ஏஐசிடிஐ: பிராந்திய மொழிகளில் பொறியியல் படிப்புகள் - கல்வியாளர்கள் கூறுவது என்ன?

  • ஆ விஜயானந்த்
  • பிபிசி தமிழுக்காக
ஏ.ஐ.சி.டி.இ

பட மூலாதாரம், AICTE

இந்தியாவில் பொறியியல் பாடங்களை தமிழ் உள்ளிட்ட 8 பிராந்திய மொழிகளில் கற்பிப்பதற்கு அகில இந்திய தொழில்நுட்பக் கழகம் அனுமதியளித்துள்ளது. பொறியியல் படிப்பின் மீதான மோகம் அருகிவரும் சூழலில் ஏ.ஐ.சி.டி.இ உத்தரவால் மாற்றங்கள் நிகழுமா?

அகில இந்திய தொழில்நுட்பக் கழகம் வெளியிட்டுள்ள உத்தரவில், தமிழ், தெலுங்கு, கன்னடம், இந்தி, மலையாளம், குஜராத்தி, மராத்தி ஆகிய மொழிகளில் இளநிலை பொறியியல் கல்விக்கான பாடத்திட்டங்கள் தயாராக உள்ளதாக தெரிவித்துள்ளது.

இதன்மூலம், பிராந்திய மொழிகளில் பாடம் கற்கவும் கற்பிக்கவும் எந்தவித கட்டாயமும் இல்லை எனவும் ஏ.ஐ.சி.டி.இ தெரிவித்துள்ளது. வரும் கல்வியாண்டு முதல் பிராந்திய மொழிகளில் பாடங்களைக் கற்பிக்கவும் அனுமதி வழங்கப்பட்டுள்ளது.

இதுதவிர, 11 பிராந்திய மொழிகளில் பொறியியல் பாடங்களை மொழிபெயர்க்க ஏ.ஐ.சி.டி.இ திட்டமிட்டுள்ளதாகவும் தகவல் வெளியாகியுள்ளது. இதற்காக செயற்கை நுண்ணறிவுத் தளம் ஒன்று உருவாக்கப்பட்டு பாடங்களை மொழிபெயர்க்கும் பணிகள் நடந்து வருவதாகவும் ஏ.ஐ.சி.டி.இ அதிகாரிகள் தெரிவிக்கின்றனர்.

அதேநேரம், கடந்த 2011 ஆம் ஆண்டில் இருந்து அண்ணா பல்கலைக்கழகம் உள்பட சில அரசு பொறியியல் கல்லூரிகளில் சில பாடப் பிரிவுகள் தமிழில் நடத்தப்பட்டு வருகின்றன.

இதற்கான பாட புத்தகங்கள் எதுவும் அச்சிடப்படாததால், வகுப்புகளில் ஆர்வத்துடன் சேர விரும்பிய மாணவர்களின் எண்ணிக்கையும் படிப்படியாகக் குறைந்தது. இதனால் தமிழ்வழி பொறியியல் வகுப்புகளுக்கான இடங்களும் கணிசமாகக் குறைக்கப்பட்டு விட்டன. இந்நிலையில், ஏ.ஐ.சி.டி.இயின் புதிய அறிவிப்பை கல்வியாளர்கள் பெரிதும் வரவேற்கின்றனர். இதில் அரசு மேற்கொள்ளத் தவறிய பணிகளையும் அவர்கள் சுட்டிக் காட்டுகின்றனர்.

நாஸ்காமின் அதிர்ச்சி அறிக்கை!

பட மூலாதாரம், Getty Images

`ஏ.ஐ.சி.டி.இ அளித்துள்ள அனுமதியால் என்ன மாற்றங்கள் நிகழ்ந்துவிடப் போகிறது?' என கல்வியாளர் `ஆனந்தம்' செல்வகுமாரிடம் பிபிசி தமிழ் கேட்ட போது `` புதிய கல்விக் கொள்கையில் பாராட்டக் கூடிய அம்சங்களில் ஒன்றாக இது உள்ளது. நாஸ்காம் உள்பட பல்வேறு அமைப்புகள் வெளியிட்டுள்ள சர்வே முடிவுகளின்படி, `93 சதவிகித பொறியியல் கல்லூரி மாணவர்கள், வேலை செய்யத் தகுதியற்றவர்களாக வெளியில் வருகிறார்கள்' என்கின்றன.

பல லட்சம் செலவு செய்து நான்காண்டுகள் படிக்கும் மாணவர்கள், தொழில் துறை எதிர்பார்க்கின்ற திறன் இல்லாதவர்களாக வெளிவருகிறார்கள். இதன் பின்னணியில் பல்வேறு குழப்பங்கள் உள்ளன. பாடத்திட்டம், புதிய தொழில்நுட்பத்தை செயல்படுத்தாதது, பாடத் திட்டத்துக்கும் வேலைக்கும் தொடர்பில்லாதது உள்ளிட்டவை மிக முக்கியமானவை. அதாவது, பாடத்தின் அடிப்படை நோக்கம் தெரியாமலேயே மாணவர்கள் உள்ளனர்" என்கிறார்.

தொடர்ந்து பேசிய அவர், `` தமிழகத்தில் 70 சதவீதத்துக்கு மேல் அரசுப் பள்ளிகள் உள்ளன. இங்கு பெரும்பாலும் தமிழ்வழியில் படித்த மாணவர்கள் தான் உள்ளனர். இவர்கள் பொறியியல் வகுப்புகளுக்கு வரும்போது கண்ணைக் கட்டி காட்டில் விட்டது போன்ற நிலைக்குத் தள்ளப்படுகின்றனர். `என்ன மொழியில் படிக்கிறோம்?' என்பதே தெரியாமல் மனப்பாடம் செய்யும் நிலைக்கு அவர்கள் தள்ளப்படுகின்றனர். இவர்களில் 86 சதவிகிதம் பேர் படிப்புக்கு சம்பந்தமில்லாத வேலைகளில் உள்ளதாக ஆய்வு முடிவுகள் சொல்கின்றன. மதிப்பெண்ணுக்காக படிப்பதால்தான் படிப்பின் மீது வெறுப்பு ஏற்படுகிறது. பொறியியல் படிக்கும் மாணவர்கள் தான் ஆராய்ச்சியில் ஈடுபட முடியும். இங்கு பிடிக்காமலேயே படிக்கின்றனர்" என்கிறார்.

பலன் கொடுக்குமா 80:20?

தற்போது தாய்மொழியிலேயே படிப்பதன் மூலம் பிளஸ் 2 படிப்புக்குப் பிறகும் கல்வியுடனான தொடர்பு நீட்டிக்கப்படுகிறது. இதனால் புரிந்து கொண்டு படிக்க முடியும். ஜப்பான், சீனா உள்பட பல நாடுகளில் தாய்மொழியில்தான் படிக்கின்றனர். இதனால் மாணவர்களுக்கும் சமூகத்துக்கும் இடையில் இடைவெளி ஏற்படுவதற்கு வாய்ப்பில்லை. சிந்திக்கும் திறனும் அதிகரிக்கிறது" என்கிறார் "ஆனந்தம்" செல்வகுமார்.

`தாய்மொழியில் படித்தால் வேலை கிடைக்குமா எனச் சிலர் கேள்வி எழுப்புகிறார்களே?' என்றோம். `` தாய்மொழியில் படித்தால் புரிந்து கொண்டு படிக்க முடியும். ஆராய்ச்சியில் ஈடுபடுவதற்கான வாய்ப்புகள் உள்ளன. பொறியியல் பல்கலைக்கழக புத்தகங்கள் மட்டுமல்லாமல் குறிப்பு புத்தகங்களையும் தாய்மொழியில் கொடுப்பதற்கு உதவினால்தான் அவர்களால் வெற்றிகரமானவர்களாக மாற முடியும்.

இந்தியாவில் கேட் தேர்வு உள்பட முக்கியமான தேர்வுகளையும் தமிழில் வைக்க வேண்டும். நான்காண்டுகள் கல்லூரியில் படிக்கும்போது 80 சதவிகிதம் தாய்மொழியிலும் 20 சதவிகிதம் பாடங்களில் உள்ள தொழில்நுட்பரீதியான ஆங்கில பெயர் என்ன என்ற குறிப்புகளைக் கொடுத்தால் வேறு சில தேர்வுகளில் அவர்கள் பங்கேற்பதற்கு வசதியாக இருக்கும்.

அண்ணா பல்கலைக்கழகத்தில் தமிழ்வழியில் படிப்பதற்கான வாய்ப்புகள் இருந்தாலும் அதில் சேருவதற்கு மாணவர்கள் ஆர்வம் காட்டவில்லை. தொடர்ந்து தமிழில் படித்தால் வேலை கிடைக்காது என்ற சூழலை உருவாக்கிவிட்டார்கள். இதற்குக் காரணம், குறிப்பு தாள்களை தமிழில் கொடுக்காததுதான்.

எங்கெல்லாம் போட்டித் தேர்வுகள் வைக்கப்படுகின்றனவோ, அதற்குத் தயாராகும் வகையில் கல்லூரிப் படிப்பின் கடைசி இரண்டு ஆண்டுகளில் திறன் வளர்க்கும் பாடங்களை நடத்த வேண்டும்.

அப்போதுதான் ஏற்றத்தாழ்வுகளைக் களைய முடியும். இதையெல்லாம் சேர்த்து திட்டங்களை செயல்படுத்தும்போது நிறைய சாதனைகளை நிகழ்த்தக் கூடியவர்களாக தமிழ் மாணவர்கள் இருப்பார்கள்.

ஏ.ஐ.சி.டி.இயின் புதிய உத்தரவால், திறமைகளை வெளிப்படுத்தும் வாய்ப்பில்லாமல் அழுத்தப்படும் மாணவர்கள் வெளியே வருவதற்கான சூழல் உருவாகியுள்ளது" என்கிறார்.

அரசு செய்யத் தவறியது என்ன?

பட மூலாதாரம், Getty Images

``தமிழ்நாட்டில் பட்டம் மற்றும் பட்டமேற்படிப்புகளை தமிழ்வழியில் கற்பிக்க வேண்டும் என்ற இயக்கம், பல ஆண்டுகளாக நடந்து வருகிறது. அண்ணா பல்கலைக்கழகத்தின் உறுப்புக் கல்லூரிகளில் சிவில், மெக்கானிக்கல் பிரிவுகளில் தமிழ்வழியில் கற்பிக்கப்படுகின்றன. இங்கு முதலாம் ஆண்டில் சில கையேடுகளைக் கொடுத்தும் படிக்க வைக்கின்றனர். ஆனால், தமிழ்வழியில் படிக்கின்ற மாணவர்களுக்கு சரியான பாடப்புத்தகங்கள் எதுவும் அரசால் தரப்படவில்லை.

கருணாநிதி முதல்வராகவும் நெடுஞ்செழியன் கல்வி அமைச்சராக இருந்த காலகட்டத்தில் மத்திய அரசின் நிதி உதவியோடு இளங்கலை மற்றும் முதுகலை பட்ட வகுப்புகளுக்கு அறிவியல், சமூக அறிவியல் ஆகிய பிரிவுகளுக்கு பாடப்புத்தகங்கள் அச்சிடப்பட்டன. இதற்கான பணிகளை தமிழ்நாட்டுப் பாடநூல் நிறுவனம் செய்தது. இதனால் தரமான புத்தகங்களை வெளியிட்டனர். அதனை தற்போது மறுபதிப்பும் செய்துள்ளனர். ஆனால், பொறியியல் பாடப்பிரிவுகளுக்கு இதுபோன்ற முயற்சிகள் எடுக்கப்படவில்லை" என்கிறார் மூத்த கல்வியாளர் பேராசிரியர் சிவக்குமார்.

அசத்தும் அறிவியல் கலைச்சொற்கள்!

பட மூலாதாரம், Getty Images

தொடர்ந்து சில தகவல்களை பிபிசி தமிழிடம் பட்டியலிட்டார். `` அண்ணா பல்கலைக்கழகம் தவிர சுயநிதிக் கல்லூரிகளில் தமிழ்வழியில் வகுப்புகள் நடைபெறுவதில்லை. ஆங்கிலத்தில் படித்தால் மட்டுமே தரம் உயர்வு என்பதெல்லாம் சரியான வாதம் இல்லை. 1967 முதல் 2004 வரையில் நான் அரசுக் கல்லூரிகளில் பேராசிரியராக வேலை பார்த்தேன். அங்கு இயற்பியல் வகுப்புகளை தமிழில் நடத்தியிருக்கிறேன். தமிழ்வழியில் பட்டவகுப்புகளை நிறைவு செய்த மாணவர்கள், முதுநிலை, ஆராய்ச்சி படிப்புகளை நிறைவு செய்துவிட்டு ஆராய்ச்சியாளர்களாக பணிபுரிகின்றனர். கல்லூரிக் காலங்களில் செமினார் வகுப்புகளில் இவர்களால் சரளமாக ஆங்கிலத்தில் பேச முடியவில்லை. அதுவே, அவர்கள் பணியில் சேர்ந்த பிறகு பேச்சு வழக்கில் சரளமாக ஆங்கிலம் பேசுவதைப் பார்த்திருக்கிறேன்.

பேச்சு வழக்கில் ஆங்கிலத்தை எளிதாகக் கற்றுக் கொள்ளலாம். ஜப்பான், சீனாவை போல இங்கும் தாய்மொழியில் படிக்க வைப்பது என்பது சரியானது. தஞ்சை தமிழ்ப் பல்கலைக்கழகத்தில் வி.ஐ.சுப்ரமணியம் துணைவேந்தராக இருந்த காலகட்டத்தில் ராமசுந்தரம் என்பவர் அறிவியலுக்கு கலைச்சொற்களை உருவாக்கினார். இதுதவிர, மருத்துவம் உள்ளிட்ட துறைகளுக்கும் அகராதிகளை உருவாக்கும் முயற்சியில் இறங்கினர். இவையெல்லாம் தற்போது என்ன சூழலில் உள்ளது எனத் தெரியவில்லை. அதேபோல், 14 தொகுதிகளாக அறிவியல் மற்றும் தொழில்நுட்பத் துறைக்கென கலைச்சொற்களை தமிழ் இணையப் பல்கலைக்கழகம் உருவாக்கியுள்ளது. இதில் ஒரு தொகுதி மட்டும் சமூக அறிவியலுக்கு என உள்ளது. இந்தத் தொகுதிகள் மிக முக்கியமானவை" என்கிறார்.

வழிகாட்டத் தவறியது ஏன்?

பட மூலாதாரம், Getty Images

மேலும், `` பாலிடெக்னிக் கல்லூரிகளில் தமிழில் புத்தகங்கள் உள்ளன. அவற்றையும் தனியார் பதிப்பகங்கள்தான் வெளியிட்டுள்ளன. கிண்டி பொறியியல் கல்லூரியில் தமிழ்வழியில் படிக்கும் மாணவர்களுக்கு குறிப்புகளை மட்டும் வழங்கியுள்ளனர். அண்ணா பல்கலைக்கழகத்தில் முதலாம் ஆண்டில் மட்டும் இயற்பியல், வேதியியல் ஆகிய பாடப்பிரிவுகளில் மாணவர்களுக்கு தமிழ்வழிப் புத்தகம் கிடைத்துள்ளது. இதுவும் அண்ணா பல்கலைக்கழகம் வெளியிட்ட புத்தகம் அல்ல. மாணவர்கள் வெளியில் வாங்கித்தான் படித்து வருகின்றனர். வகுப்புகளில் சில ஆசிரியர்கள் தமிழ்ச் சொற்களைக் கூறுவார்கள். அதை மாணவர்கள் குறிப்பெடுத்துக் கொண்டு ஆங்கிலத்தில் எழுதலாம் அல்லது தமிழில் எழுதலாம். கடந்த சில வருடங்களாக அண்ணா பல்கலைக்கழகத்தில் தமிழ்வழியில் படித்த மாணவர்கள், சரியான வழிகாட்டல் இல்லாமல் தேர்வையும் ஆங்கிலத்திலேயே எழுதத் தொடங்கிவிட்டனர்" என வேதனையோடு கூறுகிறார்.

``பல ஆண்டுகள் சுயநிதிக் கல்லூரிகளில் ஆசிரியராகப் பணிபுரிந்துவிட்டு அரசுக் கல்லூரிக்கு வேலைக்கு வரும் ஆசிரியர்களுக்கு தமிழ்வழியில் வகுப்பெடுக்கும் பயிற்சிகள் அளிக்கப்படுவதில்லை. பொறியியல் கல்லூரிகளில் தமிழில் படிக்க நடவடிக்கை எடுத்தால் கிராமப்புற மாணவர்களை அதிகப்படியாக ஈர்க்க முடியும். கல்லூரி படிப்பு முடிந்த பிறகு நேர்காணல்களை எதிர்கொள்ளும் திறனறி தேர்வுகளுக்கும் தமிழில் எந்தவிதப் புத்தகங்களும் இல்லை. அதற்கான பயிற்சிகளைக் கொடுத்தால் வேலைவாய்ப்பிலும் மாணவர்களால் சாதிக்க முடியும்" எனவும் சுட்டிக் காட்டுகிறார், பேராசிரியர் சிவக்குமார்.

`ஏ.ஐ.சி.டி.இயின் அனுமதியைத் தொடர்ந்து தமிழக அரசு என்ன செய்யப் போகிறது?' என உயர்கல்வித் துறை அமைச்சர் பொன்முடியிடம் பிபிசி தமிழ் தொடர்பு கொண்டது. இதுதொடர்பாக விளக்கமளித்த அவரின் உதவியாளர், `` இங்கு பொறியியல் வகுப்புகள் தமிழ்மொழியில் கற்பிக்கப்பட்டு வருகின்றன. கலைஞர் இருக்கும்போதே இதனைக் கொண்டு வந்தார். சில பாடங்கள் மட்டும் தியரி வடிவில் உள்ளன. அதேநேரம், செய்முறை வகுப்புகள் ஆங்கிலத்தில் உள்ளன. சில பாடப்புத்தங்களை தமிழில் கற்பிக்க முடியாத சூழலும் உள்ளன. தமிழில் படிப்பதால் வேலைவாய்ப்பில் எந்தவிதச் சிரமங்களும் இருக்கப் போவதில்லை. தற்போது முதல்வர் உடனான கூட்டத்தில் அமைச்சர் இருப்பதால் இதுகுறித்து பிறகு பேசுவார்" என கூறினார்.

பிற செய்திகள்:

சமூக ஊடகங்களில் பிபிசி தமிழ் :