அகஸ்தீஸ்வரம், தோவாளை, விளவங்கோடு, கல்குளம் ஆகிய நான்கு தாலுகாக்கள் இணைந்து கன்னியாகுமரி மாவட்டம் உதயமானது.

படத்தின் காப்புரிமை kanniyakumari.nic.in/
Image caption மாத்தூர் தொட்டில் பாலம்

நாகர்கோவில் மக்களவை தொகுதி

ஆண்டு வெற்றி பெற்றவர் கட்சி இரண்டாம் இடம் கட்சி
1957 தாணுலிங்க நாடார் இந்திய தேசிய காங்கிரஸ் செல்லசாமி சுயேட்சை
1962 ஏ. நேசமணி இந்திய தேசிய காங்கிரஸ் பி. விவேகானந்தா சுயேட்சை
1967 ஏ. நேசமணி இந்திய தேசிய காங்கிரஸ் எம். மத்தியாஸ் சுதந்திர கட்சி
1971 கே. காமராஜ் நாடார் தேசிய ஸ்தாபன காங்கிரஸ் எம்.சி. பாலன் திராவிட முன்னேற்ற கழகம்
1977 குமரி ஆனந்தன் தேசிய ஸ்தாபன காங்கிரஸ் எம். மோஸஸ் இந்திய தேசிய காங்கிரஸ்
1980 என். டென்னிஸ் தேசிய ஸ்தாபன காங்கிரஸ் பி. விஜயராகவன் ஜனதா கட்சி
1984 என். டென்னிஸ் இந்திய தேசிய காங்கிரஸ் பி. விஜயராகவன் ஜனதா கட்சி
1989 என். டென்னிஸ் இந்திய தேசிய காங்கிரஸ் டி. குமாரதாஸ் ஜனதா தளம்
1991 என். டென்னிஸ் இந்திய தேசிய காங்கிரஸ் பி. முகமது இஸ்மாயில் ஜனதா தளம்
1996 என். டென்னிஸ் தமிழ் மாநில காங்கிரஸ் (மூப்பனார்) பி. ராதாகிருஷ்ணன் பாரதிய ஜனதா கட்சி
1998 என். டென்னிஸ் தமிழ் மாநில காங்கிரஸ் (மூப்பனார்) பி. ராதாகிருஷ்ணன் பாரதிய ஜனதா கட்சி
1999 பி. ராதாகிருஷ்ணன் பாரதிய ஜனதா கட்சி என். டென்னிஸ் இந்திய தேசிய காங்கிரஸ்
2004 ஏ.வி. பெல்லார்மின் இந்திய கம்யூனிட் கட்சி (மார்க்சிஸ்ட்) பி. ராதாகிருஷ்ணன் பாரதிய ஜனதா கட்சி

1951ம் ஆண்டு தொடங்கி இருந்து வந்த நாகர்கோவில் மக்களவை தொகுதி 2009ம் ஆண்டு செய்யப்பட்ட தொகுதி மறுசீரமைப்பின் காரணமாக கன்னியாகுமரி மக்களவை தொகுதி என பெயர் மாற்றம் பெற்றது.

நாகர்கோவில் தொகுதியில் கன்னியாகுமரி, நாகர்கோவில், குளச்சல், பத்மநாபபுரம், திருவட்டாறு, விளவங்கோடு, கிள்ளியூர் ஆகிய சட்டமன்றத் தொகுதிகள் உள்ளடங்கியிருந்தன.

ஆனால், கன்னியாகுமரி தொகுதியாக பெயர் மாற்றம் பெற்றபோது, திருவட்டார் சட்டமன்ற தொகுதி நீக்கப்பட்டது.

நாகர்கோவில் தொகுதியில், 1951 முதல் 1991-ம் ஆண்டு வரை நடந்த 10 தேர்தல்களிலுமே காங்கிரஸ் வெற்றி பெற்றது.

1996, 1998 ஆகிய இரு தேர்தல்களிலும் தமிழ் மாநில காங்கிரஸ் வென்றது. பாரதிய ஜனதா கட்சியும், இந்திய கம்யூனிஸ்ட் கட்சி (மார்க்சிஸ்ட்) தலா ஒரு முறையும் வென்றுள்ளன.

படத்தின் காப்புரிமை kanniyakumari.nic.in
Image caption பத்மநாமபுரம் அரண்மனை

கன்னியாகுமரி மக்களவை தொகுதி

ஆண்டு வெற்றி பெற்றவர் கட்சி இரண்டாம் இடம் கட்சி
2009 ஜே. ஹெலன் டேவிட்சன் திராவிட முன்னேற்ற கழகம் பி. ராதாகிருஷ்ணன் பாரதிய ஜனதா கட்சி
2014 பி. ராதாகிருஷ்ணன் பாரதிய ஜனதா கட்சி ஹெச். வசந்த குமார் இந்திய தேசிய காங்கிரஸ்

கன்னியாகுமரி மக்களவை தொகுதியாக பெயர் மாற்றம் பெற்ற பின்னர், திராவிட முன்னேற்ற கழகம் ஒரு முறையும், பாரதிய ஜனதா கட்சி ஒரு முறையும் வெற்றி பெற்றுள்ளன.

பொதுவாக பார்த்தால், தேசிய கட்சிகளே அதிக முறை வென்றுள்ளன. அதிக கல்வியறிவு கொண்ட மாவட்டமாக இருக்கும் கன்னியாகுமரி மாவட்டம் தேசிய கட்சிகளின் கோட்டையாகவே இதுவரை இருந்து வந்துள்ளது.

பிற செய்திகள்:

சமூக ஊடகங்களில் பிபிசி தமிழ் :