இந்திய விமானப்படையில் அப்பாச்சி ஹெலிகாப்டர்: 10 முக்கிய தகவல்கள்

அதிநவீன அப்பாச்சி ஹெலிகாப்டரின் முக்கிய சிறப்பம்சங்கள் படத்தின் காப்புரிமை IAF

உலகின் அதிநவீன ராணுவ ஹெலிகாப்டர்களில் ஒன்றான போயிங் நிறுவனத்தின் ஏஎச்-64இ ரக ஹெலிகாப்டர்கள் இன்று இந்திய விமானப்படையில் முறைப்படி சேர்க்கப்பட்டது.

அப்பாச்சி என்றழைக்கப்படும் இந்த வகை ஹெலிகாப்டர்களின் சிறப்பம்சங்களை பார்ப்போம்.

  • அமெரிக்காவை சேர்ந்த விமான தயாரிப்பு நிறுவனமான போயிங் நிறுவனத்தின் ஏஎச்-64இ ரகத்தை சேர்ந்த 22 ஹெலிகாப்டர்களை வாங்கும் ஒப்பந்தத்தில் இந்திய அரசு 2015ஆம் ஆண்டு செப்டம்பரில் கையெழுத்திட்டது.
  • முதல் கட்டமாக, இன்று (செவ்வாய்க்கிழமை) பஞ்சாப் மாநிலம் பதான்கோட் விமானப்படை தளத்தில் நடைபெற்ற விழாவில், எட்டு அப்பாச்சி ஹெலிகாப்டர்களை இந்திய விமானப்படை தளபதி பிரேந்தர் சிங் தனோவா முறைப்படி ராணுவத்தில் இணைத்தார்.
  • பல கட்டங்களாக மீதமுள்ள 14 அப்பாச்சி ரக ஹெலிகாப்டர்கள் அடுத்த ஆண்டிற்குள் இந்திய விமானப்படையிடம் ஒப்படைக்கப்படுமென்று போயிங் நிறுவனம் தெரிவித்துள்ளது.
  • உலகின் அதிநவீன போர் ஹெலிகாப்டரான அப்பாச்சி, தற்போது அமெரிக்கா, பிரிட்டன், இஸ்ரேல் உள்ளிட்ட நாடுகளின் விமானப்படையில் பிரதான ஹெலிகாப்டராக பயன்படுத்தப்பட்டு வருகிறது.
  • இரண்டு டர்போஷாஃப்ட் ரக என்ஜின்களை கொண்ட இந்த ஹெலிகாப்டர் மணிக்கு 289 கிலோமீட்டர் வேகத்தில் பறக்கக் கூடியது.
படத்தின் காப்புரிமை IAF
  • அனைத்து விதமான காலநிலைகளிலும் செயல்படும் திறன் மிக்க அப்பாச்சி ஹெலிகாப்டர்களில் இலக்குகளை கண்டறிய, பின்தொடர, தாக்குதல் தொடுக்க ஏதுவாக லேசர், இன்ஃபராரெட் உள்ளிட்ட பல்வேறு தொழில்நுட்பங்கள் பயன்படுத்தப்படுகின்றன.
  • அப்பாச்சி ஹெலிகாப்டரால் ஒரே நிமிடத்தில் அதிகபட்சமாக 2,800 அடி உயரம் வரை மேல்நோக்கி பறக்க முடியும்.
  • மிக அதிகளவிலான ஆயுதங்களை சுமந்து செல்லக்கூடிய அப்பாச்சி ஹெலிகாப்டர்கள், ஒரே நிமிடத்தில் 128 இலக்குகளை குறிவைத்து தாக்குதல் நடத்தும் திறன் படைத்தது.
  • துப்பாக்கிகள் மட்டுமின்றி, அதிநவீன ராக்கெட்டுகள், ஏவுகணைகள் பொருத்தப்பட்ட இந்த ஹெலிகாப்டர்கள், இரவுநேரத்திலும் அதிவிரைவாக தாக்குதல் நடத்தவல்லது.
  • இந்திய விமானப்படையின் முக்கிய போர் ஹெலிகாப்டராக விளங்கி வரும் ரஷ்யாவில் தயாரிக்கப்பட்ட மிக்-35 ரக ஹெலிகாப்டர்களின் எண்ணிக்கை படிப்படியாக குறைக்கப்பட்டு அடுத்தாண்டிற்குள் அந்த இடத்தை அப்பாச்சி நிரப்பும்.

பிற செய்திகள்:

சமூக ஊடகங்களில் பிபிசி தமிழ்:

தொடர்புடைய தலைப்புகள்